Pfunziro 1

Munakwanisa Tani Kudziwa Pinafuna Mulungu

Kodi ndi mphangwa zipi zakufunika zinagumanika m’Biblya? (1)

Kodi mbani mwanaciro Biblya? (2)

Thangwi yanji musafunika kupfunza Biblya? (3)

1. Biblya ndi muoni wakufunika wakubuluka kwa Mulungu. Ndi ninga tsamba yakubuluka kwa baba wakufuna mbaitumiza kwa anace. Isatipanga undimomwene wa pya Mulungu—kuti iye mbani na kuti asafunanji. Isafokotoza kuti tinathimbana tani na nyatwa na kuti tinagumana tani citsanzayo candimomwene. Biblya basi ndiyo inatipanga pinafunika ife kucita towera kukomeresa Mulungu.—Masalmo 1:1-3; Izaiya 48:17, 18.

2. Biblya yalembwa na amuna akusiyana-siyana akukwana 40 mu nzidzi wakupiringana piaka 1.600, kutomera mu caka 1513 Mbudzatifika nzidzi wathu (M.N.W.). Iyo iri na mabukhu mang’ono akukwana 66. Anyakulemba Biblya apumirwa na Mulungu. Iwo alemba manyerezero ace, tayu awo ene. Natenepa, Mulungu kudzulu, tayu munthu pa dziko yapantsi, ndi Mwanaciro Biblya.—2 Timoti 3:16, 17; 2 Pedro 1:20, 21.

3. Mulungu acitisa kuti Biblya ilembwe mwakulinganira na ikoyiwe. Mabiblya mazinji adindwa kupiringana bukhu inango yonsene. Si onsene anafuna kudzakomerwa kukuonani mbumukapfunza Biblya tayu, mbwenye lekani kusiya kuti pyenepi pikulimiriseni. Tsogolo yanu yakukhonda mala isanyindira kudziwa kwanu Mulungu na kucita cifuno cace mwakukhonda tsalakana mpingizo wa ntundu onsene.—Mateo 5:10-12; Jwau 17:3.