Khundu 6
Thangwi Yanji Mulungu Asalekerera Nyatwa
1, 2. Kodi anyakubala athu akutoma aipisa tani matomero adidi adaapasa Mulungu?
KODI ndi ninji cidadodomeka? Kodi ndi ninji cidacitika towera kuipisa matomero adidi adapasa Mulungu anyakubala athu akutoma m’Paradizu wa Edeni? Thangwi yanji, mbuto mwa ntendere na cibverano m’Paradizu, kwaoneka uipi na nyatwa m’madzana a piaka?
2 Thangwi ndi yakuti Adamu na Eva aphatisira mwakuipa ufulu wawo wakusankhula. Iwo acimwana kudzindikira kuti iwo nee acitwa towera atongeke okhene mbasiya Mulungu na miyambo yace tayu. Iwo asankhula kutongeka okhene mbasiya Mulungu, mbanyerezera kuti pyenepi mbipidaabweresera udidi m’umaso wawo. Natenepa, iwo apiringana madire a ufulu wakusankhula adaikha Mulungu.—Genesi, kapitulu 3.
Nseru Wa Utongi Ukulu Wakudzulu Na Pantsi
3-5. Thangwi yanji Mulungu hadafudza tayu Adamu na Eva mbacita anthu anango?
3 Thangwi yanji Mulungu hadafudza Adamu na Eva mbacita anthu anango? Thangwi utongi wace ukulu wakudzulu na pantsi, wakuti ndi kuthema kwace kwa kutonga, wapokanywa.
4 Mbvunzo ukhali uyu: Kodi mbani adathema kutonga, na mbani ali na utongi wadidi? Kukhala kwace wamphambvu zonsene na Nciti wa pyakucitwa pyonsene kusacitisa Mulungu kuthema kupitonga. Nakuti iye ndi wanzeru zonsene, utongi wace ndi wadidi kwa pyakucitwa pyonsene. Mbwenye cincino utongi wa Mulungu wapokanywa. Pontho, kodi pakhali cinthu cakudodomeka na munthu adacita iye? Kutsogolo tinadzadinga kuti kupokanywa kwa umumphu wa anthu kwaphatanizwa tani.
5 Nakuti anthu asankhula kukhonda tongwa na Mulungu, pabuluka mbvunzo unango: Kodi anthu mbadapembera mbadakhonda kutongwa na Mulungu? Mwandimomwene Nciti akhadziwa ntawiro, mbwenye njira yakunyindirika yakucitisa anthu kuudziwa ikhali kuapasa ufulu wakusowa madire ukhafuna iwo. Iwo asankhula njira ineyi m’kuphatisira ufulu wawo wakusankhula, na Mulungu aalekerera.
6, 7. Thangwi yanji Mulungu apasa anthu ufulu wakusowa madire m’nzidzi wakuinjipa?
6 M’kupasa anthu nzidzi wakuinjipa towera kuyesera ufulu wakusowa madire, Mulungu mbadapangiziratu pakweca khala anthu mbadakwanisa kupembera pantsi pa utongi wa Mulungu peno pa utongi wawo ene. Nzidzi udapaswa iwo mbudakhala wakuinjipa towera kucitisa anthu kufika pa ciimiriro capadzulu cinacemera iwo kuti ndi uthambaruki wa ndale, mafabirika, siyensiya na ukonzi.
7 Natenepa, Mulungu alekerera anthu kuti atongeke mpaka ntsiku zathu towera kupangiza pakweca khala utongi wa anthu mbudapembera mwakusowa Mulungu. M’njira ineyi, anthu mbadakwanisa kusankhula pakati pa udidi na kuthabusana, pakati pa kufunana na kuidana, pakati pa ulungami na kusowa ulungami. Mbwenye iwo asathimbanambo na pyakubwereswa pya pyakusankhula pyawo: udidi na ntendere peno uipi na nyatwa.
Kupanduka Kwa Pyakucitwa Pyauzimu
8, 9. (a) Kodi upanduki watoma tani m’mbuto yauzimu? (b) Kusiyapo Adamu na Eva, kodi Sathani acitisa ani kupanduka?
8 Pana cinthu cinango cinafuna kudingwa. Anyakubala athu akutoma siwo okha basi tayu adapandukira utongi wa Mulungu. Kodi mbani pontho akhalipo m’nzidzi uneule? Pyakucitwa pyauzimu. Mulungu mbasati cita anthu, iye acita ntundu wa umaso wapadzulu kakamwe, cilengeso cikulu ca aanju, towera akhale maso kudzulu. Iwombo acitwa na ufulu wakusankhula na acitwambo na cifuno ca kungonjera utongi wa Mulungu.—Yobe 38:7; Masalmo 104:4; Apokalipse 5:11.
9 Biblya isalonga kuti kupanduka kwatoma m’mbuto yauzimu. Cakucitwa cinango cauzimu cikhafuna ufulu wakusowa madire. Ico cikhafunambo kuti anthu acilambire. (Mateo 4:8, 9) Nzimu unoyu wakupanduka wadzacitisa Adamu na Eva kupandukambo, m’kulonga mwaunthawatawa kuti Mulungu akhaamana cinthu cadidi. (Genesi 3:1-5) Natenepa nzimu unoyu usacemerwa Dyabo (Nyakupambazira) na Sathani (Mpingizi). M’kupita kwa nzidzi, iwo wacitisambo pyakucitwa pinango pyauzimu kupanduka. Ipyo pyadzadziwika ninga mademonyo.—Deuteronomyo 32:17; Apokalipse 12:9; 16:14.
10. Kodi ndi ninji cidabwereswa thangwi ya kupanduka kwa anthu pabodzi na pyakucitwa pyauzimu?
10 M’kupandukira Mulungu, anthu akhala okhene pantsi pa citsogolero ca Sathani na mademonyo ace. Ndi thangwi yace Biblya isacemera Sathani “mulungu wakuipa wa pantsi pano,” ule “[anathimisa] nzeru zawo mbachimwana kuona cheza cha mphangwa zadidi.” Na thangwi ineyi, Mafala a Mulungu asalonga kuti “pantsi pano, [pali] m’manja mwa mademonyo.” Yezu ene athula Sathani kuti ndi “nkadamu wa pantsi pano.”—2 Akorinto 4:4; 1 Jwau 5:19; Jwau 12:31.
Miseru Miwiri
11. Kodi Sathani apokanya Mulungu thangwi ya nseru upi unango?
11 Sathani asosa nseru unango udacitisa Mulungu kupokanywa. Mwandimomwene, Sathani apambizira Mulungu mbalonga kuti Iye adodomeka m’njira idacita iye anthu na kuti nkhabepo munthu mbodzi wakuti mbadacita pyakulungama pantsi pa nkakamizo. Inde, iye alonga kuti pantsi pa ciyeso iwo mbadatikana Mulungu. (Yobe 2:1-5) M’njira ineyi Sathani apokanya umumphu wa anthu.
12-14. Kodi nzidzi mbudapangiza tani undimomwene wa pya miseru miwiri idasosa Sathani?
12 Natenepa, Mulungu asiya nzidzi wakuinjipa towera pyakucitwa pyonsene pyanzeru pione kuti nseru unoyu pabodzi na nseru wa utongi ukulu wa Mulungu unamaliswa tani. (Landanisani na Eksodo 9:16.) Pyakucitika pya mbiri ya anthu mbipidapangiza undimomwene wa miseru ineyi miwiri.
13 Cakutoma mwa pyonsene, kodi nzidzi mbudapangizanji pya nseru wa utongi ukulu wakudzulu na pantsi, kuthema kwa utongi wa Mulungu? Kodi anthu mbadakwanisa kutongeka okhene mwadidi mbuto mwa kutongwa na Mulungu? Kusiyapo utongi wa Mulungu, kodi alipo makhaliro a utongi wa anthu akuti mbadabweresa dziko yakutsanzaya yakusowa nkhondo, usumankha na kusowa ulungami? Kodi ulipo utongi wakuti mbudamalisa ucerengi na kubweresa uthambaruki kwa onsene? Kodi ulipo utongi wakuti mbudamalisa utenda, kukalamba na kufa? Utongi wa Mulungu wasasanywa towera kucita pyonsene ipi.—Genesi 1:26-31.
14 M’kulonga pya nseru waciwiri, kodi nzidzi mbudapangizanji thangwi ya kukhulupirika kwa anthu? Kodi Mulungu adodoma m’kucita anthu m’njira idaacita iye? Kodi alipo mbodzi wa iwo wakuti mbadacita pinthu pyadidi pantsi pa ciyeso? Kodi alipo anthu akuti mbadapangiza kuti asafuna utongi wa Mulungu mbuto mwa utongi waumunthu wakutongereka?
[Foto pa tsamba 13]
Shuttle: Based on NASA photo
[Mafala Anafokotoza Cithundzithundzi]
Mulungu asiya nzidzi towera anthu afike pa ciimiriro capadzulu ca uthambaruki