Madimonyo Asalonga Kuti Anyakufa Ali Maso

Bhibhlya isalonga kuti Sathani “asanyengeza dziko yonsene yapantsi.” (Apokalipse 12:9) Sathani na madimonyo ace nee asafuna kuti tikhulupire Mafala a Mulungu, Bhibhlya. Iwo asayesera kucitisa anthu kukhulupira kuti anyakufa ali maso ku mbuto ya mizimu. Tendeni tione kuti asacita tani pyenepi.

Uphemberi Wauthambi

Mauphemberi azinji asapfundzisa kuti anthu onsene ali na nzimu wakuti usaenda ku mbuto yauzimu manungo angafa. Iwo asalonga kuti manungo asafa mbwenye nzimu nkhabe kufa.

Mbwenye Mafala a Mulungu nkhabe pfundzisa pyenepi. Bhibhlya nee isalonga kuti munthu ali na cinthu m’manungo mwace cakuti angafa cisaenda ku mbuto ya mizimu. Mwacitsandzo, thangwi yakucitwa kwa Adhamu Bhibhlya isalonga: ‘Yahova Mulungu acita munthu kubulukira ku pfumbi ya mataka, mbapepesa mphuno mwace muya waumaso, natenepa iye adzakhala munthu waumaso.’ (Genesi 2:7) Pyenepi pisapangiza kuti Mulungu nee aikha cinthu m’manungo mwa Adhamu cakuti mbacidapitririza kukhala maso angafa.

Onani pinalonga Bhibhlya thangwi ya umaso:

‘Pinyama pyonsene piri na umaso.’—Genesi 1:20, 21, 24, 30.

• ‘Mwanaciro umaso ndine, wa ababa na wa ana ene. Umaso unadawa ndiwo unafuna kufa.’—Ezekyele 18:4.

• ‘Sansoni alonga: Siyani umaso wanga ufe pabodzi na Afilisti.’—Atongi 16:30.

• “Kodi pisatawiriswa na mwambo pa ntsiku ya Sabudu kucita cinthu cadidi peno cakuipa, kupulumusa umaso peno kuupha?”—Marko 3:4.

Malemba anango asapangiza kuti umaso unakwaniswa kufudzwa (Genesi 17:14), kuphiwa na supada (Yoswa 10:37), kupheka okha (Yobe 7:15) na kulobzweka (Yona 2:5). Natenepa, umaso usafa.

Mungaleri Bhibhlya yonsene, nee munagumana mafala akuti “umaso nee usafa.” Umaso wa munthu nee ndi nzimu. Cipfundziso cakuti umaso nkhabe kufa nee ndi ca m’Bhibhlya. Anapfundzisa pyenepi ndi Sathani na madimonyo ace. Yahova asaipirwa na uthambi unoyu unapfundzisa mauphemberi.—Misangani 6:16-19; 1 Timoti 4:1, 2.

Anthu Analonga na Mizimu

Sathani asaphatisirambo anthu analonga na mizimu toera kupeusa anthu. Anthu asalonga kuti asatambira mphangwa kubulukira ku mizimu ya anyakufa. Azinji asakhulupira pyenepi. Mbwenye ninga taona pinalonga Bhibhlya, pyenepi ndi uthambi.—Koelete 9:5, 6, 10.

Kodi mphangwa zenezi zisabuluka kupi? Zisabuluka kuna madimonyo! Madimonyo asaona munthu mbali maso; munthu unoyu angafa, iwo asadziwa kuti munthu unoyu akhalonga tani, akhali tani, akhacitanji na akhadziwanji. Natenepa nkhabe nentsa kwa iwo kusangazira anyakufa.—1 Samwele 28:3-19.

Mphangwa za Uthambi

Sathani asamwazambo mphangwa zauthambi zinalonga thangwi ya anyakufa. Mphangwa zenezi zisacitisa anthu kukhonda kukhulupira undimomwene wa m’Bhibhlya.—2 Timoti 4:4.

Mu Afrika muli na mbiri za anthu azinji adaonekera kuna anthu pakumala kufa. Anthu anewa asaoniwa ku cisa cinango. Bvundzikani: ‘Mbapidakhala kuti munthu unoyu ali maso mbadaenda kakhala kutali na acibale ace na axamwali ace?’

Kodi anthu nee aona munthu wakulandana na adafa? Mwacitsanzo, mu dziko inango mamuna m’bodzi akhatowerera Akristu awiri akuti akamwaza mphangwa. Pidambvundza iwo, iye atawira kuti m’bodzi mwa Akristu anewa akhali m’bale wace wakuti akhadafa pyaka pingasi nduli. Mamuna akhakakamira mbapitiriza kulonga kuti ndi m’bale wace. Nyerezerani kuti mamuna unoyu alonganji pidafika iye kunyumba!

Pinaona Anthu, Ndoto na Mafala

Panango imwe mwabva kale munthu mbakalonga pinthu pyacilendo pidaona iye, kubva peno kulota. Kazinji kene pinthu pyenepi pisathusa anthu. Marein, anakhala ku Afrika wa Kumadokero a dzuwa, kazinji kene akhabva fala ya mbuyace wankazi adalowa mbikancemera namasiku. Thangwi yakugopa, Marein akhakhuwa, mbalamusa onsene n’nyumba. Pakumalisira, iye adzakhala nyansala.

Natenepa, khala anthu akufa ali masodi, kodi pisabveka kuti iwo mbadathusa acibale awo? Nkhabe. Mphangwa zenezi zisabuluka kuna madimonyo.

Mphapo ndiye tani pya mphangwa zinaoneka ninga zakuphedza na zakuwangisa? Mwacitsandzo, Gbassay, wa ku Sera Leoa, akhaduwala. Iye alota babace adafa mbafika pana iye. Babace ampanga kuti aende akakwate masamba a muti unango, aabvungaze na madzi mbamwa. Mbwenye akhafunika kucita pyenepi mbadzati kulonga na munthu. Iye acita pyenepi mbawanga.

Nkazi m’bodzi alonga kuti mamunace mbadamala kale kufa abwera namasiku kuna iye. Iye alonga kuti mamunace akhali mwadidi, pontho akhadabvala nguwo zakubalika.

Mphangwa na ndoto zenezi zisaoneka ninga zadidi na zakuphedza. Kodi mphangwa na ndoto zenezi zisabuluka kuna Mulungu? Nkhabe. Yahova ndi ‘Mulungu wa undimomwene.’ (Masalmo 31:5) Iye cipo anatinyengeza peno kutiphatisa mwala. Ndi madimonyo basi anacita pyenepi.

Kodi alipo madimonyo adidi? Nkhabe. Ngakhale kuti midzidzi inango asaoneka ninga asaphedza, mbwenye onsene ndi akuipa. Mu ndzidzi ukhalonga Dyabo na Eva, iye akhaoneka ninga xamwali. (Genesi 3:1) Mphapo ninji pidacitika pidabvera iye Sathani? Eva afa.

Kazinji kene munthu wakuipa angafuna kunyengeza ndzace peno kunkupwisa asaoneka ninga ndi wadidi. Nsangani wa ku Afrika usalonga: “Mano akucena, ntima wakupswipa.” Mafala a Mulungu asalonga: “Sathani asapitirizambo kusangizira kukhala ninga anju wa ceza.”—2 Akorinto 11:14.

Lero, Mulungu nee asalongabve na anthu pa dziko yapantsi mukuphatisira ndoto na masomphenya. Asatitsogolera na kutipfundzisa kubulukira m’Bhibhlya, yakuti isaphedza munthu toera akhale “wakukhunganyika mwadidi toera kucita mabasa adidi onsene.”—2 Timoti 3:17.

Yahova asatifuna kakamwe, ndi thangwi yace asaticenjeza ku misampha ya Dyabo. Iye asadziwa kuti madimonyo ndi anyamalwa akugopswa.