Amwaza Mphangwa Ku Galileya Mbapfundzisa Apostolo

Yezu amwaza mphangwa mwaphinga mu pyaka piwiri. Kodi ukhadafika ndzidzi toera kupuma na kupungula phinga yace yakumwaza mphangwa? Nkhabe! M’mbuto mwace, Yezu athimizira basa yace yakumwaza mphangwa mwaphinga mbatoma ‘m’mizinda yonsene na pisa pyonsene [pya Galileya], mbapfundzisa m’masinagoga mwawo mbamwaza mphangwa zadidi za Umambo na kuwangisa mitundu yonsene ya mautenda akhali na anthu.’ (Mateu 9:35) Pikhaona iye pikhampasa cinyindiro cakuti iye akhafunika kuthimizira mwaphinga basa yace yakumwaza mphangwa. Mphapo mbadacita tani pyenepi?

Paulendo wace, Yezu aona anthu kuti akhafunika kuwangiswa na kubalangazwa mwauzimu. Anthu anewa akhali ninga mabira akusowa nkumbizi, mbakhonda kutsalakanwa mwadidi. Iye aabvera ntsisi mbapanga anyakupfundzace: ‘Basa yakubvuna ndi ikulu, mbwenye anyabasa acepa. Natenepa, phembani Mwanaciro munda kuti atumize anyabasa toera kubvuna.’—Mateu 9:37, 38.

Yezu akhadziwa pikhafuna iwo. Natenepa, atuma apostolo 12 mbaagawa awiri awiri mbadzakhala misoka mitanthatu toera kumwaza mphangwa. Buluka penepo aapasa pitsogolero: ‘Lekani kuenda kuna anthu a madzindza anango, pontho lekani kupita m’mizinda ya Asamariya; mbwenye pitirizani kusaka mabira akutayika a dzindza ya Izraeli. Ndokoni kamwaza mphangwa, mbamulonga kuti Umambo wakudzulu uli dhuzi.’—Mateu 10:5-7.

Iwo aenda kamwaza mphangwa za Umambo ninga pidalonga Yezu pa phembero yacitsandzo. ‘Umambo uli dhuzi’ pisabveka kuti Mambo adasakhulwa na Mulungu, Yezu Kristu, alipo. Ninji pisapangiza kuti anyakupfundzace asaimirira Umambo unoyu? Yezu aapasa mphambvu toera kuwangisa mautenda na kulamusa anyakufa mbakhonda kulipwa. Kodi apostolo mbadatsalakana tani pyakufuna pyawo, ninga pyakudya?

Yezu apanga anyakupfundzace toera akhonde kudzudzumika na pinthu pyakumanungo paulendo ukhafuna kucita iwo. Pontho, nee akhafunika kukwata ouro, siliva peno nkuwa m’budu mwawo. Kusiyapo pyenepi nee akhafunika kukwata cakudya, nguwo na ntsapato zakuthimizirika. Thangwi yanji? Yezu aapasa cinyindiro: ‘Nyabasa athema kupaswa cakudya.’ (Mateu 10:10) Anyakupfundza mbadagumana anthu akuti asafuna mphangwa zawo, natenepa iwo mbadatsalakana pyakufuna pyawo. Yezu alonga: ‘Panyumba yonsene inafikira imwe, khalani penepo mpaka kubuluka kwanu pacisa ceneci.’—Marko 6:10.

Yezu aapasambo pitsogolero toera kumwaza mphangwa za Umambo nyumba na nyumba, iye alonga: ‘Mungafika panyumba, mwanyikani anaciro nyumba. Iwo angakutambirani mwadidi, ntendere wanu mbukhale na iwo, mbwenye angakhonda kukutambirani mwadidi, ntendere wanu mbubwerere kuna imwe. Munthu angakhonda kukutambirani peno angakhonda kubvesera mafala anu, pakubuluka panyumba ineyi peno nzinda unoyu, gubudzani pfumbi ya manyalo anu.’—Mateu 10:12-14.

Anthu a mu nzinda peno mu cisa cikhafuna kupita iwo mbadakhonda kubva mphangwa zawo, ninji pikhafuna kuacitikira? Yezu alonga kuti mbadatongwa na pyenepi, iye afokotoza: ‘Mwandimomwene ndinakupangani kuti kutcunyuswa kwa Sodhoma na Gomora kunapiringana kutcunyuswa kwa nzinda unoyu pa Ntsiku Yakutongwa.’—Mateu 10:15.