Rahabi Abisa Azondi

AMUNA awa ali m’nyatwa. Iwo asafunika kuthawa, akakhonda anadzaphiwa. Iwo ndiwo azondi Aisrayeli, na nkazi anaaphedza ndi Rahabi. Rahabi asakhala m’nyumba padzulu pa ngome ya nzinda wa Yeriko. Tendeni tione thangwi yanji amuna awa ali m’nyatwa.

Aisrayeli akhali dzololo kuti awambuke Nkulo wa Yoridani kuti apite m’dziko ya Kanani. Mbwenye mbasati kuwambuka, Yobzwa atuma azondi awiri awa. Iye aapanga: ‘Kaoneni dziko na nzinda wa Yeriko.’

Mudapita azondi m’Yeriko, iwo aenda kunyumba ya Rahabi. Mbwenye munthu unango apanga mambo wa Yeriko: ‘Aisrayeli awiri apita muno masiku alero kudzakazonda dziko.’ Mudabva iye pyenepi, mambo atuma amuna kuna Rahabi, mbankakamiza: ‘Amuna ali na iwe m’nyumba mwako, abuluse kunja!’ Mbwenye Rahabi akhadabisa azondi m’ntsoi mwace. Natenepa iye alonga: ‘Amuna angasi abweradi panyumba panga, mbwenye ine nkhabe dziwa kudabuluka iwo. Iwo aenda mudatoma kwene dzuwa kudoka, misuwo mikulu ya nzinda mbisatifungwa. Mukacimbiza, munakwanisa kuaphata!’ Natenepa amuna aenda kaathamangira.

Mudamala iwo kubuluka, Rahabi aenda mwakucimbiza ku ntsoi. Iye apanga azondi: ‘Ndisapidziwa kuti Yahova anadzakupasani dziko ino. Tabva maumisiro ace Bara Yakufuwira mudabuluka imwe ku Ijitu, na njira idaphera imwe amambo a Sihoni na Ogi. Ine ndacita udidi kwa imwe, natenepa, ndaphata mwendo, ndipikireni kuti munadzacita udidi kwa ine. Pulumusani baba na mama wanga, na anamunanga na abale anga akazi.’

Azondi apikira kuti mbadadzacita pyenepi, mbwenye Rahabi akhafunika kucita cinthu. Azondi alonga: ‘Kwata nkhambala iyi yakufuwira uimange pa janela yako, ugumanyize acibale ako onsene m’nyumba mwako. Tikabwerera tonsene kudzakunda Yeriko, tinadzaona nkhambala iyi pa janela yako mbitikhonda kupha nee mbodzi m’nyumba mwako.’ Mudabwerera azondi kuna Yobzwa, iwo ampanga pyonsene pidacitika.