“Towera Mukhonde Kupita M’mayesero”

“Khalani akulindira mbumupitiriza na kuphembera, towera mukhonde kupita m’mayesero.”—MATEYU 26:41, NM.

KUNENSEKA kukhali kukulu—kupiringana kunenseka konsene kukhali na iye ndulimu. Yezu Kristu, Mwana wa Mulungu, akhali duzi na kumalisa umaso wace pa dziko yapantsi. Yezu akhapidziwa kuti mwakukhonda dembuka iye mbadamangwa, mbatongwa kufa na kukhomerwa pa ntanda wakusikimiza. Iye akhapidziwa kuti pyonsene pikhafuna iye kucita mbipidakhuya dzina ya Babace. Yezu akhadziwambo kuti cidikhiro ca anthu ca kutsogolo mbicidatongwa. Kodi iye mbadacitanji na kunenseka uku konsene?

² Yezu aenda ku munda wa Getsemani na anyakupfunzace. Yezu akhafuna kakamwe mbuto ineyi. Kweneko iye asiya anyakupfunzace mbabuluka ekhene nsinzo wakucepa. Mukakhala iye ekhene, aphembera mwakuwanga kwa Babace wakudzulu mbaphemba mphambvu, mbalonga pyonsene pikhali m’ntima mwace—tayu kabodzi basi mbwenye m’maulendo matatu. Maseze akhali waungwiro, Yezu hadapibva kuti iye mbadathuka ekhene kunenseka kweneko.—Mateyu 26:36-44.

³ Lero, tisanensekambo. Kumatomero kwa bruxura ino taona pipangizo pyakuti tisakhala m’ntsiku zakumalisa za makhaliro ano akuipa. Mayesero na pinenso pya dziko ya Satana piri kuthimizirika. Pinatonga kucita ife tonsene tinalonga kuti tisatumikira Mulungu pabodzi na mabasa athu pisakhuya dzina yace na pisakhuya kakamwe cidikhiro ca mbodzi na mbodzi wa ife cakukhala maso m’dziko ipswa. Ife tisafuna Yahova. Tisafuna ‘kucita phinga mpaka ntsiku yakumalisa’—kumala kwa umaso wathu peno kumala kwa makhaliro ano, consene cinafuna fika pakutoma. (Mateyu 24:13) Mbwenye tinakwanisa tani kukoya phinga yathu na kukhala akulindira?

⁴ Na kudziwa kuti anyakupfunzace—akale na acincino—mbadadzakhalambo akunenseka, Yezu asembedzera: “Khalani akulindira mbumupitiriza na kuphembera, towera mukhonde kupita m’mayesero.” (Mateyu 26:41) Kodi mafala anewa asabvekanji kwa ife lero? Kodi mukuyang’anisana na mayesero anji? Kodi munakwanisa tani ‘kukhala akulindira’?

Kuyeserwa Towera Kucitanji?

⁵ Ntsiku zonsene tonsene tisayeserwa kutawira ‘misampha ya Diyabu.’ (2 Timoti 2:26) Bibilya isaticenjeza kuti Satana asafuna makamaka kuphata alambiri a Yahova. (1 Pedru 5:8; Chidziwiso 12:12, 17) Thangwi yanji? Si thangwi yakufuna kutipha tayu. Satana nkhabe pembera tikafa mwakukhulupirika kwa Mulungu. Satana asapidziwa kuti Yahova, m’nzidzi Wace ene, anadzamalisa kufa m’kulamusa akufa.—Luka 20:37, 38.

⁶ Satana asafuna kufudza cinthu cakufunika kakamwe kupiringana umaso wathu wa cincino—umumphu wathu kwa Mulungu. Satana asadzudzumika na kufuna kupangiza kuti angakwanise kutipeusa kwa Yahova. Inde, tikacitiswa kukhonda khulupirika—mbitisiya kumwaza mphangwa zadidi peno kusiya midida Yacikristu—uku mbukudakhala kupembera kwa Satana! (Aefesu 6:11-13) Natenepa “Nyakuyesera” asaikha mayesero pamaso pathu.—Mateyu 4:3, NM.

⁷ “Njira zakunyengeta” za Satana ndi zakusiyasiyana. (Aefesu 6:11, Jewish New Testament) Iye angakwanise kutiyesera na kufuna mpfuma, kugopa, kupenula peno kusaka kupitsanzayisa. Mbwenye njira zace zakuphata basa kakamwe zisaphataniza kufewesa. Nakuti iye asasaka kubanza mwai, iye asapidziwa kuti kutsukwala kungakwanise kutifewesa, mbitikhala m’ngobzi ya kutawira mayesero. (Misanje 24:10) Iye asatiyesera kuti tisiye pyonsene makamaka tikapibva ‘akudzadzadika.’—Masalimo 38:8.

⁸ Nakuti tikufika duzi kakamwe na kumala kwa ntsiku zakumalisa, mathangwi akufewesa asaoneka ninga akuthimizirika, na iwo asatikhuya. (Onani bokosi “Pinthu Pingasi Pyakutifewesa.”) Mathangwi onsene angakwanise kufudza mphambvu zathu. ‘Kubanza ntsiku’ towera kucita mabasa auzimu—kupfunza Bibilya, kuenda ku misonkhano Yacikristu na kucita khundu m’utumiki—kungakwanise kuoneka ninga cinenso khala manungo anu, manyerezero anu na kupibva kwanu pyaneta. (Aefesu 5:15, 16) Kumbukani kuti Nyakuyesera asafuna kuti imwe musiye pyonsene. Mbwenye uyu si nzidzi wakudembuka peno wakuluza phinga yanu thangwi ya midzidzi inakhala ife! (Luka 21:34-36) Kodi munakwanisa tani kupirira mayesero na kukhala akulindira? Dingani manyerezero manai akuti angakwanise kukuphedzani.

‘Pitirizani Na Kuphembera’

⁹ Nyindirani Yahova m’phembero. Kumbukani citsanzo ca Yezu m’munda wa Getsemani. Kodi acitanji mukakhala iye na kunenseka kukulu? Iye aphemba ciphedzo kwa Yahova, mbaphembera mwakuwanga kakamwe kwakuti ‘kaluma yace yadjodja ninga mathotho a ciropa.’ (Luka 22:44) Nyerezerani pyenepi. Yezu akhandziwa mwadidi Satana. Kubulukira kudzulu Yezu akhadaona mayesero onsene anaphatisira Satana m’kuwangisira kwace kuphata atumiki a Mulungu. Mbwenye Yezu hadanyerezera kuti iye mbadapiringana mwakukhonda nensa pyonsene pikafuna kuikha Nyakuyesera pamaso pace. Khala Mwana waungwiro wa Mulungu abva kuti akhafunika kuphembera towera agumane ciphedzo na mphambvu yaumulungu, ndi kwakufunika tani kuti ife tipibve tenepa!—1 Pedru 2:21.

¹⁰ Kumbukani pontho kuti mudamala iye kusembedzera anyakupfunzace kuti ‘apitirize na kuphembera,’ Yezu alonga: “Inde, nzimu usapifuna, mbwenye manungo ndi akufewa.” (Mateyu 26:41) Kodi Yezu akhalonga pya manungo a ani? Ndimomwene kuti si manungo ace tayu; nee pakhali cinthu cakufewa m’manungo ace aungwiro aumunthu. (1 Pedru 2:22) Mbwenye ipi pikhadasiyana na anyakupfunzace. Thangwi ya kutambira unthaka wakusowa ungwiro na pipendamiro pyakudawa, iwo akhafuna kakamwe ciphedzo towera apirire mayesero. (Aroma 7:21-25) Na thangwi ineyi iye aasembedzera—pabodzi na Akristu onsene andimomwene nduli mwawo—kuphembera towera agumane ciphedzo akayang’anisana na mayesero. (Mateyu 6:13) Yahova asatawira maphembero anewa. (Masalimo 65:2) M’njira ipi? Yang’anani njira ziwiri.

¹¹ Yakutoma, Mulungu asatiphedza kudzindikira mayesero. Mayesero a Satana ndi sawasawa na misampha yakumwazwa m’njira yacidima. Mukakhonda kuiona, ingakwanise kukumangani. Mukuphatisira Bibilya na mabukhu akubuluswa m’Bibilya, Yahova asapangiza misampha ya Satana, m’njira ineyi mbatiphedza kukhonda tawira mayesero. M’kupita kwa piaka, mabukhu akudindwa, misonkhano ya gawo na ndandanda ya misonkhano inango piri kuticenjeza mwakuphindikiza pya ngobzi ninga kugopa anthu, kuphatisira piwalo pyakubala m’njira yakuipa, kufuna mpfuma na mayesero anango ausatana. (Misanje 29:25; 1 Akorintu 10:8-11; 1 Timoti 6:9, 10) Kodi imwe nkhabe pereka takhuta kwa Yahova thangwi yakuticenjeza pya njira za Satana? (2 Akorintu 2:11) Macenjezo onsene awa ndi ntawiro wa maphembero anu aciphedzo towera kupirira mayesero.

¹² Yaciwiri, Yahova asatawira maphembero athu m’kutipasa mphambvu yakupirira mayesero. Mafala ace asalonga: “Mulungu . . . nkhabe dzatawira kuti muyeswe kupiringana mphamvu zanu tayu; kwache ndzidzi unayeswa imwe, iye mwenechiroache anadzakusasanyirani njira yakupulumuka nayo.” (1 Akorinto [Akorintu] 10:13, CC) Mulungu nkhabe kudzatawira kuti mayesero akhale akulemera kakamwe kwakuti tisowe mphambvu yauzimu yakupirira—tikapitiriza na kunyindira iye. Kodi iye ‘asatisasanyira tani njira yakupulumuka nayo’? Iye ‘asapasa nzimu wace ale anamphemba.’ (Luka 11:13) Nzimu unoyu ungakwanise kutiphedza kukumbuka midida ya Bibilya yakuti isawangisa kupitonga kwathu kwakucita pyakulungama na kutiphedza kucita kusankhula kwanzeru. (Juwau 14:26; Yakobo 1:5, 6) Unoyu ungakwanise kutiphedza kupangiza makhaliro aneale anafuna ife towera kukunda pipendamiro pyakuipa. (Agalasi 5:22, 23) Nzimu wa Mulungu ungakwanisembo kucitisa anyakukhulupira anzathu ‘kutiphedza pikulu pene.’ (Akolose 4:11, CC) Kodi imwe nkhabe pereka takhuta kwa Yahova thangwi ya kutawira maphembero anu a ciphedzo m’njira ineyi yakufuna?

Khalani Akulinganira M’pinthu Pinadikhira Imwe

¹³ Towera kukhala akulindira, tisafunika kukhala akulinganira m’pinthu pinadikhira ife. Ife tonsene tisaneta thangwi ya pinenso pya umaso. Mbwenye tisafunika kukumbuka kuti Mulungu cipo apikira kuti ife nkhabe kudzakhala akusowa nyatwa m’makhaliro awa akale. Ngakhale kalene kakamwe, atumiki a Mulungu ayang’anisana na pinenso, pyakuphataniza ntcingo, ucerengi, kutsukwala na kuduwala.—Machitiro 8:1; 2 Akorintu 8:1, 2; 1 Atesalonika 5:14; 1 Timoti 5:23.

¹⁴ Lero, tinapinensombo. Tingakwanise kuyang’anisana na ntcingo, nyatwa yakusowa kobiri, kuthimbana na kutsukwala, kuduwala na kuona nyatwa m’njira zinango. Khala Yahova asatitsidzikiza m’njira yacirengo m’nyatwa zonsene, kodi pyenepi mbipidawangisa Satana kusingirira Yahova? (Misanje 27:11) Yahova asatawirisadi kuti atumiki ace ayeserwe, panango mpaka kufa m’manja a apingizi nzidzi mbudzatifika.—Juwau 16:2.

¹⁵ Kodi Yahova apikiranji mphapo? Ninga mudamala ife kupiona, iye apikira kuti anadzatipasa mphambvu yakupirira mayesero onsene anagumana ife, tikannyindira mwakukwana. (Misanje 3:5, 6) Kubulukira ku Mafala ace, nzimu wace na gulu yace, iye asatitsidzikiza mwauzimu, mbatiphedza kukoya uxamwali wathu na iye. Tikakoya uxamwali wadidi, ngakhale tikafa, tapembera. Nkhabe cinthu—ngakhale kufa—cakuti cingakwanise kukhondesa Mulungu kupasa sagwati atumiki ace akukhulupirika. (Aheberi 11:6) M’dziko ipswa yakuti cincino iri paduzi, Yahova anacimwana tayu kukwanirisa mapikiro ace anango onsene akudzumatirisa akupasa nkhombo kwa ale anamfuna.—Masalimo 145:16.

Kumbukani Pinthu

¹⁶ Towera kupirira mpaka ntsiku yakumalisa, tisafunika kukumbuka pinthu pyakufunika pidaphatanizwa m’kutawirisa Mulungu uipi. Khala nyatwa zathu zisaoneka midzidzi inango ninga zakulemera nakuti ife tisayeserwa kusiya pyonsene, tisafunika kupikumbusa tekhene kuti Satana apomokera kuthema kwa utongi ukulu wa Yahova. Nyakunyengeta unoyu apomokerambo kupipereka na umumphu wa alambiri a Mulungu. (Yobi 1:8-11; 2:3, 4) Pinthu pyenepi pabodzi na njira idasankhula Yahova kupitonga ndi pikulu kakamwe kupiringana mbodzi na mbodzi wa ife. M’njira ipi?

¹⁷ Kutawirisa nyatwa Mulungu m’nzidzi wakucepa kusapasa nzidzi wakuti anango atambire undimomwene. Nyerezerani pyenepi: Yezu acerenga towera tikwanise kukhala na umaso. (Juwau 3:16) Kodi ife nkhabe komerwa na pyenepi? Mbwenye tisatawira kupirira nyatwa m’nzidzi wakulapha pang’ono towera anango akwanise kugumana umaso? Towera kucita phinga mpaka ntsiku yakumalisa, tisafunika kudzindikira kuti nzeru za Yahova ndi zikulu kakamwe kupiringana zathu. (Yesaya 55:9) Iye anadzamalisa uipi m’nzidzi wadidi wakutonga pinthu pyenepi kwenda na kwenda towera tikhale mwadidi m’nzidzi okhonda mala. Mwandimomwene, kodi mbipidacitika tani m’njira inango? Mulungu si wakukhonda lungama tayu!—Aroma 9:14-24.

‘Fendedzerani Mulungu’

¹⁸ Towera kukoya phinga yathu, tisafunika kukhala duzi na Yahova. Cipo lekani duwala kuti Satana asacita pyonsene pinakwanisa iye towera kufudza uxamwali wathu wadidi na Yahova. Satana asafuna kuti tikhulupire kuti cipo kumala kunadzafika na kumwaza mphangwa zadidi peno kukhala na umaso wakutsogolerwa na midida ya Bibilya nkhabe cifuniro. Mbwenye iye “ndiye nyauthambi ene anabala pyauthambi pyonsene!” (Juwau 8:44) Ife tisafunika kupitonga ‘kuumira Satani.’ Uxamwali wathu na Yahova si cinthu ca ntengo wakucepa tayu. Bibilya isatisembedzera mwakufuna: “Mufendezere Mulungu, Mulungu anakufendezerani.” (Yakobo 4:7, 8) Kodi munakwanisa tani kufendedzera kakamwe Yahova?

¹⁹ Kunyerezera na phembero mphyakufunika. Pinenso pyaumaso pikaoneka ninga pyakulemera, longani pyonsene piri m’ntima mwanu kwa Yahova. Mukalongeratu pinenso pyanu m’phembero, munadzaona mwakukhonda nensa ntawiro wace wa maphembero anu. Panango ntawiro unoyu ungakwanise kusiyana na pire pikhanyerezera imwe, mbwenye khala kufuna kwanu ndi kwakumulemedza na kukoya umumphu, iye anadzakupasani ciphedzo cinafuna imwe towera mukwanise kupembera m’kupirira kwanu. (1 Juwau 5:14) Mukaona citsogolero cace m’umaso wanu, munadzamfendedzera kakamwe. Mphyakufunikambo kuleri na kunyerezera makhaliro na njira za Yahova, ninga pinapangizwa m’Bibilya. Kunyerezera kweneko kusakuphedzani kundziwa mwadidi; kusakhuya ntima wanu na kusazikisa kumfuna kwanu. (Masalimo 19:14) Kupiringana pyonsene, kufuna kweneko kunadzakuphedzani kupirira mayesero na kukhala akulindira.—1 Juwau 5:3.

²⁰ Towera kukhala duzi na Yahova, mphyakufunikambo kukhala duzi na alambiri anzathu. Ipi pinadzalongwa m’khundu yakumalisa ya bruxura ino.

MABVUNZO A PFUNZIRO

• Kodi Yezu acitanji mukakhala iye na kunenseka kukulu duzi na kumala kwa umaso wace, na iye asembedzera anyakupfunzace kuti acitenji? (Ndima 1-4)

• Thangwi yanji Satana asafuna kuphata alambiri a Yahova, na iye asatiyesera m’njira zipi? (Ndima 5-8)

• Towera tipirire mayesero, thangwi yanji tisafunika kupitiriza na kuphembera (Ndima 9-12), kukhala akulinganira m’pinthu pinadikhira ife (Ndima 13-15), kukumbuka pinthu (Ndima 16-17), na ‘kufendedzera Mulungu’ (Ndima 18-20)?

[Bokosi pa tsamba 25]

Pinthu Pingasi Pyakutifewesa

Ungumi/thunga. Khala tisanenswa na utenda okhonda mala peno kucimwaniswa kucita pinthu na kukalamba, tingakwanise kutsukwala thangwi ife nkhabe kwanisabve kucita pizinji m’kutumikira Mulungu.—Aheberi 6:10.

Kuphata mwala. Tingakwanise kubva kupha ntima tikaona kuti kuwangisira kwathu kumwaza Mafala a Mulungu kusatawirwa pang’ono.—Misanje 13:12.

Kupibva wakukhonda thema. Thangwi ya kuthabuswa m’piaka pizinji, munthu angakwanise kukhulupira kuti iye nkhabe funiwa, ngakhale na Yahova ene.—1 Juwau 3:19, 20.

Kupha ntima. Khala munthu axolwa pikulu pene na nyakukhulupira nzace, angakwanise kutsukwala kakamwe mpaka kufuna limira kuenda ku misonkhano Yacikristu peno kucita khundu m’basa ya m’munda.—Luka 17:1.

Ntcingo. Anango akuti si alambiri anzanu angakwanise kukupingizani, kukutcingani peno kukusingirirani.—2 Timoti 3:12; 2 Pedru 3:3, 4.

[Foto pa tsamba 26]

Yezu atisembedzera ‘kupitiriza na kuphembera’ towera tigumane ciphedzo cakuthimbana na mayesero