Pfunziro 2
Kodi Mulungu Mbani?
Kodi Mulungu wandimomwene mbani, na dzinace ndi ipi? (1, 2)
Kodi iye ali na manungo a ntundu wanji? (3)
Kodi makhaliro ace akupambulika ndi api? (4)
Kodi tisafunika kuphatisira adzimunthu na pidzindikiro pakumulambira? (5)
Kodi ndi njira zipi ziwiri zakuti tingakwanise kupfunza pya Mulungu? (6)
1. Anthu asalambira pinthu pizinji. Mbwenye Biblya isatipanga kuti pana Mulungu m’bodzi basi WANDIMOMWENE. Iye acita pinthu pyonsene kudzulu na pa dziko yapantsi. Nakuti iye atipasa umaso, iye ndiye M’bodzi basi wakuti tisafunika kumulambira.—1 Akorinto 8:5, 6; Apokalipse 4:11.
2. Mulungu ali na pidzo pizinji mbwenye ali na dzina ibodzi basi. Dzinace ndi YAHOVA. M’mabiblya mazinji, dzina ya Mulungu yabuluswa mbipitirwa mbuto na pidzo ninga MBUYA peno MULUNGU. Mbwenye mudalembwa Biblya, dzina Yahova ikhagumanika m’maulendo akukwana 7.000!—Eksodo 3:15; Masalmo 83:18, Tradução do Novo Mundo.
3. Yahova ali na manungo, mbwenye ndi akusiyana na athu. Biblya isalonga kuti “Mulungu ndi nzimu.” (Jwau 4:24) Nzimu ndi ntundu wa umaso wapadzulu kakamwe kupiringana wathu. Nee munthu ene m’bodzi atoma kale kuona Mulungu. Yahova asakhala kudzulu, mbwenye iye asakwanisa kuona pinthu pyonsene. (Masalmo 11:4, 5; Jwau 1:18) Kodi nzimu wakucena ndi ninji mphapo? Si munthu wakulandana na Mulungu tayu. Mbuto mwace, ndi mphambvu yakuphata basa ya Mulungu.—Masalmo 104:30.
4. Biblya isatipangiza umunthu wa Yahova. Isapangiza kuti makhaliro ace akupambulika ndi kufuna, ulungami, udziwisi na mphambvu. (Deuteronomyo 32:4; Yobe 12:13; Izaiya 40:26; 1 Jwau 4:8) Biblya isatipanga kuti iye ndiyembo wantsisi, wadidi, wakulekerera, wakupasa na wakupirira. Ife, ninga ana akubvera, tisafunika kuwangisira towera kunsangizira.—Aefesi 5:1, 2.
5. Kodi tisafunika kugodama peno kuphemberera adzimunthu, pithunzithunzi, peno pidzindikiro pa kulambira kwathu? Nkhabe! (Eksodo 20:4, 5) Yahova asalonga kuti tisafunika kulambira iye basi. Iye nkhabe gawana mbiri yace na munthu unango peno na cinthu cinango consene. Adzimunthu nkhabe mphambvu yakutiphedza.—Masalmo 115:4-8; Izaiya 42:8.
6. Kodi tinakwanisa tani kudziwa mwadidi Mulungu? Njira ibodzi ndi kuona pinthu pidacita iye na kudinga mwacidikhodikho kuti pisatipanganji. Pyakucitwa pya Mulungu pisatipangiza kuti iye ali na mphambvu ikulu na udziwisi. Ife tisaona kufuna kwace m’pinthu pyonsene pidacita iye. (Masalmo 19:1-6; Aroma 1:20) Njira inango yakuti tingakwanise kupfunza pya Mulungu ndi kupfunza Biblya. Mwenemu iye asatipanga pizinji kakamwe pyakuti iye ndi Mulungu wa ntundu wanji. Pontho iye asatipanga pya cifuniro cace na pinafuna iye kuti tipicite.—Amosi 3:7; 2 Timoti 3:16, 17.
[Mafoto pa tsamba 5]
Ife tisapfunza pya Mulungu kubulukira m’pyakucitwa na kubulukira m’Biblya