11 Kuphata Basa Mwaphinga

PYENEPI PISABVEKANJI

Munthu anaphata basa mwaphinga nee asaicalira. Mbwenye asakomerwa kuphata basa mwakuwanga toera akwanise pinthu pyakufunika kuna iye na kuphedza anango, ngakhale kuti basa inacita iye ndi yakupwazika.

THANGWI YANJI KUPHATA BASA MWAPHINGA NDI KWAKUFUNIKA?

Undimomwene ndi wakuti ife tiri na pinthu pizinji kakamwe toera kucita mu umaso wathu. N’dziko ino yakuti anthu azinji nkhabe komerwa na kuphata basa, kuphata basa mwaphinga kusaphedza kakamwe.—Ekleziaste 3:13.

“Ine ndadzindikira kuti munthu angaphata basa mwaphinga, asakhala wakutsandzaya kakamwe thangwi ya basa inacita iye. Pyenepi pyandiphedza toera ndikomerwe na kuphata basa. Kuphata basa munjira yadidi kusaphedzambo toera munthu adziwike na makhaliro adidi.”—Reyon

PINALONGA BHIBHLYA: “Mitundu yonsene ya basa yakuwanga isaphedza, mbwenye kulonga-longa basi kusatcerengesa.”—Misangani 14:23.

PINAFUNIKA IMWE KUCITA

Toera muphate basa mwakutsandzaya towezerani maonero awa:

Wangisirani toera kucita mwadidi basa yanu. Mwakukhonda tsalakana khala mukucita mabasa a panyumba, mabasa akuxikola peno mabasa anango, aciteni na ntima onsene. Pontho mungakwanisa kucita mwadidi basa, sakani njira zakuthimizira maluso anu m’basa ineyi, mbamuwangisira toera kucita mwadidi peno mwakucimbiza kakamwe. Mungakhala waluso m’basa inacita imwe, munakomerwa kakamwe na basa yanu.

PINALONGA BHIBHLYA: “Kodi waona kale munthu wakuti asaphata basa yace mwaluso? Iye anadzaphatira basa amambo; iye nkhabe kudzaphatira basa anthu akupwazika.”—Misangani 22:29.

Nyerezerani kuti basa yanu inaphedzambo tani anango. Kazinji kene, mungacita mwadidi basa yanu musaphedzambo anango. Mwacitsandzo mungacita mabasa a panyumba mwaphinga, munapungula basa ya anango pa banja panu.

PINALONGA BHIBHLYA: “Kupasa kusatsandzayisa kakamwe kupiringana kutambira.”—Mabasa 20:35.

Citani pizinji kupiringana pire pidaphembwa imwe. M’mbuto mwakucita basi ene basa idaphembwa imwe, wangisirani toera mucite pizinji kupiringana pidaphembwa imwe. Mungacita pyenepi, munaphatisira mwadidi umaso wanu. Munaphata basa tayu thangwi mwapangwa toera kucita pyenepi, mbwenye thangwi musafuna.—Mateu 5:41.

PINALONGA BHIBHLYA: “Pinthu pyadidi pinacita iwe, ukhonde kupicita mwakukakamizwa, mbwenye upicite mwakufuna kwako.”—Filimoni 14.

Khalani na maonero adidi. Anthu anaphata basa mwaphinga nee ndi akupolola, mbwenye nee asaphata basa ndzidzi onsene. Iwo asagawa ndzidzi toera aphate basa mbakhala na ndzidzi toera kupuma.

PINALONGA BHIBHLYA: “Mphyadidi kupuma pang’ono kupiringana kuphata basa mwakuwanga kakamwe, thangwi pyenepi ndi ninga kuthamangira mphepo.”—Ekleziaste 4:6.