Pfunziro 14

Mboni Za Yahova Zapakika Tani

Kodi mboni za Yahova za midzidzi ino zatoma lini? (1)

Kodi misonkhano ya Mboni za Yahova isacitwa tani? (2)

Kodi kobiri yakugula nayo pinthu isabuluka kupi? (3)

Kodi mbani anatsogolera m’mpingo ubodzi na ubodzi? (4)

Kodi ndi misonkhano ipi mikulu inacitwa piaka pyonsene? (5)

Kodi ndi basa ipi inacitwa ku ofesi ikulu na ku mafiliali awo? (6)

1. Mboni za Yahova za midzidzi ino zatoma mu caka 1870. Pakutoma, izo zikhacemerwa Anyakupfunza Biblya. Mbwenye mu caka 1931 zatambira dzina ya m’Biblya yakuti Mboni za Yahova. (Izaiya 43:10) Kutomera pa nsoka ung’ono gulu yadzakula mbifika pa mamiliyau a Mboni, akuti ali akudzudzumika mu kumwaza mphangwa m’madziko akupiringana 230.

2. Mipingo mizinji ya Mboni za Yahova isasonkhana katatu pa sumana. Imwe mukucemerwa towera mugumanike pa ubodzi wa misonkhano ineyi. (Ahebere 10:24, 25) Biblya ndi ncera wa pyonsene pinapfunziswa. Misonkhano isatomwa na kumaliswa na phembero. ‘Nyimbo zauzimu’ zisaimbwa mwakubulukira mu ntima m’misonkhano mizinji. (Aefesi 5:18, 19) Kupita ndi kwapezi, pontho nkhabe citwa nsonkho-nsonkho.—Mateo 10:8.

3. Mipingo mizinji isacita misonkhano yawo pa Nyumba ya Umambo. Kazinji kene nyumba zenezi ndi zakumangwa mu njira yakukhonda nensa na Mboni zakuperekeka. Imwe nee munadzaona adzimunthu, makurusu, peno pinthu pinango pyakulandana na pyenepi pa Nyumba ya Umambo. Kobiri yakugula nayo pinthu isabuluka mu pyakupereka pyaufulu. Kwa ale anafuna kucita cakupereka, mwenemo musagumanika bokosi ya pyakupereka.—2 Akorinto 9:7.

4. M’mpingo ubodzi na ubodzi, muna akulu a mpingo, peno ayang’aniri. Iwo asatsogolera mu kupfunzisa m’mpingo. (1 Timoti 3:1-7; 5:17) Iwo asaphedzwa na atumiki akutumikira. (1 Timoti 3:8-10, 12, 13) Amuna anewa si apadzulu kupita anango m’mpingo tayu. (2 Akorinto 1:24) Iwo nkhabe kupaswa pidzo pyakupambulika. (Mateo 23:8-10) Iwo nkhabe kubvala mwakusiyana na anango. Pontho nkhabe lipwa thangwi ya basa yawo. Mwakufuna akulu a mpingo asatsalakana pyakufuna pyauzimu pya mpingo. Iwo asapereka ciwangiso na citsogolero m’midzidzi ya nyatwa.—Tyago 5:14-16; 1 Pedro 5:2, 3.

5. Mboni za Yahova zisacitambo misonkhano mikulu ya cisa peno ya gawo mu piaka pyonsene. M’midzidzi ineyi mipingo mizinji isagumanyikana pabodzi towera kubva programu yakupambulika ya pipfunziso pya Biblya. Ubatizo wa anyakupfunza apswa ndi khundu ya nzidzi onsene ya programu ya nsonkhano wa cisa peno nsonkhano wa gawo.—Mateo 3:13-17; 28:19, 20.

6. Ofesi ikulu ya dziko yonsene yapantsi ya Mboni za Yahova isagumanika ku Nova York. Kweneku kusagumanika Mathubo Akutonga, phata ya nsoka wa akulu acidziwiso unayang’anira mpingo wa dziko yonsene yapantsi. Pontho alipombo mafiliali akupiringana 100 kuzungulira dziko yonsene yapantsi. M’mbuto zenezi, anthu akuperekeka asaphedza kudinda na kutumiza mabukhu akubuluswa Biblya. Pitsogolero pisaperekwambo towera kucita basa ya kumwaza mphangwa mwakulinganira. Thangwi yanji nkhabe kukhunganya ulendo towera kuenda kaona ofesi ya filiali ya paduzi na imwe?