Anthu Angafa Asaenda Kumbuto Inango Ninga Mizimu?
nthu azinji asanyerezera kuti munthu angafa asaenda kudzulu peno ku mbuto inango, mbwenye unoyu nee ndi undimomwene. Tisadziwa tani pyenepi? Tisadziwa pyenepi kubulukira m’Bhibhlya. Iyo isalonga kuti Yahova Mulungu ndiye adacita anthu, pontho iye asadziwa mwadidi pinacitika munthu angafa.—Masalmo 83:18; 2 Timoti 3:16.
Adhamu abuluka ku pfumbi, abwerera ku pfumbi
Adhamu abuluka ku pfumbi, abwerera ku pfumbi
Bhibhlya isalonga kuti Mulungu acita Adhamu, mamuna wakutoma, ‘kubulukira ku pfumbi ya mataka,’ mbamuikha m’munda wa Edheni. (Genesi 2:7) Adhamu mbadabvera mwambo wa Yahova, mbadafa tayu; iye mbadapitiriza kukhala maso pa dziko yapantsi mpaka lero. Mbwenye pidakhonda iye kubvera mwambo unoyu, Mulungu ampanga: ‘Unadzabwerera ku mataka, thangwi wabuluka ku mataka. Iwe ndiwe pfumbi, pontho unadzabwerera ku pfumbi.’—Genesi 3:19.
Pyenepi pisabvekanji? Kodi Adhamu akhali kupi Yahova mbadzati kuncita kubulukira ku pfumbi? Iye nee akhalipo. Pontho iye nee akhali kudzulu ninga nzimu. Natenepa, pidalonga Yahova kuti Adhamu ‘mbadadzabwerera ku mataka,’ iye akhalonga kuti Adhamu mbadafa. Pidafa iye nee aenda ku mbuto ya mizimu, pontho nee apitiriza kukala maso ku mbuto inango.
Pyenepi pisabveka kuti anthu anango adafa nee alipobve? Bhibhlya isalonga:
‘Anthu na pinyama pisaenda mbuto ibodzi ene; pyonsene pyabuluka ku mataka, mbapibwerera ku mataka.’—Koelete 3:20.
‘Anyakufa nkhabe dziwa cinthu.’—Koelete 9:5.
‘Ufuni wawo, bibvu na ntcanje yawo, pyonsene pyamala.’—Koelete 9:6.
‘Kumasiye kunaenda iwe, nkhabeko basa, nee udziwisi nee ndzeru.’—Koelete 9:10.
‘Munthu angafa asabwerera ku mataka; pa ntsiku ineyi manyerezero ace onsene asamala.’—Masalmo 146:4.
Basi ene anthu ali maso anakwanisa kucita pinthu pyenepi
Basi ene anthu ali maso anakwanisa kucita pinthu pyenepi
Toera kubvesesa mwadidi malemba anewa, nyerezerani ipi: Mabanja mazinji, mamuna asasaka kobiri toera kutsalakana banja yace, natenepa mamuna angafa, kazinji kene banja isanentseka kakamwe. Midzidzi inango nkazace na anapiana asasowa kobiri toera kugula pyakudya. Panango iwo asathabuswa na anyamalwa a mamuna unoyu. Cincino bvundzikani: ‘Mbidakhala kuti mamuna unoyu ali maso ku mbuto ya mizimu, thangwi yanji iye nkhabe kupitiriza kutsalakana banja yace? Thangwi yanji iye nkhabe tsidzikiza banja yace?’ Pyenepi pisapangiza kuti Bhibhlya isalonga undimomwene. Mamuna unoyu nee ali maso, iye nkhabe kwanisa kucita cinthu.—Masalmo 115:17.
Anyakufa nkhabe kwanisa kutipasa cakudya peno kutitsidzikiza
Anyakufa nkhabe kwanisa kutipasa cakudya peno kutitsidzikiza
Pyenepi pisabveka kuti anyakufa nkhabe kudzakhala pontho maso? Nkhabe. Mu misolo inatowera tinadzalonga pya kulamuswa muli akufa. Pyenepi pisabveka kuti anyakufa nkhabe dziwa pinacita imwe. Iwo nkhabe kwanisa kukuonani, kukubvani peno kulonga na imwe. Imwe nee musafunika kuagopa. Iwo nkhabe kwanisa kukuphedzani, pontho nkhabe kwanisa kukucitani pyakuipa.—Koelete 9:4; Izaiya 26:14.