Mphangwa Ziwiri Zakubuluka Kwa Mulungu

Ife tinakwanisa kulonga kuti Bhibhlya yonsene ndi mphangwa zakubuluka kwa Mulungu. Babathu wakudzulu atipasa Bhibhlya toera kutipfundzisa. Natenepa, tendeni tidinge mphangwa ziwiri zidalongwa mu pyaka pyakupiringana 2.000 nduli. Mphangwa zenezi zalongwa na anju Gabhriyeli, ‘anakhala cifupi na Mulungu.’ (Luka 1:19) Kodi makhaliro akhali tani mu ndzidzi udalonga anju mphangwa zenezi zakufunika?

Gabhriyeli alonga mphangwa zakutoma cifupi na caka 3 M.N.W. Kodi Gabhriyeli alonga kupi mphangwa zakutoma? Ku cisa ca mapiri a ku Yudeya, panango cifupi na Yerusalemu kukhakhala nyantsembe wa Yahova akhacemerwa Zakariya. Iye na nkazace, Elizabheti akhali akugwesera, pontho nee akhali na anapiana. Ukhali ndzidzi toera Zakariya atumikire ninga nyantsembe mu templo ya Mulungu ku Yerusalemu. Pikhali Zakariya mu templo, mwakukhonda dikhira, Gabhriyeli aonekera cifupi na guwa ya ntsembe.

Mwakukhonda penula, Zakariya agopa. Mbwenye anju apanga Zakariya: ‘Leka kugopa, thangwi maphembero ako abviwa, nkazako Elizabheti anadzabala mwana wamamuna. Iwe unadzan’thula Juwau. Gabhriyeli alonga pontho kuti Juwau ‘anadzakhala wankulu pamaso pa Mulungu,’ pontho ‘anadzaphedza mbumba toera itumikire Yahova.’—Luka 1:13-17.

Pyenepi pikhali pyakunentsa kuna Zakariya toera kupikhulupira. Thangwi yanji? Thangwi iye na nkazace Elizabheti akhadagwesera. Natenepa Gabhriyeli ampanga: ‘Nakuti nee usakhulupira mafala anga, unadzakhala bewewe mbukhonda kwanisa kulonga mpaka ntsiku inafuna kucitika pinthu pyenepi.’—Luka 1:20.

Mu ndzidzi ukhacitika pyenepi, anthu akhali kunja kwa templo akhabvundzika kuti thangwi yanji Zakariya akudembuka. Pakumalisa iye abuluka, mbwenye nee akhakwanisabve kulonga. Basi ene iye akhalonga na manja. Natenepa, anthu adzindikira kuti ciripo cidacitika mu templo.

Pidamala Zakariya basa yace mu templo, abwerera kunyumba kwace. Pidapita ndzidzi ungasi, Elizabheti akhala na pathupi! Pikhadikhira iye kubalwa kwa mwana, Elizabheti akhala panyumba miyezi mixanu kutali na anthu anango.

Mukupita kwa ndzidzi, Gabhriyeli aonekera pontho kaciwiri. Paulendo unoyu aonekera kwa ntsikana wakuti akhadzati kumanga banja, akhacemerwa Mariya, akakhala ku cisa ca Galileya, mu nzinda wa Nazareti. Anju apanganji Mariya? Iye alonga: ‘Mulungu akupasa nkhombo. Iwe unadzakhala na pathupi, mbubala mwana wamamuna na kumpasa dzina ya Yezu.’ Gabhriyeli apanga pontho Mariya: ‘Iye anadzakhala wankulu mbacemerwa Mwana wa Mulungu, anadzatonga ninga Mambo wa dzindza ya Yakobe kwenda na kwenda, Umambo wace nkhabe kudzamala.’—Luka 1:30-33.

Gabhriyeli atsandzaya kakamwe na mwai ukulu udapaswa iye wakulonga mphangwa zenezi ziwiri. Munaleri ife pya Juwau na Yezu, tinadzabvesesa kuti thangwi yanji mphangwa zenezi zakubuluka kudzulu ndi zakufunika kakamwe.