Pfunziro 7
Cenjezo Ca M’nzidzi Wakale
Yahova nkhabe dzasiya kuti anthu akuipa afudze Paradizu. Mwemo munadzakhala axamwali ace basi. Kodi ndininji pinafuna dzacitika kwa akuipa? Towera mudziwe matawiro, nyerezerani mbiri yandimomwene ya Nowa. Iye akhali maso piaka pikwi na pikwi ndulimu. Akhali munthu wadidi pina midzidzi yonsene akhawangisira towera kucita cifuno ca Yahova. Mbwenye anthu anango pa dziko yapantsi akhacita pyakuipa. Natenepa Yahova ampanga Nowa kuti Iye anadzabweresa cigumula cikulu towera afudze anthu anale onsene akuipa. Atuma Nowa kuti amange cimwadiya, towera kuti iye na banja yace akhonde kufa pa Cigumula.—Genesi 6:9-18.
Nowa na banja ace asasanya cimwadiya. Nowa aacenjeza anthu kuti ciri kubwera Cigumula, mbwenye iwo hadambvesera tayu. Apitirira na kucita pinthu pyakuipa. Pakumala kusasanya cimwadiya, Nowa akwata pinyama mbapipitisa nkati mwace pina iye pabodzi pene na banja ace apitambo m’cimwadiya. Yahova abweresa conzi cikulu kakamwe. Abvumba ntsiku 40 na masiku 40. Dziko yonsene yapantsi yadyiwa na madzi.—Genesi 7:7-12.
Anthu akuipa aluza umaso wawo, mbwenye Nowa na banja ace apulumuswa. Yahova aapulumusa ku Cigumula mbaabwezera m’dziko yapantsi yakusowa pyakuipa. (Genesi 7:22, 23) Bibilya isalonga kuti ulikubwera pina nzidzi wakuti Yahova anadzafudza ale anakhonda cita pinthu pyadidi. Anthu adidi nkhabe dzafudzwa. Anadzakhala na kukhaliratu m’dziko yapantsi ya Paradizu.—2 Pedro 2:5, 6, 9.
Lero, anthu akuinjipa asacita pinthu pyakuipa. Dziko yadzala na pyakunentsa. Yahova asatuma Mboni zace mwakubwerezera towera acenjeze anthu, mbwenye anthu akuinjipa nkhabe funa bvera mafala a Yahova. Iwo nkhabe funa cinja njira zawo za umaso. Nkhabe funa tawira pinalonga Mulungu thangwi ya pinthu pyadidi na pyakuipa. Kodi ndininji pinafuna dzaacitikira anthu anewa? Kodi iwo anadzacinja ntsiku ace? Akuinjipa cipo na cipo hanadzacinja tayu. Unadzabwera nzidzi wakuti akuipa anadzafudzwa natepa cipo na cipo hanadzakhala pina maso tayu.—Masalmo 92:7.
Dziko yapantsi nkhabe dzafudzwa tayu; iyo inadzasanduzwa mbikhala paradizu. Ale anakhala axamwali a Mulungu anadzakhala na kukhaliratu m’Paradizu pa dziko yapantsi.—Masalmo 37:29.