Paradizu Ipswa Pa Dziko Yapantsi

YANG’ANANI miti iyi yakulapha, maluwa akubalika na mapiri akulapha. Kodi si pakubalika pano tayu? Onani kuti mbawala ali kudya tani m’manja mwa kamphale. Na yang’anani makavalu dzololo na zinkhalamu m’thongwe mule. Kodi imwe nkhabe funa kukhala m’nyumba yakukhala pa mbuto ninga ino?

Mulungu asafuna kuti mukhale maso kwenda na kwenda pa dziko yapantsi m’paradizu. Na iye nkhabe funa kuti mubve kupha na kubodzi kwene na kuduwala kunanensa anthu lero. Ipi ndipyo pinapikira Bibilya kwa ale anafuna kudzakhala maso m’paradizu ipswa: ‘Mulungu anadzakhala na iwo. Nkhabe dzakhalapobve kufa peno kulira peno kubva kupha. Pinthu pyakale pyamala.’

Yezu anadzatsalakana kuti kucinja kweneku kwakudzumatirisa kucitike. Kodi musadziwa kuti kunacitika lini? Inde, akamala kucenesa dziko yapantsi ku uipi onsene na anthu akuipa. Kumbukani kuti mukakhala Yezu pa dziko yapantsi iye awangisa anthu ku ntundu wonsene wa utenda, na alamusambo anthu kwa akufa. Yezu acita ipi towera kupangiza pinafuna kudzacita iye pa dziko yonsene yapantsi mudakhala iye Mambo wa umambo wa Mulungu.

Nyerezerani basi kuti pinadzakhala pyakudzumatirisa tani m’paradizu ipswa pa dziko yapantsi! Yezu, pabodzi na angasi adasankhula iye, anadzatonga kudzulu. Atongi anewa anadzatsalakana mbodzi na mbodzi pa dziko yapantsi na kuaonera kuti akhale akutsanzaya. Tendeni tione pinafunika ife kucita towera tikhale na cinyindiro cakuti Mulungu anadzatipasa umaso okhonda mala m’paradizu yace ipswa.