Yezu M’munda

PAKUMALA buluka m’kwartu yapadzulu, Yezu na apostolo ace aenda ku munda wa Getsemani. Iwo akhadaenda kweko maulendo azinji. Mphapo Yezu aapanga kuti apitirize na kukhala maso na kuphembera. Buluka penepo iye afamba nsinzo wakucepa, mbakotamisa nkhope yace pantsi mbaphembera.

Patsogolo pace Yezu abwerera kukakhala apostolo ace. Kodi mukunyerezera kuti iwo akhacitanji? Akhagona! M’maulendo matatu Yezu aapanga kuti iwo akhafunika kupitiriza kukhala maso, mbwenye ulendo ubodzi na ubodzi ukabwerera iye akhaagumana mbakagona. Mudabwerera Yezu paulendo wakumalisa iye alonga: ‘Kodi musakwanisa tani kugona m’nzidzi ninga uno? Wafika nzidzi wakuti ine ndiperekwe kwa anyamalwa anga.’

M’nzidzi uneule ene dzumbi ya mwinji ukulu ikhakwanisa kubveka. Yang’anani! Amuna abwera na masupada na pigomba! Na iwo akwata pyakumwanikira towera piapase ceza. Mudafika iwo duzi kakamwe, munthu unango abuluka m’mwinji mbaenderatu kwa Yezu. Iye ampswompswona Yezu, ninga mungakwanise kuona pano. Mamuna unoyu ndi Yudasi Iskarioti! Thangwi yanji iye ampswompswona Yezu?

Yezu abvunza: ‘Yudasi, kodi iwe ukundisandukira na mpswompswono?’ Inde, mpswompswono ukhali cidzindikiro. Iwo wacitisa amuna akakhala na Yudasi kudziwa kuti unoyu akhali Yezu, mamuna akhafuna iwo. Natenepa anyamalwa a Yezu aenda kutsogolo towera akamphate. Mbwenye Pedru nee mbadaasiya kukwata Yezu mwakukhonda kucita nkhondo. Iye abulusa supada ikhadabweresa iye mbapomokera mamuna akhali cifupi na iye. Supada yakhwica nsolo wa mamuna mbigwanda khutu yace ya nkono wamadyo. Mbwenye Yezu agwentsa khutu ya mamuna mbaiwangisa.

Yezu apanga Pedru: ‘Bweza supada yako mbuto mwayo. Kodi iwe nkhabe nyerezera kuti ndingakwanise kuphemba Babanga pikwi pya maanju towera andipulumuse?’ Inde, iye mbadakwanisa! Mbwenye Yezu hadaphemba Mulungu kuti atumize nee anju mbodzi ene, thangwi akhadziwa kuti ukhadafika nzidzi towera anyamalwa ace amphate. Natenepa iye aasiya kuti ankwate. Mphapo tendeni tione pidacitikira Yezu.