Kodi Yezu Abalwa Mu Nthanda Ya Maindza?

BHIBHLYA nkhabe kutipanga ntsiku idabalwa Yezu. Mbwenye isatiphedza kudziwa kuti iye nee abalwa mu nthanda ya Maindza.

Nyerezerani makhaliro a ndzidzi unoyu wa caka ku Betlehemu, kudabalwa Yezu. Nthanda Yaciyuda ya Kasleu (inaphataniza nthanda ya Bingu na Maindza) ikhali yakuthondola na yakubvumba kakamwe. Nthanda yakutowerera ikhali Tebete (Maindza na Thongwe). Nthanda ineyi ikhali yakuthondola kakamwe kupiringana zonsene pa caka, na m’midzidzi inango m’mapiri mukhaoneka miyala ya madzi ninga matalala. Tendeni tione pinatipanga Bhibhlya thangwi ya makhaliro a ndzidzi mu cisa ceneci.

Mulembi wa Bhibhlya, Esdra, asapangiza kuti Kasleu ikhali nthanda yakudziwika na kuthondola na yakubvumba kakamwe. Pakumala kulonga kuti mwinji wa anthu ukhadagumanyikana ku Yerusalemu ‘mu ntsiku yacimakumawiri ya nthanda yacipfemba [Kasleu],’ Esdra apangiza kuti anthu ‘akhadzadzamira thangwi mulungu akhabvumba maningi.’ Anthu adagumanyikana alonga thangwi ya makhaliro a ntsiku mu ndzidzi unoyu wa caka mbati: “mulungu ali kubvumba. Nkhabebve munthu anakwanisa kukhala panja.” (Esdra 10:9, 13; Yeremiya 36:22) Natenepa, si pyakudzumisa tayu kuti akumbizi a cisa ceneci acita masasanyiro kuti iwo na mikumbi yawo akhonde kukhala kudambo namasiku a nthanda ya Maindza!

Mbwenye Bhibhlya isalonga kuti masiku adabalwa Yezu akumbizi akhali kunja mbakakumbiza mikumbi yawo. Mulembi wa Bhibhlya, Luka, asapangiza kuti mu ndzidzi unoyu ‘akhalipo akumbizi akhakumbiza mikumbi yawo kudambo na masiku’ cifupi na Betlehemu. (Luka 2:8-12) Onani kuti akumbizi nee akhafamba basi kudambo namasikati, mbwenye iwo akakhala kudambo. Iwo akhali na mikumbi yawo kudambo namasiku. Kodi kukhala kudambo kusabverana na makhaliro akuthondola na akubvumba a Betlehemu mu nthanda ya Maindza? Nkhabe. Natenepa, pidacitika mu ndzidzi udabalwa Yezu pisapangiza kuti iye nee abalwa mu nthanda ya Maindza.a

Mafala a Mulungu asatipanga ntsiku idafa Yezu, mbwenye asapereka mphangwa zakucepa za ntsiku idabalwa iye. Ipi pisatikumbusa mafala a Mambo Salomoni: “Mphyadidi kupaswa mbiri kupita kudzodzwa mafuta akununkhira; ntsiku ya kufa kwathu njadidi kupita ntsiku ya kubalwa kwathu.” (Koelete 7:1) Natenepa, nee ndi pyakudzumisa kuona kuti Bhibhlya isapereka mphangwa zizinji zinalonga pya utumiki na kufa kwa Yezu, mbwenye isapereka mphangwa zakucepa thangwi ya ntsiku idabalwa iye.