Pfunziro 9

Kodi Axamwali A Mulungu Mbani?

Yezu Kristu ndi Mwana wa Yahova pina ndi xamwali ace wapantima na wakufunika kakamwe. Mbadzati kukhala maso niga munthu pa dziko yapantsi, Yezu akhala maso kudzulu ninga cakusasanywa camphambvu ca uzimu. (Jwau 17:5) Patsogolo pace abwera pa dziko yapantsi towera kupfunzisa anthu undimomwene wa pya Mulungu. (Jwau 18:37) Iye pina apereka umaso wace wa umunthu towera kupulumusa anthu onsene akubvera, ku madawo na kufa. (Aroma 6:23) Yezu cincino ndi Mambo wa Umambo wa Mulungu, utongi wa kudzulu unafuna dzacita dziko ino yapantsi kukhala Paradizu.—Apokalipse 19:16.

Maanju pina ndi axamwali a Mulungu. Maanju hadatoma tayu umaso wawo ninga anthu pa dziko yapantsi. Asasanywa kudzulu, Mulungu mbadzati cita dziko yapantsi. (Yobe 38:4-7) Pali pikwi na pikwi pya maanju. (Danyele 7:10) Axamwali akudzulu anewa a Mulungu asafuna kuti anthu apfunze undimomwene wa pya Yahova.—Apokalipse 14:6, 7.

Mulungu ana axamwali pina pa dziko yapantsi; iye asaacemera mboni zace. M’nyumba yakutongera miseru, mboni isalonga pinadziwa iye pya munthu peno pya cinthu. Mboni za Yahova zisalonga kwa anthu anango pinadziwa iwo pya Yahova na pifuniro pyace. (Izaiya 43:10) Sawasawa ninga maanju, Mboni zisafuna kukuphedzani towera mupfunze undimomwene wa pya Yahova. Zisafuna kuti mukhalembo xamwali wa Mulungu.