Pfunziro 11

Pikhulupiro Na Miyambo Inakhonda Komeresa Mulungu

Kodi ndi ntundu upi wa pikhulupiro na miyambo yakuti ndi yakuipa? (1)

Kodi Akristu asafunika kukhulupira kuti Mulungu ndi Utatu? (2) Thangwi yanji Akristu andimomwene nkhabe kukumbuka Khisimisi, Paskwa, peno Ntsiku zakubalwa? (3, 4)

Kodi anyakufa angakwanise kuthabusa anthu ali maso? (5)

Kodi Yezu afa pa kurusu? (6)

Kodi ndi pyakufunika tani kukomeresa Mulungu? (7)

1. Si kubveka kuti pikhulupiro na miyambo yonsene ndi yakuipa tayu. Mbwenye Mulungu nkhabe kukomerwa napyo khala pisabulukira ku uphemberi waunthawatawa peno khala ndi pyakusiyana na pipfunziso pya Biblya.—Mateo 15:6.

2. Utatu: Kodi Yahova ndi Utatu—anthu atatu mwa Mulungu m’bodzi? Nkhabe! Yahova, Baba, ‘ndiye ekha basi Mulungu wa maso’ peno wandimomwene. (Jwau 17:3; Marko 12:29) Yezu ndi Mwanace wautombo, na iye asangonjera Mulungu. (1 Akorinto 11:3) Baba ndi wankulu kupiringana Mwana. (Jwau 14:28) Nzimu wakucena si munthu tayu; ndi mphambvu yakuphata basa ya Mulungu.—Genesi 1:2; Machitiro 2:18.

3. Khisimisi Na Paskwa: Yezu hadabalwa pa ntsiku 25 ya nthanda ya Maindza tayu. Iye abalwa cifupi na ntsiku 1 ya nthanda ya Malandalupya, nzidzi wa caka wakuti akumbizi akhasiya mikumbi yawo kunja namasiku. (Luka 2:8-12) Cipo Yezu atonga kuti Akristu akumbuke ntsiku ya kubalwa kwace. Mbuto mwace, iye apanga anyakupfunzace kuti akoye, peno akumbuke ntsiku ya kufa kwace. (Luka 22:19, 20) Khisimisi na miyambo yace pyabuluka ku mauphemberi aunthawatawa akale. Ndi sawasawa na miyambo ya Paskwa, ninga ya kuphatisira mazai na masulo. Akristu a nzidzi wakale hadakumbuka Khisimisi na Paskwa tayu, pontho Akristu andimomwene lero nkhabe cita pyenepi.

4. Ntsiku Zakubalwa: Pikumbuso piwiri basi pya ntsiku yakubalwa pinalongwa m’Biblya pyacitwa na anthu akuti nee akhalambira Yahova. (Genesi 40:20-22; Marko 6:21, 22, 24-27) Akristu a mu nzidzi wakale nee akhakumbuka ntsiku zakubalwa tayu. Mwambo wakukumbuka ntsiku zakubalwa wabulukira ku mauphemberi aunthawatawa akale. Akristu andimomwene asapasa muoni na asasenzeka pabodzi m’midzidzi inango ya caka.

5. Kugopa Anyakufa: Anyakufa nkhabe kwanisa cita cinthu peno kubva cinthu. Ife nkhabe kwanisa kuaphedza, na iwo nkhabe kutithabusa. (Masalmo 146:4; Koelete 9:5, 10) Moyo usafa; iwo nkhabe pitiriza kukhala maso pakumala kufa. (Ezekyele 18:4) Mbwenye m’midzidzi inango aanju akuipa, anacemerwa mademonyo, asasangizira kukhala ninga mizimu ya anyakufa. Miyambo yonsene yakuphatana na kugopa peno kulambira anyakufa ndi yakuipa.—Izaiya 8:19.

6. Kurusu: Yezu hadafa pa kurusu tayu. Iye afa pa ntanda, peno muti. Fala Yacigerego idathumburuzwa “kurusu” m’Mabiblya mazinji isafuna kulonga pya phindi ibodzi basi ya muti. Cidzindikiro ca kurusu cabulukira ku mauphemberi aunthawatawa akale. Kurusu nee ikhaphatisirwa peno kulambirwa na Akristu akale tayu. Natenepa, kodi imwe musanyerezera kuti mbipidakhala pyakuthema kuphatisira kurusu mu ulambiri?—Deuteronomyo 7:26; 1 Akorinto 10:14.

7. Pingakwanise kukhala pyakunensa kakamwe kusiya pinango pya pikhulupiro na miyambo ineyi. Acibale na axamwali panango angakwanise kuyesera kukucitisani kukhonda cinja pikhulupiro pyanu. Mbwenye kukomeresa Mulungu ndi kwakufunika kakamwe kupiringana kukomeresa anthu.—Misangani 29:25; Mateo 10:36, 37.

[Foto pa tsamba 22]

Mulungu si Utatu tayu

[Foto pa tsamba 23]

Khisimisi na paskwa pyabulukira ku mauphemberi aunthawatawa akale

[Foto pa tsamba 23]

Nkhabepo thangwi towera kulambira anyakufa peno kuagopa