Kodi Mbani Ali Kutongadi Dziko?

Anthu akuinjipa angatawire mbvunzo wapadzulu uyu na fala ibodzi​—Mulungu. Mbwenye ndimomwene kuti, nkhabepo m’Bibilya panalonga kuti Yezu Kristu peno Babace ndiwodi atongi a dziko ino. Mwakusiyana, Yezu alonga kuti: “Ntongi wa dziko ino anadzaponywa kunja.” Pontho iye athimizira kuti: “Ntongi wa dziko ali kudza. Iye nkhabe mphambvu mwa ine.”​—Jwau 12:31; 14:30; 16:11.

Natenepa, ntongi wa dziko ino ali kupokanyisana na Yezu. Kodi ntongi unoyu angakhale ani?

Makhaliro a Dziko Yapantsi Asapasa Njira

Ngakhale na kulesera kwa anthu a manyerezero adidi, dziko yathabuswa pikulu pene m’mbiri yace yonsene. Pyenepi pisacitisa kuti anthu akunyerezera apibvunze, ninga nyakufa wakulemba mphangwa David Lawrence, kuti: “‘Ntendere pa dziko yapantsi’​—cifupi pene anthu onsene asaufuna. ‘Cifuno cadidi kuna anthu’—​cifupi pene anthu onsene a pa dziko asacifuna kwa mbodzi na nzace. Mphapo, kodi pidadawika ninji? Kodi ndi thangwi yanji pana kugopswa kwa nkhondo ngakhale pana pifuno pyakubalwa napyo pya anthu?”

Pisaoneka ninga pyakucimwanika, kodi si tenepo? Nakuti cifuno cakubalwa naco ca anthu ndi cakukhala maso m’ntendere, iwo kazinji kene asaidana na kuphana​—mwa kuipa pikulu pene! Nyerezerani kunyanya kwa kupha mwa umphandu kwa kucucisa ciropa. Anthu aphatisa basa utci wa kupha, misasa ya kugumanyira anthu, malirimi a moto akuponyiwa, mabomba a napalm na njira zinango zaupswiru towera kuthabusa na kuphana mwakusowa ntsisi.

Kodi musakhulupira kuti anthu, akufuna ntendere na kutsanzaya, anakwanisa, mwa okhene, kucitira anzawo pyakuipa pikulupikulu pyenepi? Kodi ndi mphambvu zanji zinatsogolera anthu m’kucita pinthu pyakunyanyasa pyenepi, peno kuwatsogolera kukhala m’makhaliro a kuwakakamiza kucita pinthu pyaumphandu? Kodi mwapibvunza kale khala kuti pali mphambvu inango yakuipa, yakukhonda kuoneka, inatsogolera anthu kucita pinthu pyaumphandu pyenepi?

Adzindikirwa Atongi a Dziko Ino

Nkhabe funika kusangizira tayu, thangwi Bibilya isapangiza mwa kubveka pyadidi kuti pana munthu mbodzi wanzeru, wakukhonda kuoneka, anatsogolera anthu pabodzi pene na madzinza. Iyo isati: “Dziko yonsene yagona m’mphambvu ya nyakuipa.” Natenepa Bibilya isanzindikirisa, kuti: “Wakucemerwa Diyabu na Satana . . . alikupambusa dziko yakukhaliwa yonsene yapantsi.”—1 Jwau 5:19; Apokalipse 12:9.

Pa nzidzi unango, pa “kuleserwa na Diyabu”, Yezu hadapenukira tayu basa ya Satana ninga ntongi wa dziko ino. Bibilya isafokotoza pidacitika: “Diyabu ayenda naye pa phiri yakulapha pikulu pene mbamuonesa maumambo onsene a dziko na mbiri yace, na kumpanga kuti: ‘Pinthu ipi pyonsene ndinakupasa, ungagodama na kundiphemberera.’ Mphapo Yezu ampanga kuti: ‘Coka, Satana!’”​—Mateo 4:1, 8-10.

Nyerezerani pyenepi. Satana alesera Yezu mwa kumpasa “maumambo onsene a dziko”. Mbwenye, kodi kupereka kudacita Satana mbakudakhaladi kulesera kwa ndimomwene khala kuti Satana nee akhalidi ntogi wa maumambo anewa? Nkhabe, mbakudakhala tayu. Pontho onani kuti, Yezu hadakhonda tayu kuti mautongi anewa onsene a dziko akhali a Satana, pyakuti mbadapicita mbapidakhala kuti Satana siye mweneciro. Pakukhala tenepa, Satana, Diyabu, ndiyedi ntongi wakukhonda kuoneka wa dziko ino! Ndimomwene, Bibilya isancemera kuti “mulungu wa makhaliro ano a pinthu”. (2 Akorinto 4:4) Mphapo, kodi pyacitika tani kuti munthu wakuipa tenepa afikira khala na mbuto yautongi ineyi?

Munthu adadzakhala Satana pakutoma akhali anju wakusasanywa na Mulungu, mbwenye iye afika pakusirira mbuto ya Mulungu. Iye apokanya kuthema kwa utongi wa Mulungu. Towera kucita pyenepi aphatisa basa nyoka ninga yakunlongera towera kunyengerera nkazi wakutoma, Yeva, na kukwanisa kuti nkazi na mamunace, Adamu, acite pyakufuna pyace, m’mbuto mwa kubvera Mulungu. (Genesi 3:1-6; 2 Akorinto 11:3) Iye alonga pina kuti anakwanisa kupambusa ana onsene a Adamu na Yeva, akhafuna dzabalwa patsogolo pace. Natenepa, Mulungu apereka nzidzi towera kuti Satana alesere malongero ace, mbwenye Satana hadapembera tayu.​—Yobe 1:6-12; 2:1-10.

Mwakudziwika, Satana hali kutonga yekhene dziko ino tayu. Iye akwanisa kukwewerera maanju anango kuphatana naye m’kusandukira Mulungu. Anewa akhala madimoni, axamwali ace auzimu. Bibilya isalonga za iwo pakukulumiza akristu kuti: ‘Khalani dzololo pakupokanya manyengerero a Diyabu; thangwi tina nkhondo, tayu na ciropa na nyama, mbwenye na atongi a dziko a m’cidima cino, na mphambvu zauzimu zakuipa m’mbuto zakudzulu.’​—Aefesi 6:11, 12.

Khondesani Mizimu Yakuipa

Atongi a dziko anewa akuipa na akukhonda kuoneka ali akufunisisa kupambusa anthu onsene, mbaakhondesa kuphembera Mulungu. Njira ibodzi yakuti mizimu yakuipa isacitisa pyenepi ndi yakubalalisa nyerezero yakuti pakumala kufa pasakhala pina umaso, ngakhale kuti Mafala a Mulungu asapangiza pakweca kuti akufa nkhabe kudziwa pinthu tayu. (Genesi 2:17; 3:19; Ezekyele 18:4; Masalmo 146:3, 4; Mlaliki 9:5, 10) Natenepa, nzimu wakuipa, wakusangizira fala ya nyakufa, ungalonge na abale peno axamwali ali maso, a nyakufa unoyu, peno kubulukira mwa ng’anga, peno mwa “fala” yakubulukira ku mbuto yakukhonda kuoneka. “Fala” isasangizira kukhala ya nyakufa, mbwenye mwandimomwene iyo ndi ya dimoni!

Natenepa, ntsikwace khala mungabva “fala” yatenepa, lekani kunyengererwa. Khondani pyonsene pinafunayo kulonga, pontho, bwerezerani mafala a Yezu akuti: “Coka, Satana!” (Mateo 4:10; Tyago 4:7) Lekani kulekerera kuti cilakolako cakufuna kudziwa mbuto ya mizimu cikucitiseni kukhala wakuphatanizwa na mizimu yakuipa. Kuphatanizwa kweneku kusacemerwa kuphemberera mizimu, natenepa Mulungu asacenjeza anyakuphembera ace kucalira macitiro ace onsene. Bibilya isakhondesa “akuphatisa basa kulotera . . . peno akwenda kaombeza kwa ng’anga, peno wakulotera, peno wakulonga na akufa”.​—Deuteronomyo 18:10-12; Agalata 5:19-21; Apokalipse 21:8.

Nakuti kuphemberera mizimu kusacitisa munthu kukhala wakutsogolerwa na mphambvu za madimoni, khondesani macitiro ace onsene, mwa kukhonda tsalakana maonekero ace kukhala akusekesa peno akukomeresa. Macitiro anewa asaphataniza kudinga mpira wa vidru na kuphatisa basa matabwa akuombedzera, kudziwa pinthu mwa kulotera, kudinga mizera ya m’nzanja na kudinga nyenyezi. Madimoni asacitisa pina kunyangula na pinthu pinango pyamalodza m’zinyumba zinakhala mbuto zawo zakukhalamo.

Kuthimizira pyenepi, mizimu yakuipa isaphatisa basa mwakuphindula kukotamira ku madawo kwa anthu, mwakuphatisa basa mabukhu, sinema na mindandanda ya televizau inaonesa macitiro a kugonana akukhonda khala akubalwa nawo. Madimoni asadziwa kuti manyerezero akuipa, angakhonda kubuluswa m’nsolo, asacitisa manyerezero akukhonda kufudzika akutsogolera anthu kucita ulukwale​—sawasawa ninga iwo ene madimoni.​—Genesi 6:1, 2; 1 Atesalonika 4:3-8; Yuda 6.

Ndimomwene kuti anthu azinji asaseka nyerezero yakuti dziko ino isatongwa na mizimu yakuipa. Mbwenye kukhonda kukhulupira kwawo mbakuleke kutidodomesa, thangwi yakuti, Bibilya isalonga kuti: “Iye ene Satana asapitiriza na kupisangizira anju wa ceza.” (2 Akorinto 11:14) Kunyengerera kwace kukulu kwakhala kwakucitisa cidima azinji ene ku undimomwene wakuti iye na madimoni ace alipodi. Mbwenye lekani kudodomeswa! Diyabu na madimoni ace ndi andimomwene, natenepa imwe musafunika kwakhondesa mwakupitiriza.​—1 Pedro 5:8, 9.

Mwakukomeresa, uli cifupi nzidzi wakuti Satana na nkumbi ace anadzakhalapobve tayu! “Dziko [kuphataniza na atongi ace amadimoni] irikumala”, isapikira Bibilya, “mbwenye ule anacita cifuno ca Mulungu anakhala kwenda na kwenda”. (1 Jwau 2:17) Ndi kusudzuka kwanji kunafuna dzakhalapo pakubuluswa mphambvu ineyi yakuipa! Mbatikhaleni, mphapo, pakati pa anthu anacita cifuno ca Mulungu na kudzatsanzaya na umaso okhonda mala m’dziko ipswa yapantsi yakulungama ya Mulungu.​—Masalmo 37:9-11, 29; 2 Pedro 3:13; Apokalipse 21:3, 4.

Kusiyapo ngakhala pana cidzindikiro cinango, malemba a Bibilya mbakubulukira m’Tradução do Novo Mundo das Escrituras Sagradas​—Com Referências.

[Foto pa tsamba 4]

Kodi Satana mbadakwanisa kupasa Yezu maumambo onsenewa a dziko mbadakhonda kukhala ace?