Yezu Abwera Ninga Mambo

M’NZIDZI wakucepa pakumala kuwangisa anyakuphemba awiri amaboliboli, Yezu aenda ku mudzi ung’ono duzi na Yerusalemu. Iye apanga awiri a anyakupfunzace: ‘Ndokoni ku mudzi na munadzagumana mwana buru. Nsudzuleni mbumundibweresera.’

Mudabwereswa buru kwa iye, Yezu akwira padzulu payo. Buluka penepo iye aenda ku Yerusalemu wakuti akhali cifupi. Mudafika iye duzi na nzinda, mwinji ukulu wa anthu wabuluka kudzagumanikana na iye. Azinji a iwo abulusa makapoti awo mbaathasika pa nseu. Anango agwanda matsanzo a micindu. Iwo aathasikambo pa nseu, mbakhuwa: ‘Mulungu apase nkhombo mambo anadza m’dzina ya Yahova!’

Kalene m’Israyeli amambo apswa akhakwira mwana buru mbafamba m’Yerusalemu towera kupionesa kwa mbumba. Pyenepi ndipyo pidacita Yezu. Na anthu awa akhapangiza kuti iwo akhafuna Yezu towera akhale mambo wawo. Mbwenye si anthu onsene akhamfuna tayu. Tingakwanise kuona pyenepi na pidacitika mudaenda iye ku templo.

Ku templo Yezu awangisa anthu akhali maboliboli na anyakulamala. Mudaona ana ang’ono pyenepi, iwo akuza Yezu mwakukhuwa. Mbwenye pyenepi pyacitisa anyantsembe kuipirwa, na iwo apanga Yezu: ‘Kodi musabva pinalonga ana awa?’

Yezu atawira: ‘Inde, ndikupibva. Kodi cipo mwaleri m’Bibilya panalonga iyo: “Mulungu anadzabweresa kukuza kubulukira ku milomo ya anapiana?”’ Natenepa ana apitiriza na kukuza mambo wa Mulungu.

Tisafuna kukhala ninga ana aneale, kodi si tenepa? Anthu anango angayesere kutilimirisa kulonga pya umambo wa Mulungu. Mbwenye tinadzapitirizadi na kupanga anango pinthu pyakudzumatirisa pinafuna kudzacitira Yezu anthu.

Nee ukhali nzidzi wakuti Yezu atome kutonga ninga mambo mukakhala iye pa dziko yapantsi. Kodi nzidzi unoyu unadzafika lini? Anyakupfunza a Yezu akhafuna kudziwa. Tinadzaleri pyenepi patsogolo apa.