Anyamatanya 10 Awangiswa, Mbwenye Adapereka Takhuta Ndi M’bodzi Basi

Toera kucimwanisa masasanyiro akuphiwa kwace na Thando Ikulu Yakutongera Miseru, Yezu aenda ku nzinda wa Efrayimu, khundu ya kumabulukiro a dzuwa a Yerusalemu. Iye akhala kweneko na anyakupfundzace toera akhonde kuoneka na anyamalwa ace. (Juwau 11:54) Nakuti ndzidzi wa Paskwa ya 33 N.W. ukhali dhuzi, Yezu acita pontho ulendo. Iye apita na ku Samariya, mbapita na kumadokero a dzuwa mpaka ku Galileya. Unoyu ukhali ulendo wace wakumalisa kuenda ku Galileya mbadzati kufa.

Pidatoma Yezu ulendo wace, agumanikana na anyamatanya khumi mu ndzidzi ukhabuluka iye mu nzinda ubodzi mbapita unango. Midzidzi inango, utenda unoyu unakwanisa kucitisa munthu kuluza makhundu anango a manungo ace mwapang’ono-pang’ono, ninga makutu, pyala pya m’manja na pya m’miyendo. (Numero 12:10-12) Mwambo wa Mulungu ukhalonga kuti nyamatanya akhafunika kukhala kutali na anango, pontho angaona munthu mbanfendedzera, akhafunika kukhuwa: “Ndine wakukhonda cena! Ndine wakukhonda cena.”—Levitiko 13:45, 46.

Mwakubverana na Mwambo, anyamatanya khumi apitiriza kukhala kutali na Yezu. Mbwenye iwo akhuwa mwakugaluza: ‘Yezu, Mpfundzisi, tibverenimbo ntsisi!’ Pidaona iye anyamatanya, Yezu aapanga: “Ndokoni kapangizike kuna anyantsembe.” (Luka 17:13, 14) Mukuapanga mafala anewa, Yezu apangiza kuti akhalemedza Mwambo wa Mulungu, wakuti ukhalonga kuti anyantsembe ndiwo akhafunika kupanga nyamatanya kuti awangiswa. Buluka penepo, iwo mbadakhala pontho na anthu anango.—Levitiko 13:9-17.

Anyamatanya khumi akhali na cinyindiro cakuti Yezu akhali na mphambvu yakucita pirengo. Iwo aenda kuna anyantsembe, maseze akhadadzati kuwangiswa. Pikhali iwo n’njira, iwo awangiswa thangwi yakukhulupira kwawo Yezu!

Mwa anyamatanya khumi adawangiswa, apfemba apitiriza na ulendo wawo kuenda kuna anyantsembe. Mbwenye m’bodzi wakuti akhali Nsamariya abwerera toera kusaka Yezu. Thangwi yanji acita pyenepi? Iye akhafuna kupereka takhuta thangwi yakuwangiswa. Iye ‘asimba Mulungu mwakugaluza’ thangwi adzindikira kuti ndi Mulungu adamuwangisa mukuphatisira Yezu. (Luka 17:15) Pidagumana iye Yezu, mamuna unoyu agodama mbapereka takhuta.

Yezu apanga anthu akhali n’khundu mwace: “Onsene adawangiswa ndi anthu khumi. Mphapo apfemba ali kupi? Nkhabebve unango adabwerera toera kusimba Mulungu, kusiyapo munthu uyu wa dzindza inango?” Buluka penepo, Yezu apanga Nsamariya: “Lamuka, ndoko pyako; cikhulupiro cako cakuwangisa.”—Luka 17:17-19.

Mukuwangisa anyamatanya khumi, Yezu apangiza kuti ali na ciphedzo ca Yahova Mulungu. Mwa amuna anewa khumi adawangiswa, ndi m’bodzi basi akhadikhira kutambira umaso wa kwenda na kwenda. Ife nee tikukhala mu ndzidzi wakuti Mulungu asaphatisira Yezu toera kucita pirengo. Mbwenye tingakhulupira Yezu, tinagumana umaso wa kwenda na kwenda. Kodi tisapereka takhuta ninga pidacita Nsamariya?