Madimonyo Nee Asafuna Kuti Tibvere Mulungu

Thangwi yanji Sathani na madimonyo asayesera anthu toera akhonde kubvera Mulungu? Thangwi iwo asafuna kuti tikhondembo kubvera Mulungu mbatilambira iwo. Asafuna kuti tikhulupire uthambi wawo mbaticita pinthu pinakhonda kufuna Yahova. Pinthu pinango pinafuna iwo kuti ticite ndi misambo inalonga thangwi ya anyakufa.

Munthu anafuna ife angafa, tisabva kupha muntima, pontho tisatsukwala kakamwe. Yezu ‘alira’ pidafa Lazaro.”—Juwau 11:35.

Pana misambo mizinji inakhulupira anthu thangwi ya anyakufa. Misambo inango nee isaphonyana na pinalonga Bhibhlya. Pana misambo inango inacita anthu thangwi asakhulupira kuti munthu angafa asapitiriza kukhala maso. Mwacitsandzo, anango asaphuphudza panyumba padafa munthu, kulira mwakusowa cidikhiro, pontho asacita pinthu pizinji kakamwe thangwi asagopa kutsukwalisa mizimu ya anyakufa. Nakuti anyakufa ‘nkhabe cinadziwa iwo,’ ale anacita misambo ineyi asatowezera uthambi wa Sathani.—Koelete 9:5.

Misambo inango isacitwa thangwi anthu asakhulupira kuti anyakufa asafuna ciphedzo ca anthu ali maso, thangwi angakhonda kuaphedza anathabuswa. M’madziko anango pangapita ntsiku 40 peno caka, munthu mbadamala kufa pasacitwa phwando na kupereka ntsembe. Iwo asanyerezera kuti kucita pyenepi kunaphedza munthu adafa toera ‘kuenda’ ku mbuto yauzimu. Anthu anango asapereka cakudya na pyakumwa kwa anyakufa.

Pinthu pyenepi mphyakuipa thangwi pisaphedzera kumwaza uthambi wa Sathani. Kodi Yahova mbadatawirisa kuti tikhulupire misambo inabuluka mu pipfundziso pya madimonyo? Nkhabe!—2 Akorinto 6:14-18.

Atumiki a Mulungu nkhabe cita khundu m’misambo inaphedzera uthambi wa Sathani. M’mbuto mwace, iwo asacita pyonsene pinakwanisa iwo toera kuphedza na kubalangaza ale ali maso. Iwo asadziwa kuti munthu angafa, ndi Yahova basi wakuti anakwanisa kumulamusa muli akufa.—Yobe 14:14, 15.

Mulungu Asaida Anakhulupira Mizimu

Anthu anango asalonga okhene na madimonyo peno asaphatisira anyakuombedza. Ufiti, kulotera pinafuna kucitika ntsogolo na kulonga na anyakufa, pyonsene pisacita khundu yakukhulupira mizimu.

Bhibhlya isakhondesa pinthu pyenepi. Iyo isalonga: ‘Mbaleke kuoneka pakati panu munthu m’bodzi wakulonga misanganiko, peno wakulotera, peno pyakulodza, pya ufiti, pyamizimu, peno wakulonga na anyakufa. Thangwi Yahova asaipirwa na ale anacita pinthu pyenepi.’—Deuteronomyo 18:10-12.

Thangwi yanji Yahova asatikhondesa kukhulupira mizimu?

Yahova asatikhondesa thangwi asatifuna. Iye asatitsalakana, pontho asadziwa kuti anthu anakhulupira mizimu asathabuka.

Mwacitsandzo, nkazi m’bodzi wa ku Brazil anacemerwa Nilda, akhalonga na madimonyo. Na thangwi ineyi madimonyo akhan’thabusa kakamwe. Iye alonga: “Mizimu . . . yandiphata, mbitoma kunditsogolera. Kazinji kene ndikhakomoka mbandikhala na utenda wa munsolo. Madimonyo anewa akhandithabusa kakamwe, pontho kazinji kene ndikhabva kupha. Ndamwa mitombwe yakupasa citulo, pontho ndatoma kumwa pyakumwa pyakuledzeresa na kufumali. Pyenepi pyacitika mu pyaka pizinji.”

Mukupita kwa ndzidzi, Nilda atoma kupfundza Bhibhlya na Mboni za Yahova akuti am’phedza toera asiye kulonga na madimonyo. Cincino iye ndi wakutsandzaya. Iye alonga: “Ndisapanga anthu onsene kuti akhonde kuyesera kulonga peno kupita ncibverano na mademonyo.”