Nsolo Wacixanu
Ufulu Unatsanzaya Na Alambiri A Yahova
1, 2. (a) Kodi ndi ntundu wanji wa ufulu udapasa Mulungu banja yakutoma? (b) Longani miyambo mingasi ikhatonga pyakucita pya Adamu na Eva.
1MUDACITA Yahova mamuna na nkazi akutoma, iwo akhatsanzaya na ufulu wakupiringana ntundu onsene wa ufulu uli na anthu lero. Mudzi wawo ukhali Paradizu, Munda wakubalika wa Edeni. Nakuti iwo akhali na manyerezero na manungo aungwiro, nee pakhali utenda wakuti mbudacimwanisa kutsanzaya kwawo na umaso. Iwo nee akhadikhira kufa tayu ninga anthu onsene lero. Iwo nee akhalimbo mitcini tayu, mbwenye akhali na ntukwa wakudzumatirisa wa ufulu wa kusankhula, luso ya kucita pyakusankhula pyawo. Natenepa, towera kupitiriza kutsanzaya na ufulu unoyu wakudzumatirisa, iwo akhafunika kulemedza miyambo ya Mulungu.
2 Mwacitsanzo, onani miyambo yakumanungo idaikha Mulungu. Mwandimomwene, miyambo ineyi panango nee ikhadalembwa tayu, mbwenye Adamu na Eva acitwa m’njira yakuti mbadaibvera mwacibaliro. Njala ikhapangiza kufunika kwa kudya; nyota, kufunika kwa kumwa; kubira kwa dzuwa, kufunika kwa kugona. Yahova aapasambo basa kuti aicite. Mwandimomwene, basa ineyi ikhali mwambo thangwi mbidatonga pyakucita pyawo. Iwo mbadabala ana, kutonga mitundu yonsene ya umaso pa dziko yapantsi na kufuthula madire a Paradizu mpaka kuzungulira dziko yonsene yapantsi. (Genesi 1:28; 2:15) Ukhali mwambo wadidi na wakuphindulisa tani! Mwambo unoyu waapasa basa yakutsanzayisadi, mbuacitisa kuphatisira nzeru yawo mwakukwana na m’njira zakuphindulisa. Pontho, iwo akhali na ufulu ukulu towera kusankhula njira ikhafunira iwo kucita basa yawo. Kodi munthu mbadaphembanji pontho?
3. Kodi Adamu na Eva mbadapfunza tani kuphatisira mwanzeru ufulu wawo pa kucita pyakusankhula?
3 Mwandimomwene, mudatambira Adamu na Eva mwai wa kucita pyakusankhula, pyenepi nee pikhabveka kuti pyakusankhula pyawo pyonsene mbipidakhala na maphindu adidi. Ufulu wawo wa kusankhula ukhafunika kucitwa nkati mwa madire adaikhwa na mwambo na midida ya Mulungu. Kodi iwo mbadakwanisa tani kudziwa pyenepi? M’kubvesera Nciti wawo na kuyang’ana mabasa ace. Mulungu apasa Adamu na Eva nzeru zakukwana towera kuphatisira pinthu pikhapfunza iwo. Nakuti acitwa aungwiro, cipendamiro cawo cacibaliro mbicidapangiza makhaliro a Mulungu mukhacita iwo pyakusankhula. Mwandimomwene, khala iwo akhaperekadi takhuta ku pinthu pidaacitira Mulungu na kufuna kunkomeresa, iwo akhafunika kucita pyakusankhula mwacidikhodikho.—Genesi 1:26, 27; Jwau 8:29.
4. (a) Kodi ntemo udapaswa Adamu na Eva wa kukhonda kudya nsapo wa muti ule wakukhondeswa wabulusa ufulu wawo? (b) Thangwi yanji ntemo unoyu ukhali wakuthema?
4 Mwakuthema, Mulungu asankhula kuyesera kuperekeka kwawo kwa iye ninga Mpasi wawo wa Umaso na kufuna kwawo kupitiriza kukhala nkati mwa madire adaikha iye. Yahova apasa Adamu ntemo uyu: “Dya misapo yonsene ya m’munda muno. Mbwenye, leka kudya nsapo wa muti wakudziwa pyadidi na [pyakuipa], thangwi ntsiku inadzaudya iwe, unadzafa.” (Genesi 2:16, 17) Mudamala Eva kucitwa, iye apangwambo mwambo unoyu. (Genesi 3:2, 3) Kodi kukhondesa kweneku kwabulusa ufulu wawo? Nkhabe. Iwo akhali na mitundu yonsene ya pyakudya pyakudzipa towera akhonde kudya nsapo wa muti ule wakukhondeswa. (Genesi 2:8, 9) Kukhali kwakuthema kuti iwo adzindikire kuti dziko yapantsi ndi ya Mulungu, nakuti iye ndiye adaicita. Natenepa iye akhali wakuthema kuikha miyambo yakubverana na cifuniro cace na yakuphindulisa anthu.—Masalmo 24:1, 10.
5. (a) Kodi aluza tani Adamu na Eva ufulu wakudzumatirisa ukhali na iwo? (b) Kodi ndi ninji pidapita m’mbuto mwa ufulu ukhatsanzaya na Adamu na Eva, na pyenepi pisatikhuya tani?
5 Kodi ndi ninji cidacitika? M’kukulumizwa na kusirira kwakucenama, anju mbodzi aphatisira ufulu wace wakusankhula m’njira yakuipa mbadzakhala Sathani, pinabveka “Mpingizi.” Iye anyengeta Eva m’kumpasa cibaso ca pinthu pyakusiyana na cifuno ca Mulungu. (Genesi 3:4, 5) Adamu aphedza Eva m’kuswa mwambo wa Mulungu. M’kukwata pinthu pyakuti si pyawo tayu, iwo aluza ufulu wawo wakudzumatirisa. Kudawa kwadzakhala nyakutonga wawo na iwo atoma kufa, ninga mukhadaacenjeza Mulungu. Unthaka udapasa iwo anawo ndi kudawa—kunapangizwa na cipendamiro ca cibaliro ca kudawa. Kudawa kwabweresambo kufewa kunacitisa anthu kuduwala, kukalamba na kufa. Cipendamiro cakudodoma, cinathimizirika thangwi ya cidzoloero ca Sathani, cabala mbumba ya anthu yakukhala na mbiri ya kuidana, usumankha, kupondererana na nkhondo zinapha mamiliyau a anthu. Kwasiyana tani na ufulu unapasa Mulungu anthu kutomera kale!—Deuteronomyo 32:4, 5; Yobe 14:1, 2; Aroma 5:12; Apokalipse 12:9.
Ndi Kupi Kunagumanika Ufulu
6. (a) Kodi ndi kupi kunagumanika ufulu wandimomwene? (b) Kodi ndi ntundu wanji wa ufulu ukhalonga Yezu?
6 Pakati pa makhaliro akuipa anagumanika konsene kwene lero, si pyakudzumatirisa tayu kuti anthu asafuna ufulu uzinji. Kodi unagumanika kupi ufulu wandimomwene? Yezu alonga: “Imwe mungabvera kutsogolo mafala anga, ndimwe anyakupfundza anga kakamwe, munadzadzindikira pya udidi [peno undimomwene], udidimbo unadzakusanduzani kudza anthu a ufulu.” (Jwau 8:31, 32) Ufulu unoyu siwo unadikhira anthu munakhonda iwo ntongi peno ntundu wa kutonga towera kusankhula unango. Mbuto mwa pyenepi, ufulu unoyu usafika pa phata ya nyatwa za anthu. Ufulu udalonga Yezu ukhali ufulu wa kusudzuka m’ubitcu wa kudawa. (Jwau 8:24, 34-36) Natenepa, munthu angadzakhala nyakupfunza wandimomwene wa Yezu Kristu, iye asaona kucinja kukulu m’umaso wace, mbadzakhala wakusudzuka!
7. (a) Kodi ndi m’njira ipi tingakwanise kusudzuka ku madawo cincino? (b) Towera kukhala na ufulu unoyu, kodi tisafunika kucitanji?
7 Pyenepi nee pisabveka kuti cincino Akristu andimomwene nkhabe kubvabve pyakubwereswa na cipendamiro cacibaliro cakucita pyakudawa tayu. Nakuti atambira kudawa, iwo asapitiriza kuthimbana na kudawa kweneku. (Aroma 7:21-25) Natenepa, munthu angakhaladi maso mwakubverana na pipfunziso pya Yezu, iye hanadzakhalabve bitcu wa kudawa tayu. Kudawa nee kunadzatongabve munthu ninga nyakutonga wakuponderera wakuti asafuna kubverwa mwakukakamiza. Munthu unoyu nee anadzapita m’njira ya umaso yakusowa cifuniro yakuti isaipisa cikumbuntima cace. Iye anadzatsanzaya na cikumbuntima cadidi pamaso pa Mulungu thangwi alekererwa madawo akale kubulukira m’cikhulupiro cace m’ntsembe ya Kristu. Pipendamiro pyakudawa pingakwanise kuyesera kupangizika, mbwenye munakhonda munthu kucita pyakuipa thangwi ya kunyerezera pipfunziso pyakucena pya Kristu, iye asapangiza kuti kudawa kusantongabve tayu.—Aroma 6:12-17.
8. (a) Kodi Cikristu candimomwene cisatipasa ufulu wanji? (b) Kodi tisafunika kuona tani mautongi a dziko?
8 Onani ufulu unatsanzaya na ife ninga Akristu. Tasudzuka ku pyakubwereswa na pipfunziso pyaunthawatawa, ku ubitcu wa kukhulupira mizimu na wa kudawa. Undimomwene wakudzumatirisa wa nkhaliro wa anyakufa na kulamuswa muli akufa watisudzula ku kugopa kufa kwakusowa basa. Kudziwa kuti mautongi a anthu akusowa ungwiro mwakukhonda dembuka anadzapitirwa mbuto na Umambo wakulungama wa Mulungu kusatisudzula ku kusowa cidikhiro. (Danyele 2:44; Mateo 6:10) Mbwenye, kusudzuka kweneku nee kusabveka tayu kuti tisafunika kukhonda bvera mautongi a dziko na miyambo yawo.—Tito 3:1, 2; 1 Pedro 2:16, 17.
9. (a) Kodi mwakufuna Yahova asatiphedza tani towera kutsanzaya na ufulu ukulu unakwanisika kwa anthu lero? (b) Kodi tinakwanisa tani kucita pyakusankhula pyanzeru?
9 Yahova nee asatisiya tayu kupya na nsuwa wakutoma kuti tidzindikire njira yadidi yakukhala na umaso. Iye asadziwa kucitwa kwathu, pinthu pinatipasa kutsanzaya kwandimomwene na pinatipasa maphindu okhonda mala. Asadziwambo manyerezero na makhaliro akuti angakwanise kufudza uxamwali wa munthu na Mulungu pabodzi na anthu anango, panango kucimwanisa munthu unoyu kufika m’dziko ipswa. Mwakufuna, Yahova asatipanga pinthu pyonsene pyenepi kubulukira m’Biblya na gulu yace yakuoneka. (Marko 13:10; Agalata 5:19-23; 1 Timoti 1:12, 13) Natenepa pisanyindira kuphatisira kwathu ufulu wa kusankhula udatipasa Mulungu towera kusankhula njira inafuna ife kutawira pinatipanga iye. Mwakusiyana na Adamu, tingatoweza pinatipanga Biblya, tinadzacita pyakusankhula pyanzeru. Tinadzapangiza kuti uxamwali wadidi na Yahova ndi cifuno cathu cikulu m’umaso.
Kufuna Ntundu Unango Wa Ufulu
10. Kodi Mboni zinango za Yahova zisasaka ufulu wa ntundu upi?
10 M’midzidzi inango aphale na atsikana akuti ndi Mboni za Yahova—ngakhalembo akulu—angakwanise kupibva kuti asafuna ntundu unango wa ufulu. Dziko ingakwanise kuoneka ninga iri na pinthu pyakutundusa, munanyerezera iwo pinthu pyenepi, cifuno cawo cakucita pinthu pyakukhonda khala pyacikristu pyakudziwika kakamwe m’dziko cisakula. Anthu anewa panango nee asanyerezera kuphatisira mwakuipa mitombwe yakuledzeresa, kumwa kwakupiringana ndida peno kucita ulukwali. Mbwenye iwo asatoma kufambirana na anthu akuti si Akristu andimomwene tayu, mbafuna kukhala akutawirika kwa iwo. Iwo angakwanisembo kutoma kusangizira malongero na makhaliro awo.—3 Jwau 11.
11. Kodi m’midzidzi inango mbani anaticitisa kufuna kucita pinthu pyakuipa?
11 M’midzidzi inango anthu anango analonga kuti asatumikira Yahova ndiwo anaticitisa kupita m’makhaliro akuti si Acikristu tayu. Pyenepi pyacitika kwa Akristu anango a piaka dzana yakutoma, na pinthu pibodzibodzi pingakwanise kucitika lero. Kazinji kene anthu anewa asafuna kucita pinthu pinaona iwo kuti pinadzaatsanzayisa, mbwenye pinthu pyenepi mphyakuphonyana na miyambo ya Mulungu. Iwo asakulumiza anango kuti akhale na “kutsanzaya” kubodzi kwene. Iwo ‘asapikira anzawo ufulu, mbwenye iwo ndi mabitchu akutayika.’—2 Pedro 2:19.
12. Kodi ndi maphindu api akutsukwalisa anabwereswa na makhaliro akusiyana na miyambo na midida ya Mulungu?
12 Nzidzi onsene misapo ya ntundu unoyu wa ufulu ndi yakuipa, thangwi pisabveka kukhonda bvera miyambo ya Mulungu. Mwacitsanzo, kupita m’mabonde mwakuswa mwambo kungakwanise kubweresa kunenseka kwa manyerezero, utenda, kufa, mimba yakukhonda funa na kungakwanise kufudza banja. (1 Akorinto 6:18; 1 Atesalonika 4:3-8) Kuphatisira mitombwe yakuledzeresa kungakwanise kuzunguza manyerezero, kulonga pinthu pyakukhonda bveka, kukhonda kuona pyadidi, mazungu, kukhonda puma mwadidi, kusacitisa munthu kukhala khupwe na kupha. Kungakwanise kucitisa munthu kukhala na cidzoloero cakuipa, cakuti cingakwanise kuntsogolera kucita usumankha towera kudyesa cidzoloero cace. Pinthu pyenepi pisabwereswambo na kumwa kwakupiringana ndida. (Misangani 23:29-35) Ale anapita m’makhaliro anewa anganyerezere kuti ali aufulu, mbwenye m’kupita kwa nzidzi asadzindikira kuti ndiwo mabitcu a kudawa. Ndi nyakutonga wansumankha tani kudawa! Kunyerezera pyenepi cincino kungakwanise kutiphedza kukhala akukoyeka ku pinthu pyenepi.—Agalata 6:7, 8.
Kunatoma Nyatwa
13. (a) Kodi kazinji kene pifuno pinakwekwetera ku nyatwa pisatoma tani? (b) Kodi ndi ntsonga zipi zinafuna ife towera kudziwa kuti “kufambirana na anthu akuipa” ndi ninji? (c) Munatawira imwe mabvunzo adandandalikwa pa ndima 13, gomezerani maonero a Yahova.
13 Nyerezerani kunatoma nyatwa kazinji kene. Biblya isafokotoza: “Kunapenda munthu munthu ndi kusirira kwache, kunansosa mbakunkwekweta. Penepo munthu angapitawira, kusirira kwache kule kunabala mu ntima mwache madawo. Mbwenye madawo angakula, anabala kufa.” (Tyago 1:14, 15) Kodi cifuno ceneci cisatoma tani? Kubulukira ku pire pinapita m’manyerezero. Kazinji kene pyenepi pisacitika kubulukira ku uxamwali unacita ife na anthu akukhonda kuphatisira midida ya Biblya. Mwandimomwene ife tonsene tisadziwa kuti tisafunika kucalira “kufambirana na anthu akuipa.” (1 Akorinto 15:33, MZ) Kodi kufambirana kwakuipa ndi kupi? Kodi Yahova asaona tani pinthu pyenepi? Kunyerezera mabvunzo akutowerera na kuona malemba akusowa mafala m’ndima kukhafunika kutiphedza kufika pa mamalisiro adidi.
Kodi kuoneka kwa anthu anango ninga akulemedzeka pisabveka kuti iwo ndi axamwali adidi? (Genesi 34:1, 2, 18, 19)
Kodi makani awo, panango masenzekero awo, asapangiza kuti tisafunika kucita nawo uxamwali? (Aefesi 5:3, 4)
Kodi Yahova asapibva tani tingasankhula kucita uxamwali na anthu akukhonda kunfuna? (2 Pya dziko ya Israele 19:1, 2)
Maseze tingakwanise kuphata basa peno kuenda ku xikola na anthu akukhonda khala na cikhulupiro cibodzi cene na cathu, thangwi yanji tisafunika kucita mpholemphole? (1 Pedro 4:3, 4)
Kuona televizau na mafilimu, kuphatisira Interneti, na kuleri mabukhu, marevista na tsamba ya mphangwa ndi njira zakucita uxamwali na anango. Kodi ndi pinthu pipi pinafunika ife kucalira pinabuluka m’mphuno zenezi? (Misangani 3:31; Izaiya 8:19; Aefesi 4:17-19)
Kodi kusankhula kwathu axamwali kusapanganji Yahova pya ntundu wa umunthu wathu? (Masalmo 26:1, 4, 5; 97:10)
14. Kodi ndi ufulu upi wakudzumatirisa unadikhira ale anaphatisira mwakukhulupirika uphungu wa Mafala a Mulungu cincino?
14 Dziko ipswa ya Mulungu iri duzi kakamwe. Kubulukira ku utongi wa Umambo wakudzulu, anthu anadzasudzulwa ku pidzoloero pya Sathani na ku makhaliro ace onsene apinthu akuipa. Pang’ono na pang’ono, pyakubwereswa pyonsene na kudawa pinadzabuluswa kwa anthu akubvera, mbadzakhala anthu a manyerezero na manungo aungwiro, towera akwanise kutsanzaya na umaso okhonda mala m’Paradizu. Pakumalisira pyakucitwa pyonsene pinadzatsanzaya na ufulu wakuti uli wakubverana kakamwe na “nzimu wa Mbuya.” (2 Akorinto 3:17) Kodi pisaphata basa kuluza pinthu ipi pyonsene thangwi ya kupwaza uphungu wa Mafala a Mulungu cincino? M’kuphatisira mwanzeru ufulu wathu Wacikristu lero, tendeni tonsene tipangize kuti tisafunadi “ufulu wa mbiri wa ana a Mulungu.”—Aroma 8:21.
Kubwerezera Pidapfunzwa
• Kodi ndi ntundu upi wa ufulu udatsanzaya na banja yakutoma? Kodi pyenepi pisalandaniswa tani na makhaliro a anthu cincino?
• Kodi Akristu andimomwene ali na ufulu wa ntundu wanji? Kodi pyenepi pisasiyana tani na pinaona dziko ninga ufulu?
• Thangwi yanji ndi kwakufunika kakamwe kucalira kufambirana kwakuipa? Mwakusiyana na Adamu, kodi tisafunika kutawira matongero a ani a cadidi na cakuipa?
[Mafoto pa tsamba 46]
Mafala a Mulungu asacenjeza: ‘Lekani kunyengezwa na iwo tayu! Kufambirana na anthu akuipa kusafudza makhaliro adidi’