Khundu 11

Phata Ya Dziko Ipswa Iri Kukhazikiswa Cincino

1, 2. M’kukwanirisika kwa profesiya ya Biblya, kodi ndi ninji pinaona ife mbipicitika?

CINTHU cinango cakudzumisa ndi cakuti phata ya dziko ipswa ya Mulungu iri kukhazikiswa cincino, ngakhale dziko ino yakale ya Sathani ipitirize kufudzika. Ninga munaona ife, Mulungu ali kugumanyiza anthu a madzinza onsene mbaacita phata ya mbumba ipswa ya dziko yapantsi yakuti mokhonda dembuka inadzapitira mbuto dziko ya lero yokhonda bverana. M’Biblya, pa 2 Pedro 3:13, mbumba ineyi ipswa isathulwa ‘pantsi pabswa.’

² Profesiya ya Biblya isalongambo: ‘M’ntsiku zinafuna kudza [ntsiku zinakhala ife cincino], . . .  anthu a madziko azinji anadza dzaithamangira, mbalonga kuti “Tendeni, tikakwire phiri ya Mbuya [ulambiri wace wandimomwene] . . . [Iye] anatipfundisa pinafuna ife kuti tichite; Ife tinafamba pa njira zidasankhula Iye.”’—Izaiya 2:2-3.

3. (a) Kodi profesiya ya Izaiya iri kukwanirisika pakati pa ani? (b) Kodi bukhu yakumalisa ya Biblya isafokotoza tani pyenepi?

³ Profesiya ineyi iri kukwanirisika pakati pa ale anangonjera ‘pinafuna Mulungu mbafamba m’njira zace.’ Bukhu yakumalisa ya Biblya isalonga pya mbumba ineyi ya anthu a madziko onsene anafuna ntendere ninga “[mwinji] ukulu wa mitundu yonsene, wa madzindza onsene, wa mbumba zonsene, wa malongero onsene,” ubale wandimomwene wa dziko yonsene yapantsi unatumikira Mulungu mwakuphatana. Pontho Biblya isalonga: “Ndiwo ale adabuluka mu nyatwa zikulu.” Nkhubveka kuti iwo anadzapulumuka pa kumala kwa makhaliro ano a pinthu akuipa.—Apokalipse 7:9, 14; Mateo 24:3.

Ubale Wandimomwene Wa Madziko Onsene

4, 5. Thangwi yanji pisakwanisika kuti ubale wa dziko yonsene yapantsi wa Mboni za Yahova ucitike?

⁴ Mamiliyau a Mboni za Yahova asayesera mwakuona ntima kukhala maso mwakubverana na njira na pipfunziso pya Mulungu. Cidikhiro cawo ca umaso okhonda mala cisamangika pa dziko ipswa ya Mulungu. M’kutsogolera umaso wawo wa ntsiku na ntsiku m’kubvera miyambo ya Mulungu, iwo asampangiza kuti cifuno cawo ndi cakungonjera njira yace yakutonga cincino na m’dziko ipswa. Konsene kwene, mokhonda tsalakana ntundu peno dziko yawo yacibaliro, iwo asabvera midida ibodzi ene—idaikhwa na Mulungu m’Mafalace. Na thangwi ineyi iwo ali na ubale wandimomwene wa madziko onsene, mbumba ya dziko ipswa ya anthu a Mulungu.—Izaiya 54:13; Mateo 22:37, 38; Jwau 15:9, 14.

⁵ Mboni za Yahova nkhabe simbika zokhene thangwi ya kukhala na ubale wakupambulika wa dziko yonsene yapantsi. Izo zisadziwa kuti pyenepi pisacitiswa na nzimu wamphambvu wa Mulungu unaphata basa kwa anthu anangonjera miyambo yace. (Machitiro 5:29, 32; Agalata 5:22, 23) Ineyi ndi basa ya Mulungu. Yezu alonga: “Pinachimwanika kuli anthu, pinakwanisikadi kuli Mulungu.” (Luka 18:27) Natenepa, Mulungu adacita kudzulu na pantsi pa kukhala na kukhala ndiye anacitisa mbumba ya dziko ipswa inafuna kudzakhala kwenda na kwenda.

6. Thangwi yanji ubale wa Mboni za Yahova ungakwanise kulongwa kuti ndi cirengo ca ntsiku zino?

⁶ Natenepa, njira inafuna kudzatonga Yahova m’dziko ipswa ingakwanise kuoniwa cincino m’pinthu pinacita iye m’kukhazikisa phata ya dziko ipswa. Pinacita iye na Mboni zace pingakwanise kulongwa kuti ndi cirengo ca ntsiku zino. Thangwi yanji? Thangwi iye ali kucitisa Mboni za Yahova kukhala na ubale wandimomwene wa dziko yonsene yapantsi, ubale wakuti cipo unadzafudzwa na manyerezero a kupambulana kwa anthu thangwi ya dzinza, ntundu wa khanda peno uphemberi. Nakuti pana mamiliyau a Mboni zinakhala m’madziko akukwana 235, izo zaphatana pabodzi ninga anthu akumangwa na nkhambala yokhonda thumuka. Ubale unoyu wa dziko yonsene yapantsi, wakuti ndi wakupambulika m’mbiri, ndi cirengo ca ntsiku zino—basa ya Mulungu.—Izaiya 43:10, 11, 21; Machitiro 10:34, 35; Agalata 3:28.

Kudzindikira Mbumba Ya Mulungu

7. Kodi Yezu alonga kuti atowereri ace andimomwene anadzadzindikirwa tani?

⁷ Kodi tinakwanisa tani pontho kudzindikira anthu anaphatisirwa na Mulungu ninga phata ya dziko yace ipswa? Inde, kodi mbani anakwanirisa mafala a Yezu anagumanika pa Jwau 13:34, 35? Iye alonga: “Ine ndinakupasani mwambo upswa, kuti mufunane. Mufunane ninga mudakufunirani ine pano. Na kufunana kwanu anthu onsene anadzadzindikira kuti ndimwe anyakupfundza anga.” Mboni za Yahova zisakhulupira mafala a Yezu na zisacita pinthu mwakubverana na iwo. Ninga munapfunzisa Mafala a Mulungu, izo ‘zisafunana na ntima onsene.’ (1 Pedru [Pedro] 4:8, MZ) Izo ‘zisafunana, tenepa zisaphatana pyadidi ninga akumangwa na nkhambala.’ (Akolose 3:14) Natenepa kufunana kwa ubale ndi “kola” inazicitisa kukhala pabodzi pa dziko yonsene yapantsi.

8. Kodi 1 Jwau 3:10-12 isadzindikirambo tani mbumba ya Mulungu?

⁸ Pontho, 1 Jwau 3:10-12 isalonga: “Ana a Mulungu na ana a mademonyo anadziwika tenepa: uyu anakhonda kuchita pya ulungami, si wa Mulungu tayu; siyembo tayu, uyu anakhonda kufuna mbale wache. Ande, mphangwa zidabva imwe kutomera pa nkhomo ndi izi: tifunane. Tikhonde kuchita ninga Kaini, akhakhala wa demonyo, mbapha mbale wache.” Natenepa, anthu a Mulungu asacita ubale okhonda khala na uphanga wa dziko yonsene.

Cidzindikiro Cinango

9, 10. (a) Kodi ndi basa ipi inadzindikirisa anzakazi a Mulungu m’ntsiku zino zakumalisa? (b) Kodi Mboni za Yahova zikukwanirisa tani Mateo 24:14?

⁹ Pana njira inango ya kudzindikira anzakazi a Mulungu. M’profesiya yace ya kumala kwa dziko, Yezu alonga pinthu pizinji pyakuti mbipidapangiza kuti nzidzi uno ndi ntsiku zakumalisa. (Onani Khundu 9.) Cidzindikiro cakufunika makamaka m’profesiya ineyi calembwa pa Mateo 24:14: “Mphangwa zadidi za dziko [peno umambo] ya kudzulu zinadzapangwa [pantsi] ponsene, towera mukhale amboni anga pakati pa anthu a mitundu yonsene. Pingamala ipi, inadzabwera nthawi ya kumalisirathu pyonsene.”

¹⁰ Kodi tikuona kukwanirisika kwa profesiya ineyi? Inde. Kubulukira m’caka 1914 mudatoma ntsiku zakumalisa, Mboni za Yahova zisamwaza mphangwa zadidi za Umambo wa Mulungu pa dziko yonsene ninga mudatonga Yezu, m’midzi ya anthu. (Mateo 10:7, 12; Machitiro 20:20) Mamiliyau a Mboni asacezera anthu m’madzinza onsene towera kulonga nawo pya dziko ipswa. Pyenepi pyakucitisani kutambira bruxura ino, thangwi basa ya Mboni za Yahova isaphataniza kudinda na kugawira mabiliyau a mabukhu analonga pya Umambo wa Mulungu. Kodi musadziwa anthu anango anamwaza mphangwa za Umambo wa Mulungu nyumba na nyumba pa dziko yonsene yapantsi? Marko 13:10 (NM) isapangiza kuti basa ya kumwaza mphangwa na kupfunzisa isafunika kucitwa ‘pakutoma,’ kumala mbukusati kufika.

Kutawirwa Kwa Nseru Ukulu Waciwiri

11. Kodi ndi cinthu cipi cinango cinapangiza Mboni za Yahova m’kungonjera utongi wa Mulungu?

¹¹ M’kungonjera miyambo na midida ya Mulungu, Mboni za Yahova zisakwanirisa cinthu cinango. Izo zisapangiza kuti Sathani alonga uthambi mudalonga iye kuti anthu nee mbadakhala akukhulupirika kwa Mulungu angayesiwa, mbatawira tenepa nseru ukulu waciwiri, unaphataniza umumphu wa anthu. (Yobe 2:1-5) Nakuti izo ndi mbumba ya mamiliyau a anthu a madzinza onsene, ninga nsoka ubodzi, Mboni zisapangiza kukhulupirika kwazo kwa utongi wa Mulungu. Maseze iwo ndi anthu akusowa ungwiro, asaphedza khundu ya Mulungu m’nseru wa utongi ukulu wakudzulu na pantsi, ngakhale akakamizwe na Sathani.

12. Kubulukira ku cikhulupiro cawo, kodi ndi ani anasangizira Mboni?

¹² Lero, mamiliyau anewa a Mboni za Yahova asathimizira umboni wa nsoka ukulu wa mboni za midzidzi yakale zidapangiza kukhulupirika kwa Mulungu. Angasi a anewa akhali Abele, Noa, Yobe, Abrahamu, Sara, Isaki, Yakobe, Debora, Rute, Davide na Danyele, towera kulonga angasi basi. (Ahebere, kapitulu 11) Ninga munalonga Biblya, iwo ndi “nsoka ukulu kakamwe wa amboni.” (Ahebere 12:1) Anewa na anango, kuphataniza anyakupfunza a Yezu, akoya umumphu wawo kwa Mulungu. Yezu ene apereka citsanzo cikulu kakamwe ca kukoya umumphu waungwiro.

13. Kodi ndi mafala api a Yezu thangwi ya Sathani adapangizika kukhala andimomwene?

¹³ Pyenepi pisapangiza kuti pidalonga Yezu kwa atsogoleri a uphemberi thangwi ya Sathani ndimomwene: “Mbwenye imwe munasaka nzeru za kundipha ine pano ndidakupangani pyamaso pidabva ine kwa Mulungu. . . . Imwe, Baba wanu adakubalani ndi demonyo. Imwe munafunambo kuchita pinafuna Baba wanu. Kubuluka pa kutoma iye ikhali nyachiropa, udidimbo ukhali mwa iye tayu. Thangwi pyamaso pinakhala tayu mwa iye. Demonyo pa kulonga uthambi analonga na nzeru zache zene, thangwi iye ndi nyakunama, ndiyembo Baba wa uthambi.”—Jwau 8:40, 44.

Kodi Imwe Munasankhulanji?

14. Kodi ndi ninji cinacitika cincino na phata ya dziko ipswa?

¹⁴ Phata ya dziko ipswa yakuti Mulungu ali kuikhazikisa cincino m’mbumba ya m’madziko onsene ya Mboni za Yahova isakhala yakuwanga kakamwe. Pacaka madzana a pikwi pya anthu asaphatisira ufulu wawo wakusankhula, wakubuluka m’cidziwiso candimomwene, towera kutawira utongi wa Mulungu. Iwo asacita khundu ya mbumba ya dziko ipswa, asaphedza khundu ya Mulungu m’nseru wa utongi ukulu wakudzulu na pantsi na asapangiza kuti Sathani ndi nyauthambi.

15. Kodi ndi basa ipi yakupambula inafuna kudzacita Yezu m’ntsiku zathu zino?

¹⁵ M’kusankhula utongi wa Mulungu, iwo anadzakhala akuthema kuikhwa ku “nkono wa madyo” wa Kristu munapambula iye “mabira na mbuzi.” M’profesiya yace ya ntsiku zakumalisa, Yezu alongeratu: “Anthu a mitundu yonsene anadzagumanyiwa pa maso pache. Iyembo anadzaapambula ninga munapambulira nkumbizi mabira na mbuzi. Anadzaikha mabira pa nkono wa madyo, mbuzi pa wabzwere.” Mabira anewa ndi anthu akucepeseka adagumanyikana na kuphedza abale a Kristu, mbangonjera utongi wa Mulungu. Mbuzi ndi anthu akuuma ntima adakhonda abale a Kristu mbakhonda cita cinthu towera kuphedza utongi wa Mulungu. Kodi pyenepi pisabweresanji? Yezu alonga: ‘Anewa [mbuzi] anadzaenda ku nyatwa zakukhonda kumala [‘anadzafudzweratu,’ NM] mbwenye akulungama ale [mabira] ku moyo wakukhalirathu.’—Mateo 25:31-46.

16. Kodi musafunika kucitanji khala musafuna kukhala m’Paradizu inafuna kudza?

¹⁶ Mwandimomwene, Mulungu asatitsalakanadi! Mokhonda dembuka iye anadzatipasa paradizu yakutsanzayisa pa dziko yapantsi. Kodi imwe musafuna kukhala m’Paradizu ineyi ? Khala ndi tenepo, pangizani kupereka kwanu takhuta ku masasanyiro a Yahova m’kupfunza pya iye na kucita pinthu mwakubverana na pinapfunza imwe. “Bwerera kuna Mbuya, phembera kuli Iye, chinchino ali duzi. Anyakuipisa asiye makhaliro awo, asanduze manyerezero awo, mbabwera pontho kuna Mbuya, Mulungu wawo; thangwi ngwa ntsisi.”—Izaiya 55:6, 7.

17. Thangwi yanji nkhabe funika kuluza nzidzi towera kusankhula ule anafuna ife kutumikira?

¹⁷ Lekani kuluza nzidzi. Kumala kwa makhaliro ano kuli cifupi kakamwe. Mafala a Mulungu asapasa uphungu uyu: “Lekani kufuna pinthu pya pantsi pano na pyonsenembo pya pantsi; thangwi kufuna kwa Baba kunakhala tayu mwa munthu anafuna pya pantsi pano . . . Penepo pingamala pya pantsi pano, kunamalambo kusirira kwapyo. Mbwenye munthu munthu wakuchita pinafuna Mulungu, anakhala kwenda na kwenda.”—1 Jwau 2:15-17.

18. Kodi ndi makhaliro api anafuna kukucitisani kudikhira na cinyindiro towera kukhala m’dziko ipswa yakudzumisa ya Mulungu?

¹⁸ Anthu a Mulungu ali kupfunziswa cincino towera kukhala maso kwenda na kwenda m’dziko ipswa. Iwo ali kupfunza luso yauzimu na maluso anango towera kukulisa paradizu. Tisakudembeterani kuti musankhule Mulungu ninga Ntongi na kuphedza basa yakupulumusa umaso idatuma iye kuti icitwe pa dziko yonsene yapantsi lero. Pfunzani Biblya na Mboni za Yahova, na dziwani Mulungu wakuti asakutsalakananidi na anadzamalisa nyatwa. M’njira ineyi imwembo mungakwanise kucita khundu ya phata ya dziko ipswa. Buluka penepo mungakwanise kudikhira na cinyindiro towera kukhala wakutawirika pamaso pa Mulungu na kukhala kwenda na kwenda m’dziko ineyi ipswa yakudzumisa.

[Foto pa tsamba 31]

Mboni za Yahova ziri na ubale wandimomwene wa madziko onsene

[Foto pa tsamba 32]

Phata ya dziko ipswa ya Mulungu iri kukhazikiswa cincino