DZIKO YADZALA NA NYATWA

1 | Tsalakanani Mwadidi Ungumi Wanu

THANGWI YANJI MPHYAKUFUNIKA

Nyatwa zinango peno pidengwa pyacibaliro pinakwanisa kukhuya ungumi wathu munjira zakusiyana-siyana.

Pinthu pyakuipa pingacitika anthu asakhala akudzudzumika, mbwenye ale anadzudzumika mu ndzidzi uzinji kazinji kene asaphatwa na utenda.
Pangaoneka muliri wa matenda, nyumba za ungumi zisacimwana kutsalakana mwadidi anthu, thangwi asafunika kutsalakana anthu azinji mu ndzidzi ubodzi ene, pontho mitombwe isacepa.
Pidengwa pisathimizira utcerengi, na thangwi ineyi anthu asacimwana kukhala na kobiri toera kugula pinthu pyakufunika ninga cakudya na mitombwe.

Pinthu Pinafunika Imwe Kudziwa

Kubva kupha kakamwe na kutsukwala kunakwanisa kukhuya njira yanu yakunyerezera, mbamusiya kucita pinthu pyakuti pinaphedza ungumi wanu. Pyenepi pinacitisa kuti utenda wanu uthimizirike.
Mungasiya kutsalakana utenda uli na imwe, iwo unatekera mbamuluza umaso wanu.
Mungakhala na ungumi wadidi, munakwanisa kucita pisankhulo pyadidi mu ndzidzi wa nyatwa.
Mwakukhonda tsalakana khala ndimwe wakupfuma peno ntcerengi, pana pinthu pinafunika imwe kucita toera kutsalakana ungumi wanu.

Pinafunika Imwe Kucita Cincino

Midzidzi inango, munthu wandzeru asadziwa pinthu pyakuipa pinafuna kucitika, pontho asawangisira toera kupicalira. Pyenepi pisacitikambo na ungumi wathu. Kazinji kene imwe munakwanisa kucalira utenda peno kuphedzera toera ukhonde kumwazika kakamwe mungakhala aucesa. Kukhala na ungumi wadidi ndi kwadidi kupiringana kumwa mitombwe.

“Tingawangisira toera kukhala aucesa mbatitsalakana mwadidi panyumba pathu, nee tinaphatisira kobiri izinji toera kuenda kunyumba ya ungumi na kugula mitombwe.”—Andreas.a

a Madzina anango acinjwa mu revista ino.

MUNACITANJI? — Maonero Akuti Anakuphedzani

Mu ndzidzi wa nyatwa, citani pinthu ipi toera kutsidzikiza ungumi wanu

KHALANI AUCESA

Khalani aucesa

Bhibhlya isalonga: “Munthu wandzeru angaona cinthu cakugopswa, asabisala.” (Misangani 22:3) Wangisirani toera kudziwa pinthu pyakuti pinaikha pangozwi ungumi wanu mbamupicalira.

Sambani manja kazinji kene na sabau, makamaka mbamudzati kuphata cakudya na mungabuluka ku cimbuzi.
Ndzidzi onsene cenesani n’nyumba mwanu, ikhani ntombwe wakuti unapha nthata na pirombo pinango, pontho pukutani pinthu pyakuti pisaphatwa kazinji kene.
Pingakwanisika, calirani kukhala dhuzi kakamwe na anthu akuti ali na utenda wakuthapulisana.

DYANI PYAKUDYA PYAKUPASA UNGUMI WADIDI

Dyani pyakudya pyakupasa ungumi wadidi

Bhibhlya isalonga: “Nkhabepo munthu anaida manungo ace, mbwenye iye asaadyesa mbaatsalakana mwadidi.” (Aefesi 5:29) Tinapangiza kuti tisafuna manungo athu tingaonesesa mwadidi pinthu pinadya ife.

Mwani madzi mazinji.
Dyani misapo yakusiyana-siyana, pontho dyani masamba.
Lekani kudya kakamwe pinthu pya mafuta, munyu uzinji peno xuka izinji.
Lekani kuphatisira fodya, mitombwe yakuledzeresa peno kumwa kakamwe pyakumwa pyakuledzeresa.

“Toera kucalira kubva kupha, tisawangisira kudya pyakudya pyakupasa ungumi wadidi. Tingakhonda kucita pyenepi, tinaphatisira kobiri yakucepa iri na ife toera kugula mitombwe. Tisaona kuti mphyadidi kuphatisira kobiri iri na ife toera kugula pyakudya pyakupasa ungumi wadidi.”—Carlos.

**CITANI MASENDZEKERO AKUWANGISA MANUNGO (EXERCÍCIOS), PONTHO PUMANI MWADIDI**

Citani masendzekero akuwangisa manungo (exercícios)

Bhibhlya isalonga: “Mphyadidi kupuma pang’ono kupiringana kuphata basa mwakuwanga kakamwe, thangwi pyenepi ndi ninga kuthamangira mphepo.” (Ekleziaste 4:6) Ndimomwene kuti tisafunika kuphata basa, mbwenye tisafunikambo kupuma.

Citani masendzekero akuwangisa manungo. Munakwanisa kutoma na kufamba, citani pyenepi mwakubwereza-bwereza. Kucita masendzekero anawangisa manungo kunakuphedzani toera kukhala na ungumi wadidi mwakukhonda tsalakana khala ndimwe wakugwesera, wakulamala peno muli na utenda wakukhonda wanga.
Pumani mwadidi

Gonani mwakukwana. Mungakhonda kugona mwakukwana, kudzudzumika kwanu kunathimizirika, pontho manyerezero anu nee anakhala pa mbuto. Pyenepi pingacitika mu ndzidzi uzinji ungumi wanu nee unakhala mwadidi.
Khazikisani ndzidzi wakugona, pontho ungafika ndzidzi unoyu musafunikadi kugona. Musafunika kuwangisira toera kugona na kulamuka mu ndzidzi ubodzi ene ntsiku zonsene.
Calirani kuona televizau, kuphatisira ntokodzi peno ntcini wandzeru pakufuna kuenda kagona.
Calirani kudya kakamwe, kumwa kafe peno pyakumwa pyakuledzeresa mbamudzati kuenda kagona.

“Ndisaona kuti kugona kusakhuya makhundu onsene a ungumi wanga. Ndingakhonda kugona mwadidi, midzidzi inango nsolo wanga usandipha, pontho manungo anga asandipha. Mbwenye ndingagona mwadidi, ndisakhala na mphambvu toera kucita pyonsene pinafuna ine! Ndisakhala na mphambvu kakamwe, pontho nee ndisabva kupha kazinji kene.”—Justin.