Dziko Ipswa Idapikirwa Na Mulungu

BIBILYA, Mafala akulembwa a Mulungu, isatipasa cidikhiro munalonga iyo: “Thangwi Mulungu atipikirira kudzulu kupswa na pantsi pano papswa. Penepo panakhalabve pyakuipa tayu, thangwi panachitwa pinafuna Mulungu basi. Ndi pantsi penepo papswa panadikhira ife.”—2 Pedru 3:13.

Kodi “kudzulu kupswa” ndi ninji? Bibilya isalandanisa kudzulu na utongi. (Machitiro 7:49) “Kudzulu kupswa” ndi utongi upswa unafuna kudzatonga dziko yapantsi. Ndi upswa thangwi yakuti unadzakhala m’mbuto mwa makhaliro a utongi wa lero; pontho ndi thanyo ipswa towera cifuniro ca Mulungu cikwanise kucitika. Ndi Umambo unoyu udatipfunzisa Yezu kuphembera. (Mateyu 6:10) Nakuti Mulungu ndi Mphuno ya umambo, na iye asakhala kudzulu, unoyu usacemerwa “umambo wakudzulu.”—Mateyu 7:21, NM.

Kodi ‘pantsi papswa’ ndi ninji? Si mataka mapswa tayu, thangwi Bibilya isalonga mwapakweca kuti dziko inadzakhaliwa kwenda na kwenda. ‘Pantsi papswa’ ndi mbumba ipswa ya anthu. Ndi pantsi papswa thangwi kuipa kunadzamala. (Misanje 2:21, 22) Onsene anadzakhala maso m’nzidzi uneule anadzalemedza na kubvera Nciti na anadzakhala mwakubverana na pinafuna iye. (Masalimo 22:27) Anthu amadziko onsene asaphembiwa kupfunza na kubveranisa cincino umaso wawo na pifuno pyenepi. Kodi imwe musacita pyenepi?

M’dziko ipswa ya Mulungu, munthu onsene anadzalemedza utongi Wace. Kodi kufuna Mulungu kusakucitisani kumbvera? (1 Juwau 5:3) Kodi pyenepi pisaoneka panyumba panu? kubasa peno kuxikola? m’makhaliro a umaso wanu?

M’dziko ipswa ineyo, mbumba ya anthu inadzaphatanizwa pa kulambira Mulungu wandimomwene. Kodi imwe musalambira Nciti wakudzulu na dziko yapantsi? Kodi kulambira kwanu kusakuphatanizanidi na alambiri anzanu a madziko onsene, mitundu yonsene na pilongero pyonsene?—Masalimo 86:9, 10; Yesaya 2:2-4; Zefania 3:9.

[Bokosi pa tsamba 17]

Mulungu Adapikira Pinthu Pyenepi

Iye ndi Nciti wa thambo yakuoneka na dziko yapantsi. Iye ndi ule adacemerwa na Yezu Kristu ninga “Mulungu mbodzi ene wandimomwene.”—Juwau 17:3, NM.

Anthu azinji asalemedza milungu yakucitwa na iwo ene. Pikwi pya pikwi pya anthu pisagodamira adzimunthu akusowa umaso. Anango asalemedza utongi wa anthu, manyerezero a mpfuma, peno pifuno pyawo. Ngakhale ale analonga kuti asaphatisira Bibilya si onsene tayu analemedza dzina ya ule wakuti Bibilya isancemera “Mulungu wandimomwene.”—Deuteronomi 4:35.

Nciti asalonga pya iye ene: “Ine ndine Yahova. Iyi ndi dzina yanga.” (Yesaya 42:5, 8) Dzina ineyi isagumanika m’Bibilya maulendo akukwana 7.000 m’pilongero pyakutoma. Yezu Kristu apfunzisa atowereri ace kuphembera: “Baba wathu wakudzulu, dzina yanu iceneswe.”—Mateyu 6:9, NM.

Kodi Mulungu wandimomwene ndi munthu wa ntundu upi? Iye asapifokotoza ekhene ninga “wantsisi, wakudembuka kuipirwa na wakudzala na udidi na undimomwene” na ule wakuti nkhabe leka kulanga ale anaswa matongero ace mwakufuna. (Ekisodo 34:6, 7) Mbiri ya matsalakaniro ace anthu isapangiza undimomwene wa mafala anewa.

Dzina na munthu analimirira dzina ineyi pisafunika kuceneswa, peno kutsalakanwa ninga pyangwiro. Ninga Nciti na Mambo Wakudzulu na Dziko Yapantsi, iye asathema kubverwa na kulambirwa na ife. Kodi imwe ene musambvera na kumulambira?

[Bokosi/Foto pa tsamba 18]

Kodi ‘Kudzulu Kupswa Na Pantsi Papswa’ Pinadzabweresa Kucinja Kwanji?

Dziko yapantsi inadzakhala Paradizu Luka 23:43

[Bokosi/Mafoto pa tsamba 19]

Kodi Imwe Munadzaphindula?

Mulungu nkhabe longa uthambi!—Titu 1:2.

Yahova asalonga: “Mafala anga . . . nkhabe kudzabwerera kuna ine mwakukhonda phindula, mbwenye anadzacitadi pire pidakomerwa na ine, na anadzapembera m’pinthu pidaatumira ine.”—Yesaya 55:11.

Cincino Yahova ali kucita “kudzulu kupswa na pantsi papswa.” Utongi wakudzulu uli kuphata basa. Makumbiro a ‘pantsi papswa’ amala kucitwa.

Pakumala kulonga pya pinthu pingasi pyakudzumatirisa pinafuna bwereswa kwa anthu na “kudzulu kupswa na pantsi papswa,” Chidziwiso cisatculula Mulungu ene, Mambo Wakudzulu na Dziko Yapantsi, mbalonga: “Chinchino ndinachita pyonsene pipswa!” Pontho, iye alonga: “Lemba pidalonga ine, thangwi mphyamaso na pyakukhulupirika.”—Chidziwiso 21:1, 5.

Mbvunzo wakufunika kakamwe ndi uyu, Kodi tisasanyira makhaliro athu towera tilengesiwe ninga akuthema kucita khundu ya “pantsi papswa” pakutongwa na “kudzulu kupswa”?