NSOLO 15

Akulu A Mpingo Asaphedza Tani Mpingo?

Nkulu wa mpingo akucedza na anthu a mu mpingo — Finlandiya

Akulu a mpingo akuwangisa banja ibodzi ya mu mpingo — Kucedzera

Nkulu wa mpingo akumwaza mphangwa m’mbuto zapakweca — umboni

Ife nkhabe kulipa ntsogoleri mu gulu yathu. Mbuto mwa pyenepi, ninga pikhacitwa pa ndzidzi udatoma mpingo Wacikristu, ayang’aniri akuthema asasankhulwa toera ‘kukumbiza nsoka wa anthu a Mulungu.’ (Machitiro 20:28, Mphangwa Zadidi) Akulu a mpingo anewa ndi amuna akukola mwauzimu akuti asatsogolera mpingo na kukumbiza, ‘si ninga anthu akukakamizwa tayu, mbwenye ninga anthu aufulu pamaso Mulungu; si thangwi yakusirira maganyo akuipa tayu; mbwenye thangwi yakufuna kwawo.’ (1 Pedro 5:1-3) Ndi mabasa api anacita iwo toera kutiphedza?

Iwo asatitsalakana, pontho asaticinjiriza. Akulu a mpingo asapereka citsogolero cakubuluka m’Malemba na asaphedza mpingo toera ukhale cifupi na Yahova. Mu kudziwa kuti Mulungu aapasa basa ineyi yakufunika, akulu a mpingo nkhabe kuponderera anthu anatsogolera iwo, mbwenye asatiphedza toera tikhale mwadidi na mwakutsandzaya. (2 Akorinto 1:24) Ninga nkumbizi wakuti asatsalakana mwadidi bira yace ibodzi na ibodzi, akulu a mpingo asasaka kudziwa mwadidi munthu m’bodzi na m’bodzi m’mpingo.—Misangani 27:23.

Iwo asatipfundzisa kuti tinacita tani cifuno ca Mulungu. Masumana onsene, akulu a mpingo asatsogolera misonkhano ya mpingo toera kuwangisa cikhulupiro cathu. (Machitiro 15:32) Amuna anewa akuperekeka asatsogolerambo basa yakumwaza mphangwa, asaphata basa na ife mbatipfundzisa makhundu onsene a utumiki.

Iwo asapereka ciwangiso kwa m’bodzi na m’bodzi wa ife. Toera kutiphedza kuwangisa uxamwali wathu na Yahova, akulu a mpingo a pacisa asaticedzera mu zinyumba zathu, peno asacedza na ife pa Nyumba ya Umambo toera kupereka ciphedzo na cibalangazo cakubuluka m’Malemba.—Tyago 5:14, 15.

Kusiyapo mabasa awo m’mpingo, akulu a mpingo azinji asaphatambo basa ya kudziko pontho ali na mabasa pa banja akuti asaphemba ndzidzi wawo na citsalakano cawo. Abale anewa akuti asaphata basa mwakuwanga athema cilemedzo cathu.—1 Atesalonika 5:12, 13.

Ndi mabasa api anacitwa na akulu a mpingo?
Ndi mu njira zipi akulu a mpingo asapangiza citsalakano kwa m’bodzi na m’bodzi wa ife?