Dzuwa Yalimira

YANG’ANANI Yobzwa. Iye akulonga: ‘Dzuwa, limira!’ Na dzuwa yalimiradi. Yalimira pakati pene pa thambo ntsiku yamumphu. Yahova apicitisa! Mbwenye tendeni tione thangwi yanji Yobzwa akhafuna kuti dzuwa ipitirize na kugaka.

Mudatoma amambo axanu akuipa m’dziko ya Kanani kucita nkhondo na Agibeoni, Agibeoni atuma mamuna mbodzi kuti akaphembe ciphedzo kwa Yobzwa. Iye alonga: ‘Bwerani mwakucimbiza kuna ife! Tipulumuseni! Amambo onsene a ku cisa ca nthunda abwera kudzacita nkhondo na anzakazi anu.’

M’nzidzi uneule ene Yobzwa na amunace onsene a nkhondo aenda. Iwo afamba masiku onsene. Mudafika iwo ku Gibeoni, anyankhondo a amambo axanu agopa mbatoma kuthawa. Buluka penepo Yahova acitisa matalala makulu kugwa kubuluka kudzulu, na anyankhondo azinji afa m’kuphekeswa na matalala kupiringana adaphiwa na amuna ankhondo a Yobzwa.

Yobzwa aona kuti mwakukhonda dembuka dzuwa mbidadzabira. Mbukudadzadoka, na anyankhondo azinji a amambo axanu akuipa mbadadzathawa. Natenepa, iyi ndiyo thangwi idacitisa Yobzwa kuphembera kwa Yahova mbalonga: ‘Dzuwa, limira!’ Mukapitiriza dzuwa na kugaka, Aisrayeli akwanisa kumalisa kuwina nkhondo.

M’Kanani mukhali na amambo anango azinji akuipa akuti akhaida mbumba ya Mulungu. Pyenepi pyacitisa Yobzwa na anyankhondo ace kukwata cifupi na piaka pitanthatu kuti akunde amambo 31 a m’dziko. Pakumala kucita pyenepi, Yobzwa atsalakana kuti dziko ya Kanani igawirwe madzinza akhadasowa gawo.

Papita piaka pizinji, pakumalisira, Yobzwa afa na piaka 110 pyakubalwa. Mukakhala iye na axamwali ace maso, mbumba ikhabvera Yahova. Mbwenye mudafa amuna anewa adidi, mbumba yatoma kucita pyakuipa mbipita m’nyatwa. Penepa ndipo pakhafuneodi ciphedzo ca Mulungu.