Nsolo Khumi Nacipfemba
Pitirizani Kulonga Mafala A Mulungu Na Cipapo
1. (a) Kodi ndi mphangwa zipi zadidi zikhamwaza anyakupfunza a Yezu, mbwenye Ayuda anango atawira tani? (b) Kodi tingakwanise kucita mabvunzo api?
CIFUPI na piaka 2.000 ndulimu, Mwana wa Mulungu, Yezu Kristu, adzodzwa towera adzakhale Mambo wa dziko yonsene yapantsi. Yezu aphiwa thangwi ya kukwizira kwa anyamalwa ace auphemberi, mbwenye Yahova amulamusa muli akufa. Kubulukira mwa Yezu, anthu angakwanise kukhala na umaso okhonda mala. Mbwenye, mukhamwaza anyakupfunza a Yezu mphangwa zenezi zadidi, ntcingo watoma. Anango a iwo aikhwa m’kalaboxo, akwapulwa na akhondeswa kulonga pya dzina ya Yezu. (Machitiro 4:1-3, 17; 5:17, 18, 40) Kodi iwo mbadacitanji? Kodi imwe mbumudacitanji? Kodi mbumudapitiriza kupereka umboni mwacipapo?
2. (a) Kodi ndi mphangwa zipi zakudzumatirisa zinafunika kumwazwa m’ntsiku zathu zino? (b) Kodi mbani ali na pitawiriro pya kumwaza mphangwa zadidi zenezi?
2 M’caka ca 1914 Mambo wa Umambo wa Mulungu, Yezu Kristu, aikhwa pa mpando wa umambo kudzulu towera kutonga pakati pa ‘anyamalwa ace.’ (Masalmo 110:2) Buluka penepo, Sathani na mademonyo ace aponywa pa dziko yapantsi. (Apokalipse 12:1-5, 7-12) Tenepa zatoma ntsiku zakumalisa za makhaliro ano akuipa. Nzidzi unoyu ungamala, Mulungu anadzafudza makhaliro a pinthu onsene a Sathani. (Danyele 2:44; Mateo 24:21) Anyakusala maso anadzakhala na cidikhiro ca umaso okhonda mala pa dziko yapantsi yakuti inadzakhala paradizu. Khala imwe mwaphatisisa mphangwa zadidi zenezi, munadzafuna kugawana na anango. (Mateo 24:14) Kodi mungakwanise kudikhiranji?
3. (a) Kodi anthu asatawira tani mphangwa za Umambo? (b) Kodi ndi mbvunzo upi unayang’anisana na ife?
3 Munamwaza imwe mphangwa zadidi za Umambo, anango anadzakomerwa nazo, mbwenye azinji nee anadzatsalakana tayu. (Mateo 24:37-39) Anango angakwanise kukusingirirani peno kukupingizani. Yezu acenjeza kuti kupingizwa kungakwanise kubulukira kwa acibale anu. (Luka 21:16-19) Mungakwanisembo kupingizwa ku basa kwanu peno ku xikola. M’makhundu anango a dziko yapantsi, Mboni za Yahova zisakhondeswa na mautongi. Kodi munadzapitiriza kulonga mafala a Mulungu mwacipapo na ‘kukhala dzololo na mphambvu zakutawira [peno zacikhulupiro]’ mungathimbana na makhaliro anewa?—1 Akorinto 16:13.
Tilekeni Kunyindira Mphambvu Zathu
4. (a) Kodi ndi ninji cinafunika towera tikhale anzakazi akukhulupirika a Mulungu? (b) Thangwi yanji misonkhano Yacikristu ndi yakufunika kakamwe?
4 Cinthu cakufunika towera kukhala nzakazi wakukhulupirika wa Yahova ndi kunyindira masasanyiro ace. Masasanyiro anewa asaphataniza misonkhano ya mpingo. Malemba asatikulumiza kuti tikhonde kuipwaza. (Ahebere 10:23-25) Ale adapitiriza kukhala Mboni zakukhulupirika za Yahova awangisira kugumanika m’misonkhano mokhonda phonya pabodzi na alambiri anzawo. M’misonkhano ineyi cidziwiso cathu ca Malemba cisathimizirika. Kubvesesa kwathu undimomwene wakudziwika mwadidi kusathimizirikambo, na luso yathu ya kuuphatisira isawangiswa. Ife tisafendedzera kakamwe abale athu Acikristu m’ulambiri wakuphatana na tisawangiswa towera kucita cifuno ca Mulungu. Nzimu wa Yahova usapasa citsogolero kubulukira ku mpingo, na kubulukira m’nzimu unoyu, Yezu ali pakati pathu.—Mateo 18:20; Apokalipse 3:6.
5. Kodi Mboni za Yahova zisacita tani misonkhano zingakhondeswa?
5 Kodi musagumanika pa misonkhano yonsene mokhonda phonya, na musaphatisira pinabva imwe kweneko? M’midzidzi inango, Mboni za Yahova zingakhondeswa, zisacita misonkhano m’misoka ming’onoming’ono m’midzi ya abale. Mbuto na nzidzi panango pingakwanise kukhala pyakusiyana na pyakukhonda thema, na misonkhano inango ingakwanise kucitwa na masiku kakamwe. Abale na alongo akukhulupirika asacita pyonsene pinakwanisa iwo towera kugumanika pa misonkhano yonsene ngakhale umaso wawo ukhale pa ngobzi peno makhaliro akhonde kuathemera.
6. Kodi tisapangiza tani kuti tisanyindira Yahova, na cinyindiro ceneci cisatiphedza tani kupitiriza kulonga mwacipapo?
6 Kucita phembero ya pantima mokhonda phonya kwa Yahova kusakulisa cinyindiro cathu kwa iye, mbitidziwa kuti tisafuna ciphedzo ca Mulungu. Kodi musacita pyenepi? Nkati mwa utumiki wace pa dziko yapantsi, Yezu aphembera mwakubwerezabwereza. (Luka 3:21; 6:12, 13; 22:39-44) Namasiku akumalisa iye mbasati kukhomerwa, Yezu adembetera anyakupfunzace: “Khalani m’maso [peno akulindira] mbamulonga maphembero, gopa munadzanyengwa [peno munadzayeserwa].” (Marko 14:38) Anthu angakhonda tawira mphangwa za Umambo, panango tingakwanise kunyerezera kubwerera nduli m’utumiki wathu. Anthu angatisingirira peno kutitcinga, panango tingakwanise kunyerezera kusiya kumwaza mphangwa towera ticalire nyatwa. Mbwenye tingaphembera mwaphinga towera nzimu wa Mulungu utiphedze kupitiriza kulonga mwacipapo, tinadzacalira manyerezero anewa kucitika.—Luka 11:13; Aefesi 6:18-20.
Mbiri Za Umboni Wa Cipapo
7. (a) Thangwi yanji mbiri zinagumanika m’bukhu ya Machitiro ndi zakufunika kakamwe kwa ife? (b) Tawirani mabvunzo anagumanika pantsi pa ndima ino, mbamugomezera kuti mphangwa zenezi zinakwanisa tani kukuphedzani.
7 Mbiri zinagumanika m’bukhu ya Machitiro ndi zakufunika kakamwe kwa ife tonsene. Zisatipanga kuti apostolo na anyakupfunza anango akutoma—anthu akuti akhali na mabvero ninga athu—akunda tani mipingizo na apangiza tani kukhala mboni zacipapo na zakukhulupirika za Yahova. Tendeni tidinge khundu ya mbiri zenezi na ciphedzo ca mabvunzo na malemba akutowerera akusowa mafala m’ndima. Munacita ife pyenepi, onani kuti munaphindula tani na pinaleri imwe.
Kodi apostolo akhali anthu akupfunza mabukhu makulu? Kodi iwo mwacibaliro akhali okhonda gopa m’pinthu pyonsene? (Jwau 18:17, 25-27; 20:19; Machitiro 4:13)
Kodi ndi ninji cidacitisa Pedro kulonga mwacipapo pamaso pa thando yakutonga miseru ya Ciyuda idaphesa Mwana wa Mulungu? (Mateo 10:19, 20; Machitiro 4:8)
Kodi apostolo akhacitanji masumana mangasi mbasati kuendeswa ku Thando ya miseru? (Machitiro 1:14; 2:1, 42)
Mudapangwa apostolo na anyakutonga kuti akhonde kulonga m’dzina ya Yezu, kodi Pedro na Jwau atawira tani? (Machitiro 4:19, 20)
Mudamala iwo kusudzulwa, kodi apostolo apitiriza kuyang’ana kwa ani towera apaswe ciphedzo? Kodi iwo aphembera kuti kutcingwa kumale, peno aphembanji? (Machitiro 4:24-31)
Kodi ndi njira zipi zidaphatisira Yahova towera kuphedza apostolo mudayesera apingizi kulimirisa basa ya kumwaza mphangwa? (Machitiro 5:17-20)
Kodi apostolo apangiza tani kuti akhabvesesa thangwi idaacitisa kusudzulwa? (Machitiro 5:21, 41, 42)
Ngakhale anyakupfunza azinji akhadamwazika na thangwi ya kutcingwa, kodi iwo apitiriza na kucitanji? (Machitiro 8:3, 4; 11:19-21)
8. Kodi ndi maphindu api akukomeresa adabwereswa na utumiki wa anyakupfunza akutoma, na tadzaphatanizwambo tani m’basa ineyi?
8 Basa ya kumwaza mphangwa zadidi nee ikhali yapezi tayu. Anyakupfunza akukwana 3.000 abatizwa pa Pentekoste ya 33 E.C. “Mwinji wa amuna na akazi wakutawira [peno wakukhulupira] Mbuya ukhakula.” (Machitiro 2:41; 4:4; 5:14) M’kupita kwa nzidzi, ngakhale Saulu wa ku Tarsu, wakuti akhatcinga pikulu pyene mbumba ya Mulungu, adzakhala Nkristu mbatoma kupereka umboni wa undimomwene mwacipapo. Iye adzadziwika ninga mpostolo Paulu. (Agalata 1:22-24) Basa idatoma m’piaka dzana yakutoma hidalimira tayu. Iyo ikuthimizirika kakamwe m’ntsiku zino zakumalisa mbifika ku makhundu onsene a dziko yapantsi. Tiri na mwai wa kucita khundu m’basa ineyi, na munacita ife pyenepi, tingakwanise kupfunza kubulukira ku pitsanzo pidaperekwa na mboni zakukhulupirika zidatumikira kalene.
9. (a) Kodi ndi miyai ipi idaphatisira Paulu towera kupereka umboni? (b) Kodi ndi njira zipi zinaphatisira imwe towera kumwaza mphangwa za Umambo kwa anango?
9 Kodi Paulu acitanji mudapfunza iye undimomwene wa pya Yezu Kristu? “Adzamale Saulu atoma kupfundisa . . . pya Yezu, mbati: ‘[Ndiye] Mwana wa Mulungu.’” (Machitiro 9:20) Iye apereka takhuta kwa Mulungu thangwi ya udidi okhonda kunthema, na iye adzindikira kuti anthu onsene akhafuna mphangwa zadidi zidatambira iye. Paulu akhali Muyuda, na mwakubverana na mwambo wa ntsiku zenezire, iye akhaenda ku masinagoga mbapereka umboni. Iye aperekambo umboni ku nyumba na nyumba na anyerezera na anthu m’misika. Iye akhalimbo dzololo towera kufuluka kuenda ku pisa pinango kamwaza mphangwa zadidi.—Machitiro 17:17; 20:20; Aroma 15:23, 24.
10. (a) Kodi Paulu apangiza tani kuti maseze akhali wacipapo, akhadziwambo njira zakupereka umboni? (b) Kodi tinapangiza tani makhaliro a Paulu munapereka ife umboni kwa acibale, anzathu a kubasa, peno anzathu a kuxikola?
10 Paulu akhali wacipapo na wakudzindikira, ninga munafunikira ife kukhala. Iye atundusa Ayuda kubulukira ku pikiro idacita Mulungu kwa makholo awo. Kwa Agerego iye alonga kubulukira ku pinthu pikhadziwa iwo. M’midzidzi inango aphatisira pidatamba iye pakupfunza undimomwene ninga njira yakupereka umboni. Iye alonga: “Ndinaphata mabasa onsene thangwi ya mphangwa zadidi towera ndipabswembo [‘ndigawanembo na anango,’ NM] pya mphangwa zadidi.”—1 Akorinto 9:20-23; Machitiro 22:3-21.
11. (a) Kodi Paulu acitanji towera kucalira kukanana na apingizi ace? (b) Kodi ndi m’nzidzi upi unafunika ife kusangizira mwanzeru citsanzo ca Paulu na m’njira ipi? (c) Kodi zisabuluka kupi mphambvu towera tipitirize kulonga mwacipapo?
11 Mukhaona Paulu kukhala pyadidi kuenda kamwaza mphangwa m’pisa pinango m’nzidzi wakucepa na thangwi ya kupingizwa, iye akhacita pyenepi mbuto mwa kukanana na apingizi. (Machitiro 14:5-7; 18:5-7; Aroma 12:18) Mbwenye cipo iye akhala na manyadzo thangwi ya mphangwa zadidi. (Aroma 1:16) Maseze Paulu nee akhakomerwa na njira zakuipa—ngakhale zauphanga—zikhantsalakanira apingizi ace, iye akhala na ‘cipapo mbakhulupira Mulungu wathu’ towera apitirize kumwaza mphangwa. Iye alonga: “Mbuya akhakhala na ine, mbandiwangisa towera ndimalisire mapfundisiro anga.” (1 Atesalonika 2:2; 2 Timoti 4:17) Nsolo wa mpingo Wacikristu, Yezu, akupitiriza kutipasa mphambvu inafuna ife towera kucita basa idalongeratu iye kuti inadzacitwa m’ntsiku zathu.—Marko 13:10.
12. Kodi ndi ninji cinapereka umboni wakuti Akristu ndi acipapo, na ndi ninji cinaacitisa kukhala acipapo?
12 Tiri na mathangwi mazinji a kupitiriza kulonga mafala a Mulungu mwacipapo, ninga mudacita Yezu na anzakazi anango akukhulupirika a Mulungu m’piaka dzana yakutoma. Pyenepi nee pisabveka kukhala akukhonda tsalakana anango peno kuyesera kukakamiza ale akuti nee asafuna kubva mphangwa tayu. Mbwenye nee tisafunika kusiya thangwi yakuti anthu nkhabe funa kubva; nee kumatamiswa na apingizi. Ninga Yezu, tisaona Umambo wa Mulungu ninga utongi wakulungama wa dziko yonsene yapantsi. Tisalonga na cinyindiro thangwi tisaimirira Yahova, Ntongi Wankulu Wakudzulu na Pantsi, na kuti mphangwa zinamwaza ife si zathu tayu mbwenye ndi zace. Kufuna kwathu Yahova kusafunika kukhale cikulumizo cakuwanga kakamwe cinaticitisa kunsimba.—Afilipi 1:27, 28; 1 Atesalonika 2:13.
Kubwerezera Pidapfunzwa
• Thangwi yanji ndi kwakufunika kugawana mphangwa za Umambo na onsene pingakwanisika, mbwenye tingadikhire matawiro api?
• Kodi tinapangiza tani kuti ife nkhabe nyindira mphambvu zathu zene towera kutumikira Yahova?
• Kodi ndi mapfunziro api akufunika anapfunza ife m’bukhu ya Machitiro?
[Mafoto pa tsamba 173]
Ninga nzidzi wakale, anzakazi a Yahova lero asalonga mafala a Mulungu na cipapo