Njira Yakuthema Toera Kulambira Mulungu

1. Mbani anakwanisa kutipanga njira yakuthema toera kulambira Mulungu?

MAUPHEMBERI mazinji asalonga kuti asapfundzisa undimomwene thangwi ya Mulungu. Mbwenye pyenepi nkhabe kwanisika, thangwi mauphemberi asapfundzisa pinthu pyakusiyana kakamwe, ninga Mulungu mbani, pontho tisafunika kumulambira tani. Tinadziwa tani njira yakuthema toera kulambira Mulungu? Ndi Yahova basi anakwanisa kutipanga njira yakuthema toera kumulambira.

2. Munapfundza tani njira yakuthema toera kulambira Mulungu?

² Yahova atipasa Bhibhlya toera tikwanise kupfundza njira yakuthema kumulambira. Natenepa pfundzani Bhibhlya, pontho Yahova anadzakuphedzani toera kuphindula na pipfundziso pyace thangwi iye asatitsalakana kakamwe.​—Izaiya 48:17.

3. Kodi Mulungu asafuna kuti ticitenji?

³ Anthu anango asalonga kuti mauphemberi onsene ndi akutawirika kwa Mulungu, mbwenye si pyenepi tayu pidatipfundzisa Yezu. Iye alonga: ‘Si onsene anandicemera Mbuya, Mbuya, anadzapita mu Umambo wakudzulu, mbwenye ndi ule anacita pinafuna Babanga.’ Natenepa ndi pyakufunika kwa ife kupfundza kuti ndi cipi cifuno ca Mulungu na kucicita. Pyenepi ndi pyakufunika kakamwe thangwi Yezu alandanisa anthu anakhonda kubvera Mulungu ninga mapanga, ‘anyakuswa mwambo.’​—Mateo 7:21-23.

4. Kodi Yezu alonganji thangwi yakucita cifuno ca Mulungu?

⁴ Yezu aticenjeza kuti tingafuna kucita cifuno ca Mulungu, tinadzathimbana na nyatwa. Iye alonga: ‘Pitani na pa nsuwo ung’ono, thangwi nsuwo ukulu, usatsogolera toera kufudzwa, anthu azinji ndiwo anapita na pa nsuwo unoyu; mbwenye nsuwo ung’ono usatsogolera ku umaso, anthu akucepa ndiwo anapita na pa nsuwo unoyu.’ (Mateo 7:13, 14) Nseu wakucepa peno njira yakuthema toera kulambira Mulungu, isatsogolera ku umaso wakukhonda mala. Nseu ukulu, peno njira yakukhonda thema yakulambira Mulungu, isatsogolera toera kufa. Mbwenye Yahova nkhabe kufuna kuti anthu afe. Iye asapasa onsene mwai toera kupfundza pya iye.​—2 Pedro 3:9.

NJIRA YAKUTHEMA TOERA KULAMBIRA MULUNGU

5. Munadzindikira tani ale analambira Mulungu munjira yakuthema?

⁵ Yezu alonga kuti ife tinakwanisa kudzindikira ale analambira Mulungu munjira yakuthema. Tinacita pyenepi mukudinga pinakhulupira iwo na pinacita iwo. Iye alonga: ‘Munaadzindikira thangwi ya misapo yawo.’ Pontho iye athimiza: ‘Miti yadidi yonsene isabala misapo yadidi.’ (Mateo 7:16, 17) Pyenepi nee pisabveka kuti ale analambira Mulungu ndi aungwiro. Ndzidzi onsene atumiki a Mulungu asayesera kucita pinthu pyadidi. Cincino tinaona pinthu pyakuti pinatiphedza toera kudzindikira ale analambira Mulungu munjira yakuthema.

6, 7. Thangwi yanji ulambiri wandimomwene usabulusa pipfundziso pyawo m’Bhibhlya? Kodi citsandzo ca Yezu cisatipfundzisanji?

⁶ Ulambiri wathu usafunika kubulukira m’Bhibhlya. Bhibhlya isalonga: ‘Malemba onsene apumirwa na Mulungu toera aphedze anthu pakupfundzisa, pakusumula, pakusandika na pakudziwisa pyakulungama pyonsene; tenepa munthu wa Mulungu anakhala wakukwana na wakukhunganyika toera kucita mabasa onsene adidi.’ (2 Timoti 3:16, 17) Mpostolo Paulu alemba kuna Akristu: ‘Pidatambira imwe mafala a Mulungu adabva imwe kuna ife, imwe mwaatawira, tayu ninga mafala a anthu, mbwenye mwandimomwene ninga mafala a Mulungu.’ (1 Atesalonika 2:13) Ulambiri wandimomwene usabulusa pipfundziso pyawo basi ene m’Mafala a Mulungu, Bhibhlya. Iwo nee usabulukira m’maonero, m’miyambo ya anthu peno mbuto zinango.

⁷ Pyonsene pidapfundzisa Yezu pikhabuluka m’Mafala a Mulungu. (Lerini Jwau 17:17.) Mwakubwereza-bwereza iye akhaphatisira Malemba. (Mateo 4:4, 7, 10) Atumiki andimomwene a Mulungu asatowezera citsandzo ca Yezu, pontho pyonsene pinapfundzisa iwo pisabulukira m’Bhibhlya.

8. Kodi Yezu atipfundzisanji thangwi ya kulambira Yahova?

⁸ Tisafunika kulambira basi ene Yahova. Lemba ya Masalmo 83:18, Tradução do Novo Mundo isalonga: ‘Imwe, wakuti dzina yanu ndi Yahova, imwe mwekha ndimwe Wankulu Kakamwe kupiringana pyonsene pa dziko yapantsi.’ Yezu akhafuna kuti anthu adziwe mwadidi Mulungu wandimomwene, pontho apfundzisa anthu dzina ya Mulungu. (Lerini Jwau 17:6.) Yezu alonga: ‘Yahova, Mulungu wako ekha unadzan’godamira mbumulambira.’ (Mateo 4:10) Natenepa, ninga atumiki a Mulungu, ife tisatowezera citsandzo ca Yezu. Tisalambira basi ene Yahova, tisaphatisira dzina yace, pontho tisapfundzisa anango dzina ya Mulungu na pinthu pinafuna kudzacita iye kuna ife.

9, 10. Tisapangiza tani ufuni kuna unango na ndzace?

⁹ Tisafunika kukhala na ufuni wandimomwene kuna anthu. Yezu apfundzisa atowereri ace toera kufunana unango na ndzace. (Lerini Jwau 13:35.) Tisacita pyenepi mwakukhonda tsalakana kudabuluka ife, makhaliro athu, pontho nkhabe tsalakana khala ndife akupfuma peno akutcerenga. Ufuni wathu kuna unango na ndzace usatigumanya ninga abale na alongo. (Akolose 3:14) Natenepa ife nkhabe kuenda ku nkhondo na kupha anthu. Bhibhlya isalonga: ‘Ana a Mulungu na ana a Dyabo asadzindikirika tenepa: Ule anakhonda kucita pyaulungami, si wa Mulungu tayu; siyembo tayu, uyu anakhonda kufuna m’bale wace.’ Iyo isathimiza: ‘Tisafunika kufunana unango na ndzace; tayu ninga Kaini, adabuluka kwa nyakuipa, mbapha m’bale wace.’​—1 Jwau 3:10-12; 4:20, 21.

¹⁰ Tisaphatisira ndzidzi wathu, mphambvu zathu na pinthu pyathu toera kuwangisana unango na ndzace. (Ahebere 10:24, 25) Tisacita ‘pinthu pyadidi kuna anthu onsene.’​—Agalata 6:10.

11. Thangwi yanji tisakhulupira kuti cipulumuso cinakwanisika basi ene kubulukira mwa Yezu Kristu?

¹¹ Tisakhulupira kuti cipulumuso cinakwanisika basi ene kubulukira mwa Yezu Kristu. Bhibhlya isalonga: ‘Nkhabepo dzina inango pantsi pa thambo ya kudzulu, idaperekwa kwa anthu, yakuti tipulumuswe nayo.’ (Machitiro 4:12) Mu Nsolo 5 wa bukhu ino, tapfundza kuti Yahova atuma Yezu toera kupereka umaso wace ninga ciomboli kuna anthu akubvera. (Mateo 20:28) Yahova asankhula Yezu toera kutonga ninga Mambo wa dziko yonsene yapantsi. Ndi thangwi yace Bhibhlya isatipanga kuti tingafuna kukhala na umaso wakukhonda mala tisafunika kubvera Yezu.​—Lerini Jwau 3:36.

12. Thangwi yanji ife nkhabe kucita khundu mu ndale za dziko?

¹² Ife nkhabe funika kucita khundu mu ndale za dziko. Yezu nee akhacita khundu mu ndale za dziko. Pikhathimbana iye na mayesero, iye apanga ntongi Waciroma anacemerwa Pilato: “Umambo wanga si wa pantsi pano tayu.” (Lerini Jwau 18:36.) Ninga Yezu, ife ndife akukhulupirika ku Umambo wakudzulu wa Mulungu, na thangwi ineyi, mwakukhonda tsalakana kunakhala ife, ife nkhabe kucita khundu mu ndale za dziko. Mbwenye Bhibhlya isatipanga toera tibvere ‘mautongi.’ (Aroma 13:1) Ife tisabvera miyambo ya dziko inakhala ife. Mbwenye, mwambo ungaphonyana na miyambo ya Mulungu, ife tisatowezera apostolo, adalonga: ‘Ife tisafunika kubvera Mulungu ninga ntongi, kupiringana anthu.’​—Machitiro 5:29; Marko 12:17.

13. Tisamwaza mphangwa zanji thangwi ya Umambo wa Mulungu?

¹³ Tisakhulupira kuti Umambo wa Mulungu ndiwo basi unafuna kumalisa nyatwa za n’dziko. Yezu alonga kuti ‘mphangwa zadidi za Umambo’ mbizidamwazwa pa dziko yonsene yapantsi. (Lerini Mateo 24:14.) Nkhabepo utongi wa anthu wakuti unakwanisa kucita pinafuna kucita Umambo wa Mulungu kuna ife. (Masalmo 146:3) Yezu atipfundzisa kuphemberera Umambo wa Mulungu pidalonga iye: ‘Umambo wanu mbudze. Pinafuna imwe mbapicitwe pantsi pano ninga kudzulu.’ (Mateo 6:10) Bhibhlya isatipanga kuti Umambo wa Mulungu unadzafudza mautongi onsene a anthu, buluka penepo, ‘iwo unadzakhala kwenda na kwenda.’​—Danyele 2:44.

14. Mbani asaona imwe kuti asalambira Mulungu munjira yakuthema?

¹⁴ Pakumala kupfundza ntsonga zenezi, bvundzikani: ‘Ndi uphemberi upi usabulusa pipfundziso pyawo basi ene m’Bhibhlya? Mbani asapanga anango pya dzina ya Mulungu? Mbani asapangiza ufuni wandimomwene kuna unango na ndzace na kukhulupira kuti Mulungu atuma Yezu toera kutipulumusa? Mbani asakhonda kucita khundu ya ndale za dziko? Mbani asamwaza mphangwa zakuti Umambo wa Mulungu ndiwo basi unafuna kumalisa nyatwa zathu?’ Basi ene ndi Mboni za Yahova.​—Izaiya 43:10-12.

KODI MUNADZACITANJI?

15. Tisafunika kucitanji khala tisafuna kuti Mulungu atawire ulambiri wathu?

¹⁵ Nee tisafunika kukhulupira basi kuti Mulungu alipo. Ngakhale mademonyo asakhulupira kuti Mulungu alipo, mbwenye iwo nkhabe kumbvera. (Tyago 2:19) Khala tisafuna kuti Mulungu atawire ulambiri wathu, nee tisafunika basi ene kukhulupira kuti iye alipo, mbwenye tisafunikambo kucita pinalonga iye.

16. Thangwi yanji tisafunika kukhonda uphemberi wauthambi?

¹⁶ Toera Mulungu atawire ulambiri wathu, tisafunika kukhonda uphemberi wauthambi. Mprofeta Izaiya alemba: ‘Bulukani pakati pawo, pitirizani kukhala akucena.’ (Izaiya 52:11; 2 Akorinto 6:17) Ndi thangwi yace tisafunika kukhonda cinthu consene cinacita khundu mu ulambiri wauthambi.

17, 18. Kodi ‘Bhabhilonya Wankulu’ ninji, pontho thangwi yanji mphyakufunika kunkhonda mwakucimbiza?

¹⁷ Kodi uphemberi wauthambi ninji? Ndi ntundu onsene wauphemberi unatipfundzisa toera kulambira Mulungu munjira yakuphonyana na Mafalace. Bhibhlya isacemera mauphemberi onsene authambi ‘Bhabhilonya Wankulu.’ (Apokalipse 17:5) Thangwi yanji? Pakumala Cigumula mu ntsiku za Nowa, pipfundziso pizinji pya mauphemberi authambi pyatoma mu nzinda wa Bhabhilonya. Pipfundziso pyenepi pyauthambi pyamwazika pa dziko yonsene yapantsi. Mwacitsandzo, anthu akakhala ku Bhabhilonya akhalambira misoka ya alungu atatu. Pontho lero, mauphemberi mazinji asapfundzisa kuti Mulungu ndi Utatu, mbwenye Bhibhlya mwakubveka isapfundzisa kuti alipo Mulungu m’bodzi basi wandimomwene, Yahova, pontho Yezu ndi Mwanace. (Jwau 17:3) Anthu akakhala ku Bhabhilonya akhakhulupirambo kuti khundu ibodzi ya munthu isapitiriza kukhala maso munthu angafa, pontho kuti khundu ineyi inakwanisa kuthabuswa mu infernu. Pipfundziso pyenepi mphyauthambi.​—Onani Pidzindikiro pyakumalisa 14, 17 na 18.

¹⁸ Mulungu alongeratu kale kuti mwakukhonda dembuka mauphemberi onsene authambi anadzafudzwa. (Apokalipse 18:8) Musadziwa kuti thangwi yanji kubuluka mu uphemberi wauthambi kusafunika kucitwa mwakucimbiza? Yahova Mulungu asafuna kuti mucite pyenepi mwakucimbiza kakamwe.​—Apokalipse 18:4.

19. Mungatonga kutumikira Mulungu, kodi iye anadzakutsalakanani tani?

¹⁹ Mungatonga kusiya uphemberi wauthambi mbamutumikira Yahova, anango mwa axamwali peno acibale anu panango nee anabvesesa cisankhulo canu, pontho iwo panango anacitisa kuti umaso wanu ukhale wakunentsa. Mbwenye Yahova nee anadzakusiyani. Imwe munadzacita khundu ya pikwi na pikwi pya anthu a banja ya dziko yonsene akuti mwandimomwene asafunana unango na ndzace, pontho munadzakhala na cidikhiro cakukhala maso kwenda na kwenda mu dziko ipswa ya Mulungu. (Marko 10:28-30) Panango anango mwa axamwali peno acibale anu akuti asaipirwa na cisankhulo canu cakutumikira Yahova anadzasankhula kupfundza Bhibhlya.

20. Thangwi yanji mphyakufunika kulambira Mulungu munjira yakuthema?

²⁰ Cincino pano, Mulungu anadzafudza anthu onsene akuipa, pontho Umambo wace unadzatonga dziko yonsene yapantsi. (2 Pedro 3:9, 13) Unoyu unadzakhala ndzidzi wakutsandzayisa kakamwe! Anthu onsene anadzalambira Yahova munjira yakuthema ninga pinafunira iye. Natenepa mphyakufunika kuna imwe toera kucita pinthu cincino na kulambira Mulungu munjira yakuthema.