Pali Cidikhiriro Canji Kuli Anthu Ofunika Akufa?

“Angafa munthu, mphapo anadzakhala pontho m’maso?”, abvundza Yobi m’ndzidzi wakale wa ndulimu. (Yobe 14:14, Almeida) Panango mwabvundzambo kale pyenepi. Mbamudabva tani mbapidakhala mwadziwa kuti ndi pyakukwanitsika kuonana pontho na anthu ofunika aanu, pano pene padziko yapantsi, pantsi pa makhaliro adidi kakamwe?

Mphapo, Bibilya yapikira: “Akufa aako anadzakhala m’maso . . . iwo analamusiwa.” Bibilya itsalonga pontho: “Akulungama anadzatambira dziko yapantsi mbakhalamo kwenda na kwenda.”​—Izaiya 26:19; Masalmo 37:29.

Towera tikhale na kukhulupira kwa kakamwe m’mapikiro anewa, tisafunika kudziwa matawiriro a mibvundzo yakuzika yakuti: Thangwi yanji anthu asafa? Akufa ali kupi? Natenepa tinadziwambo tani kuti anadzakhala pontho m’maso?

Kufa, na Pinacitika Tingafa

Bibilya isabvekesa pyadidi maninge kuti pakutoma Mulungu hakafuna tayu kuti anthu afe. Iye acita banja yakutoma ya anthu, Adamu na Yeva, mbaayikha m’paradizu ya padziko yapantsi ya kucemerwa Yedeni, natenepa mbaapfundzisa kuti abale ana na kukulitsa nyumba yawo ya paradizu mpaka m’dziko yonsene yapantsi. Iwo mbadafa basi ngati akhonda bvera uphungu wa Mulungu.​—Genesi 1:28; 2:15-17.

Pakusowa kupereka takhuta kwa udidi wa Mulungu, Adamu na Yeva makamaka, natenepa acititsa kuti alipe nyatwa idalembiwa kale pakutoma. “[Udzabwerera] kumataka”, alonga Mulungu kuli Adamu, “kwaipyo waumbiwa kweneko. Thangwi ndiwe pfumbi natenepa ku pfumbi unadzakabwererako”. (Genesi 3:19) Mbazati kucitwa, Adamu akhale nkhabeko; akhale pfumbi. Natenepa, na thangwi ya kukhonda bvera kwace, peno madawo, Adamu atongwa kubwerera ku pfumbi, ku makhaliro a nkhabeko.

Mwatenepa, kufa ndi kukhonda khalapo kwa umaso. Bibilya isaonetsa kusiyana kwace: “Thangwi muwoni unapapswa ife na madawo, nkhufa basi, mbwenye muwoni unatipasa Mulungu ndi umaso wakukhala na kukhala.” (Aroma 6:23) Pakuonetsa kuti kufa ndi makhaliro a kukhonda kudziwa cinthu, Bibilya isati: “Thangwi ali m’maso asadziwa kuti anadzafa; mbwenye, akufa nkhabe kudziwa pinthu tayu.” (Koelete 9:5) Pakufa munthu, Bibilya isati: “Nzimu wace usabuluka, iye mbabwerera ku pfumbi kwace; ntsiku ineyo manyeredzero ace asataika.”​—Masalmo 146:3, 4.

Mbwenye, na thangwi ya kuti ndi Adamu na Yeva basi adakhonda bvera matongero m’Yedeni, ndi thangwi yanji ife tonsene tisafa? Ndi thangwi yakuti tonsene tabalwa Adamu mbadaleka kale kubvera, natenepa ife tonsene tatambira kwa iye unthaka wa madawo na kufa. Ninga Bibilya isafokotoza kuti: “Madawo apita pantsi pano thangwi ya munthu mbodzi ene [Adamu], madawo abwera pabodzi na kufa, natenepa anthu onsene aphatwa na mphambvu za kufa, thangwi onsene adawa.”​—Aroma 5:12; Yobe 14:4.

Mbwenye, panango munthu unango angabvunze tenepa: ‘Anthu nkhabe tayu moyo okhonda kufa unasala maso pa kufa?’ Adzinji asapfundzitsa pyenepi, mbalongambo kwene kuti kufa ndi kupita ku umaso unango. Mbwenye, nyeredzero ineyi hidabulukira ku Bibilya tayu. Mbuto mwa pyenepi, Mafala a Mulungu asapfundzitsa kuti imwe ndimwe moyowo, kuti moyo wanu ndimweene, na mphambvu zanu zonsene za ku thupi na za maganizo. (Genesi 2:7; Yeremiya 2:34; Misangani 2:10) Pontho, Bibilya isati: “Moyo wa kudawa​—ndiwo unadzafa.” (Ezekyele 18:4) Nkhabepo m’Bibilya panapfundzisa kuti munthu ali na moyo okhonda kufa unasala maso pakufa kwa thupi.

Anthu Anadzakhala Tani Pontho m’Maso

Nduli mwa kuti kudawa na kufa kwapita m’dziko, Mulungu afokotoza kuti cifuniro cace cikhale ca kuti akufa abwerere kukhala m’maso, kubulukira mwa kulamuka muli akufa. Natenepa, Bibilya isati: “Abaramu . . . adzindikira kuti Mulungu anakwanisa kumulamutsa [mwana wace Isake] mpaka kubulukira mwa akufa.” (Ahebere 11:17-19) Kunyindira kwa Abaramu si kwapapezi pene tayu, tangwi pya wa Mphambvu-yonsene Bibilya isati: “Iye si Mulungu wa akufa tayu, mbwenye wa amaso, thangwi, kuli iye, anthu onsene ali amaso.”​—Luka 20:37, 38.

Inde, Mulungu wa Mphambvu-yonsene si basi tayu ali ndi mphambvu mbwenye pontho na cifuno ca kulamusa anthu muli akufa akusankhulwa na iye. Iyenemaka Yezu Kristu ati: “Lekani kudzuma napyo tayu, thangwi ndzidzi uli kudza wakuti onsene ali nthumbi za cikumbukiro anadzabva fala yace mbazabuluka.”​—Jwau 5:28, 29; Machitiro 24:15.

Si nduli maninge tayu mbadamala longa pyenepi, Yezu agumana na nsoka wa akuperekera ntembo akhabuluka ku nzinda wa ciisrayeli wa Nayimu. Ntembuyo akhale mphale mbodzi yekha wa nkazi wanzice. Pakuona kutsukwala kwace kukulu, Yezu abva ntsisi. Natenepa, mbalonga kuli cithumbi, iye atonga kuti: “Mphale, ndisakupanga: Lamuka!” Natenepa mphaleyo akhala pantsi, natenepa Yezu ampereka kwa mai wace.​—Luka 7:11-17.

Sawasawa ninga pya mkazi wanzice unoyu, pakhalambo kukomerwa kukulu maningue pakulonjera Yezu nyumba ya Yairo, nkulu wa sinagoga wa ayuda. Mwanace wa ntsikana wa pyaka 12 akhadafa. Mbwenye, Yezu pidafikee ku nyumba ya Yairo, afendezera kuli mwana wakufayo mbati: “Ntsikana, lamuka!” Natenepa iye alamuka!​—Luka 8:40-56.

Patsogolo pace, Lazaru, xamwali wa Yezu, afa. Pakufika Yezu ku nyumba kwace, Lazaru akhali wakufa kwa ntsiku zinai. Mwakukhonda kutsalakana kutsukwala pikulupene, mbale ace wa nkazi Marita aonetsa kukhulupira, mbati: “Ndisadziwa kuti iye anadzalamuka pa kulamuka muli akufa, m’ntsiku yakumalitsa.” Mbwenye, Yezu ayenda mpaka ku nthumbi, mbatuma kuti abulutse mwala, natenepa acemera kuti: “Lazaru, bwera kunja!” Natenepa iye abwera!​—Jwau 11:11-44.

Cincino, nyeredzerani tenepa: Makhaliro a Lazaru akhali anji m’nsiku zinai zenezo zikakhalee wakufa? Lazaru hadalonga pinthu tayu thangwi yakukhala kudzulu na kutsanzairwa peno mu infernu ya nyatwa, pyakuti iye mbadapicitadi, mbipidati kuti iye akhali m’mbuto ninga zenezi. Inde, Lazaru akhali wokhonda dziwa cinthu m’kufa, natenepa mbadapitirira kukhala tenepa mpaka “pa kulamuka muli akufa, m’ntsiku yakumalitsa”, sale Yezu kum’bweretsa pontho ku umaso.

Ndimomwene kuti pirengo pyenepi pya Yezu pyabweretsa phindu ya ndzidzi pang’ono basi, na thangwi ya kuti ale akhadalamusee afa pina. Mbwenye, pyaka 1.900 nduli iye aonetsa pakweca kuti, na mphambvu ya Mulungu, akufa anabwerera pontho kukhala amaso! Mwatenepa, kubulukira mwa pirengo pyace, Yezu aonetsa pa n’dida ung’ono pinafuna zakhalapo pa dziko yapantsi pakutonga kwa Ufumu wa Mulungu.

Pakufa Munthu Wakufunika

Pakubulukira nyamalwa kufa, kutsukwala kwanu kunakhala kukulu, panango peno musatawira kulamuka muli akufa. Abaramu akhale na matawiriro a kuti nkazace anadzabwerera kukhala maso, mbwenye, tisaona malemba kuti “Abaramu apita ku ciriro ca Sara towera kamulira”. (Genesi 23:2) Natenepa tani pakulonga za Yezu? Pakufa Lazaru, iye “abuza m’nzimu mbatsukwala”, buluka penepo “alira”. (Jwau 11:33, 35) Natenepa, pakufa munthu anafunefe, kulira sikupolola tayu.

Pakufa mwana, pisapasa nyatwa makamaka kuna mai. Natenepa, Bibilya isadzindikira kuwawa kukulu mai anakhala nako. (2 Amambo 4:27) Ndimomwene kuti, mpyakunentsa pontho kuna baba wakuferwa. “Hoo! kuti ine, inepano, mbandidafa m’mbuto mwako”, akhuwa Mfumu Davidi pidafa mwanace Abisalomu.​—2 Samwele 18:33.

Mbwenye, na thangwi yakuti musakhulupira kulamuka muli akufa, kutsukwala kwanu nkhabe dzakhala kwa kusowa migano. Ninga Bibilya isalonga, imwe ‘nkhabe dzatsukwala ninga enango akusowa cidikhiriro’. (1 Atesalonika 4:13) Mwa kusiyana, imwe m’nafikira Mulungu m’phembero, natenepa Bibilya yapikira kuti “iye ene adzakukumba”.​—Masalmo 55:22.

Kusiapo ngati pali cidzindikiro cinango, mafala onsene a Bibilya adathulwa muno mbakubulukira mu Traduc̗ão do Novo Mundo das Escrituras Sagradas​—Com Referências.