Kumwaza “Mphangwa Zadidi Thangwi ya Yezu”

1, 2. Ninji pidacitika mu ndzidzi udayesera apingizi kukhondesa mbumba ya Mulungu kumwaza mphangwa mu ndzidzi wa apostolo?

MWAKUKHONDA dikhira Akristu atoma kutcingwa, pontho Saulo atoma kutsalakana “mwakuipa kakamwe” mpingo. (Mabasa 8:3) Anyakupfundza athawa, natenepa anthu anango akhanyerezera kuti Saulo mbadakhondesa Akristu kumwaza mphangwa. Mbwenye pidamwazika Akristu anewa, kwacitika cinthu cakukhonda dikhira. Ndi cinthu cipi ceneci?

² Akristu anewa adabalaliswa atoma kumwaza “mphangwa zadidi” m’mbuto zikathawira iwo. (Mabasa 8:4) Pyenepi pikhali pyakudzumatirisa kakamwe! Anthu anewa nee asiya kumwaza mphangwa zadidi thangwi yakutcingwa, m’mbuto mwace kutcingwa kweneku kwacitisa kuti mphangwa zadidi zimwazwe m’mbuto zizinji! Anthu anewa akhatcinga anyakupfundza, mwakukhonda dziwa aphedzera toera basa yakumwaza mphangwa zadidi za Umambo wa Mulungu zifike m’mbuto zakutali kakamwe. Mu ndima zinatowera, tinaona pinthu pyenepi pyakuti pikucitikambo mu ntsiku zathu zino.

“Ale Adabalaliswa” (Mabasa 8:4-8)

3. (a) Kodi Filipi akhali ani? (b) Thangwi yanji anthu azinji a ku Samariya akhadzati kubva mphangwa zadidi, pontho ninji pidalonga Yezu pyakuti mbapidacitika ku Samariya?

³ M’bodzi mwa “ale adabalaliswa” akhali Filipi.a (Mabasa 8:4; Onani bokosi ya nsolo wakuti “‘M’mwazi Mphangwa’ Filipi” pa tsamba 59.) Iye akhadaenda ku Samariya, cisa cakuti anthu azinji nee akhadabva kale mphangwa zadidi za Umambo, mbwenye ntsiku inango Yezu akhadapanga anyakupfundzace: “Lekani kupita mʼmizinda ya Asamariya; mbwenye pitirizani kusaka mabira akutayika a dzindza ya Izraeli.” (Mat. 10:5, 6) Mbwenye Yezu akhadziwa kuti anthu a ku Samariya mbadabva mphangwa zadidi, natenepa, mbadzati kuenda kudzulu iye alonga: “Munadzakhala amboni anga mu Yerusalemu, ku Yudeya konsene na ku Samariya, mpaka kunkhomo kwa dziko yapantsi.”—Mabasa 1:8

4. Anthu a ku Samariya atawira tani mphangwa zikhamwaza Filipi, pontho ninji panango pidaacitisa toera kutawira kubva mphangwa zace?

⁴ Filipi aona kuti ku Samariya pinthu “pyamala kukola toera kubvunwa.” (Juw. 4:35) Natenepa, mphangwa zikhamwaza iye zikhali ninga n’thundzi kuna ale akhali mwenemo, pontho pyakhala pyakukhonda nentsa kuna anthu kubvesesa mphangwa zenezi. Ayuda nee akhabverana na Asamariya, pontho Ayuda azinji akhaida Asamariya. Ngakhale tenepo, mphangwa zadidi zikhamwazwa kuna anthu onsene, mwakusiyana na pikhakhulupira Afarisi. Afarisi akhali na tsankhulo, pontho akhaoneka ninga akufunika kakamwe kupiringana anango. Filipi nee akhali na tsankhulo, iye apangiza pyenepi mudamwaza iye mphangwa zadidi mwaphinga kuna Asamariya akuti akhaoniwa ninga anthu akusowa basa. Ndi thangwi yace nee ndi pyakudzumatirisa kuona kuti anthu azinji a ku Samariya ‘akhabvesera mwadidi’ pikhalonga Filipi.—Mabasa 8:6.

5-7. Akristu angakakamizwa toera kusiya nyumba zawo, kodi pyenepi pisaaphedza tani toera kumwaza mphangwa zadidi mbuto zinango?

⁵ Ninga mu ndzidzi wa apostolo, lero atumiki a Yahova nee asasiya kumwaza mphangwa thangwi yakutcingwa. Kazinji kene, Akristu asakakamizwa toera abuluke mupisa pyawo kuti akakhale mupisa pinango peno kuikhwa nkaidi, mbwenye pyenepi pisacitisa kuti anthu azinji akwanise kubva mphangwa zadidi za Umambo. Mwacitsandzo, mu ndzidzi wa Nkhondo Yaciwiri ya pa Dziko Yonsene Yapantsi, Mboni za Yahova zamwaza mphangwa mu ndzidzi ukhali iwo ku mazunde a ku Nazi. Muyuda unango adadziwa Mboni za Yahova ku mazunde anewa alonga: “Cipapo cikhali na Mboni za Yahova zakuti zikhali nkaidi, candicitisa kuona kuti cikhulupiro cawo cikhabulukiradi m’Bhibhlya, pyenepi pyandicitisa kukhalambo m’bodzi wa Mboni za Yahova.”

⁶ Midzidzi inango, ale anatitcinga angamwazirwa mphangwa, iwo asatawira. Mwacitsandzo, m’bale Franz Desch wakuti ndi m’bodzi wa Mboni za Yahova pidabuluswa iye nkaidi mbaendeswa ku mazunde a ku Gusen ku Austria, iye amwazira mphangwa m’bodzi wa akadamu a ku mazunde. Mwandimomwene, iwo adzakhala akutsandzaya kakamwe uwiri wawo pidagumanikana iwo pa nsonkhano wa gawo wa Mboni za Yahova, pontho uwiri wawo akhali amwazi m’mphangwa zadidi!

⁷ Pyenepi pyacitikambo na Akristu adasiya dziko yawo mbaenda ku dziko inango thangwi yakutcingwa. Mwacitsandzo, mu pyaka 1970, Mboni za Yahova zizinji za ku Malawi zathawira ku Mosambiki, kweneko iwo amwaza mphangwa zadidi kuna anthu mwaphinga. Maseze mukupita kwa ndzidzi, Mboni za Yahova za Mosambiki zatcingwa, mbwenye basa yakumwaza mphangwa nee yalimira. M’bale Francisco Coana alonga: “Ndimomwene kuti azinji a ife aikhwa nkaidi kazinji kene thangwi ya kumwaza mphangwa. Mbwenye kuona kuti anthu azinji akhatawira mphangwa za Umambo, pyatiphedza toera kukhala na cinyindiro cakuti Mulungu asatipasa nkhombo ninga pikhacita iye na Akristu a mu ndzidzi wa apostolo.”

8. Nkhondo na nyatwa yakusoweka kwa mabasa pyaphedza tani basa yakumwaza mphangwa?

⁸ Ndimomwene kuti nee ndi kutcingwa kunacitwa Akristu basi kunacitisa kuti anthu a mbuto zakusiyana-siyana atawire mphangwa zadidi. Mu pyaka pya cincino, anthu azinji afuluka mbaenda m’madziko anango thangwi ya nkhondo peno thangwi yakusoweka kwa mabasa, pyenepi pyaacitisa toera kubva mphangwa zadidi na kupfundza Bhibhlya m’mbuto zenezi zidaenda iwo. Kazinji kene anthu anewa asalonga pilongero pyakusiyana, pontho asafunika amwazi mphangwa azinji toera akwanise kuamwazira mphangwa mu pilongero pyawo. Kodi imwe musawangisira toera kumwaza mphangwa kuna anthu “a madzindza onsene, a mbumba zonsene na a pilongero pyonsene” mu cisa canu?—Apok. 7:9.

“Ndipasenimbo Mphambvu Ineyi” (Mabasa 8:9-25)

9. Kodi Simau akhali ani, pontho ninji panango pidancitisa kufendedzera Filipi?

⁹ Filipi acita pirengo pizinji ku Samariya. Mwacitsandzo, iye akhawangisa anyakulamala, pontho akhabulusa madimonyo. (Mabasa 8:6-8) Mamuna m’bodzi adzumatirwa kakamwe na pirengo pikhacita Filipi. Mamuna unoyu akhali Simau wakuti akhacita pinthu pizinji na ciphedzo ca madimonyo, pontho anthu azinji akhamulemedza mbalonga kuti: “Munthu uyu ali na Mphambvu ya Mulungu.” Simau pidaona iye pirengo pikhacita Filipi, iye adzindikira kuti mphambvu ikhaphatisira Filipi toera kucita pirengo pyenepi, mwandimomwene ikhabuluka kuna Mulungu, pontho Simau adzakhala Nkristu. (Mabasa 8:9-13) Mphapo ninji pidacitisa Simau kukhala Nkristu?

10. (a) Kodi Pedhru na Juwau acitanji ku Samariya? (b) Kodi Simau acitanji pidaona iye anyakupfundza apswa mbakatambira nzimu wakucena pikhasandzikirwa iwo manja na Pedhru na Juwau?

¹⁰ Pidabva apostolo kuti anthu azinji a ku Samariya akukhala Akristu, iwo atuma Pedhru na Juwau toera aende kweneko. (Onani bokosi ya nsolo wakuti “Pedhru Aphatisira ‘Maxavi a Umambo.’”) Pidafika iwo, apostolo anewa asandzikira manja anyakupfundza apswa, buluka penepo atambira nzimu wakucena.b Simau pidaona iye pyenepi akomerwa kakamwe, mbapanga apostolo: “Ndipasenimbo mphambvu ineyi, toera munthu anafuna ine kusandzikira manja anga, atambire nzimu wakucena.” Simau ayesera kuapasa kobiri toera kugula mphambvu yakucita pirengo pyenepi!—Mabasa 8:14-19.

11. Ndi uphungu upi wamphambvu udapereka Pedhru kuna Simau, pontho Simau atawira tani?

¹¹ Pedhru asandika Simau mwacipapo. Iye alonga: “Kobiri yako mbife pabodzi na iwe, thangwi wanyerezera kuti na kobiri, mbudakwanisa kugula muoni wa Mulungu.” Buluka penepo, Pedhru apanga Simau toera atcunyuke, pontho acite phembero toera alekererwe. Pedhru alonga: ‘Dembetera Yahova toera pingakwanisika, iye akulekerere manyerezero akuipa ali muntima mwako.’ Pisaoneka kuti Simau nee akhali munthu wakuipa thangwi iye akhafuna kakamwe kucita pinthu pyadidi; mbwenye pa ndzidzi unoyu, iye atawirisa kuti pifuno pyakuipa pintsogolere. Natenepa iye adembetera kuna apostolo: “Dembeterani Yahova, toera pinthu pyonsene pidalonga imwe pikhonde kundicitikira.”—Mabasa 8:20-24.

12. Ninji pinapangiza kuti m’mauphemberi authambi anthu asagula peno kugulisa pidzo piri na iwo?

¹² Kusandika kudacita Pedhru kuna Simau ndi cenjezo kuna Akristu lero. Pontho cenjezo ineyi isatipfundzisa kuti ndi pyakuipa kudyekera peno kudyekerwa toera munthu akhale na miyai mu mpingo. Mbwenye kuna mauphemberi authambi kucita pyenepi nee ndi pyakuipa. Mwacitsandzo, bukhu inango ya Encyclopedia Britannica ya 1878 yalonga kuti “mu ndzidzi ukhasankhulwa anthu toera akhale Papa, pisaoneka pakweca kuti iwo akhapereka kobiri toera akhale na cidzo ceneci. Azinji a iwo nee akhali na manyadzo thangwi yakucita pyenepi, pontho iwo nee akhacita pyenepi n’cibisobiso.”

13. Nkristu anacalira tani madawo akugulisa peno kugula miyai yakutumikira mu mpingo?

¹³ Akristu asafunika kucalira kugula peno kugulisa miyai yakutumikira mu mpingo. Mwacitsandzo, iwo nee asafunika kupereka miyoni inapangiza kuti ali kudyekera ale anatsogolera peno kuasimba kakamwe thangwi yakufuna kutambira miyai yakutumikira mu mpingo. Kusiyapo pyenepi, ale anatsogolera mu mpingo asafunika kucalira kupasa munthu miyai yakutumikira basi ene thangwi munthu unoyu ali na mpfuma. Pitsandzo piwiri pyene ndi pyakuipa. Mwandimomwene atumiki onsene a Mulungu asafunika kukhala ninga ‘anang’ono’ mbadikhira nzimu wa Yahova toera usankhule okhene ale adathema kukhala na miyai yakutumikira. (Luka 9:48) Natenepa atumiki a Yahova nee asafunika kuyesera kupasika “mbiri okhene.”—Mis. 25:27.

“Kodi Musabvesesa Pinaleri Imwe?” (Mabasa 8:26-40)

14, 15. (a) Kodi ‘mamuna wa ku Etiopya’ akhali ani, pontho Filipi an’gumana kupi? (b) Kodi mamuna wa ku Etiopya atawira tani mphangwa za Filipi, pontho thangwi yanji kubatizwa kwace nee kukhali kwakusowa basa? (Onani cidzindikiro capantsi.)

¹⁴ Anju wa Yahova apanga Filipi toera aende mu nseu udabuluka ku Yerusalemu kuenda ku Gaza. Khala Filipi akhabvundzika kuti thangwi yanji akhafunika kuenda kweneko, mwandimomwene ntawiro wace wapangizika pakweca mu ndzidzi udagumanikana iye na mamuna wa ku Etiopya mbakaleri “mwakugaluza bukhu ya mprofeta Izaiya.” (Onani bokosi ya nsolo wakuti “‘Mamuna wa ku Etiopya’ Munjira Ipi!”) Nzimu wakucena wa Yahova wacitisa Filipi kufendedzera cifupi mamuna unoyu wakuti akhali mu ngolo. Filipi ambvundza: “Kodi musabvesesa pinaleri imwe?” Mamuna wa ku Etiopya atawira: “Ndinapibvesesa tani ndingasowa munthu toera kundifokotozera?”—Mabasa 8:26-31.

¹⁵ Mamuna wa ku Etiopya acemera Filipi toera akwire mu ngolo. Nyerezerani makani akutsandzayisa adakhala na iwo! Ninga anthu azinji, mamuna wa ku Etiopya nee akhadziwa kuti “bira” peno “ntumiki” analongwa mu profesiya ya Izaiya akhaimirira ani. (Iza. 53:1-12) Mbwenye mu ndzidzi ukhaenda iwo, Filipi afokotozera mamuna wa ku Etiopya kuti “bira” peno “ntumiki” adalongwa mu profesiya ya Izaiya akhali Yezu. Ninga ale adabatizwa pa Pentekoste ya 33 P.K.K., mamuna wa ku Etiopya wakuti akhadapita mu uphemberi Waciyuda, mwakukhonda dembuka adzindikira pikhafuna iye kucita. Iye apanga Filipi: “Onani, pano pali na madzi; ninji cinandipingiza toera ndikhonde kubatizwa?” Mwakukhonda dembuka, mamuna wa ku Etiopya abatizwa na Filipi.c (Onani bokosi ya nsolo wakuti “Kubatizwa ‘m’Madzi.’”) Buluka penepo, Filipi apaswa basa inango ku Asidhodhe, kweneko iye apitiriza kumwaza mphangwa zadidi.—Mabasa 8:32-40.

16, 17. Kodi aanju asaphedzera tani basa yakumwaza mphangwa lero?

¹⁶ Akristu lero ali na mwai wakuphata basa ninga idacita Filipi yakumwaza mphangwa. Kazinji kene, iwo asakwanisa kumwaza mphangwa za Umambo kuna ale anagumana iwo mbuto zakusiyana-siyana, ninga pakucita ulendo. Kazinji kene kugumana anthu a mitima yadidi nee pisacitika mwasusudeu. Ife tisadikhira pyenepi, thangwi Bhibhlya isalonga kuti aanju asatsogolera basa yakumwaza mphangwa toera mphangwa zenezi zifike “kuna anthu a madziko onsene, a madzindza onsene, a pilongero pyonsene na mbumba zonsene.” (Apok. 14:6) Yezu akhadalonga kuti aanju mbadatsogolera ale anamwaza mphangwa zadidi. Mu citsandzo cace ca nyakasongole na tirigu, Yezu alonga kuti mu ndzidzi wakubvuna, peno kumala kwa makhaliro a dziko “anyakubvuna ndi aanju.” Iye athimiza kulonga kuti aanju anewa “anadzabulusa mu Umambo wace anthu onsene anacitisa andzawo kugwa m’madawo na ale anacita pinthu pyakuipa.” (Mat. 13:37-41) Mu ndzidzi ubodzi ene, Yahova ali kuphatisira aanju anewa toera kugumanya ale ali na cidikhiro cakutonga kudzulu na “mwinji ukulu” wa “mabira anango,” toera akhale mbumba yace.—Apok. 7:9; Juw 6:44, 65; 10:16.

¹⁷ Toera kupangiza kuti pyenepi pisacitikadi, anango anamwazira ife mphangwa asalonga kuti akhacita phembero toera kuphemba ciphedzo ca Mulungu. Mwacitsandzo, amwazi mphangwa awiri akhamwaza mphangwa, pontho akhali pabodzi na mwanang’ono. Pikhafika ndzidzi wakumasikati, amwazi mphangwa anewa akhafuna kukotoka, mbwenye mwana akhali na iwo akhafuna kakamwe kuenda panyumba inango. Natenepa iye aenda ekhene, mbagogodza nsuwo! Pidaona iwo kuti nkazi afungula nsuwo, amwazi mphangwa anewa afendedza dhuzi toera kucedza naye. Iwo adzumatirwa pidafokotoza nkazi unoyu wakuti akhacita phembero toera munthu abwere panyumba pace toera am’phedze kubvesesa Bhibhlya. Natenepa, iwo atoma kupfundzisa Bhibhlya nkazi unoyu!

18. Thangwi yanji nee tisafunika kusiya kucita basa yathu yakumwaza mphangwa?

¹⁸ Ninga m’mwazi mphangwa Wacikristu, imwe muli na mwai wakuphata basa pabodzi na aanju mu ndzidzi uno wakuti basa yakumwaza mphangwa ikuphedza anthu azinji kakamwe kupiringana kale. Cipo tisafunika kuluza mwai unoyu. Natenepa pitirizani kumwaza mphangwa mwaphinga, pyenepi pinakucitisani kukhala wakutsandzaya kakamwe mu ndzidzi unapanga imwe anango “mphangwa zadidi thangwi ya Yezu.”—Mabasa 8:35.