KHUNDU WACITATU

Kutsalakanwa Mwakuipa—Khala Tiri Na “Thangwi Toera Kusuma”

“Mulongo unango m’mpingo wathu andipambizira kuti ndaba kobiri yace. Anango m’mpingo adziwa pyenepi mbatoma kumphedzera. Pakumalisa, mulongo unoyu andipanga kuti atambira mphangwa zipswa zakuti ine nee ndikhali na mulando. Maseze iye aphemba kulekererwa, muntima mwanga ndikhabva ninga cipo mbidakwanisa kumulekerera thangwi ya pinthu pidathimbana na ine.”—Linda.

KODI muli na mabvero mabodzi ene na a Linda, adatsukwaliswa na macitiro a Nkristu ndzace? Mwakutsukwalisa, anango atsukwala kakamwe na macitiro a andzawo mbapikhuya uxamwali wawo na Yahova. Kodi pyenepi pyacitikambo kwa imwe?

Kodi Alipo Anakwanisa “Kutilekesa Kufuniwa na Mulungu”?

Ndimomwene kuti panango pinanentsa kulekerera Nkristu ndzathu adatitsalakana mwakuipa. Kusiyapo pyenepi, Akristu asafunika kufunana unango na ndzace. (Jwau 13:34, 35) Khala tacitirwa pyakuipa na nyakukhulupira ndzathu, kupha na kutsukwala kunabva ife ndi kukulu kakamwe.—Masalmo 55:12.

Bhibhlya isapangiza kuti pana midzidzi yakuti Akristu anakwanisa kucitisa andzawo kukhala na “thangwi toera kusuma.” (Akolose 3:13, Tradução do Novo Mundo) Mbwenye pyenepi pingacitika kwa ife, panango tinaona kuti mphyakunentsa kakamwe kuthimbana napyo. Kodi ciripo cinafuna kutiphedza? Dingani midida mitatu ya Bhibhlya:

Babathu wakudzulu asadziwa pyonsene. Yahova asaona pyonsene pinacitika, kuphatanizambo nyatwa zinatamba ife na kupha kunabweresa izo. (Ahebere 4:13) Kusiyapo pyenepi, Yahova asanentseka tingaona nyatwa. (Izaiya 63:9) Iye nkhabe tawirisa kuti ‘nyatwa, kutsukwala’ peno cinthu cinango—ngakhale atumiki ace anango ‘atilekese kufuniwa na Mulungu.’ (Aroma 8:35, 38, 39) Kodi nee tisakulumizika toera kucita pibodzi pyene, kukhonda tawirisa kuti cinthu consene peno munthu onsene akhonde kutilekesa kufuna Yahova?

Kulekerera si kutawirisa tayu. Tingalekerera ale adaticitira pyakuipa, nee pisabveka kuti tikupwaza, kucepesa peno kutawirisa macitiro awo. Kumbukani, Yahova cipo asatawirisa madawo, mbwenye asalekerera madawo khala pana mathangwi toera kucita pyenepi. (Masalmo 103:12, 13; Habakuki 1:13) Yahova angatikulumiza toera kulekerera anango, iye asatiphemba toera kutowezera citsandzo cace. Iye nkhabe kupitiriza ‘kuipirwa kwenda na kwenda.’—Masalmo 103:9; Mateo 6:14.

Tingalekerera, anaphindula ndife ene. Munjira yanji? Nyerezerani citsandzo ici: Imwe mwathukula mwala, panango ndi mwala wakulemera pang’ono basi mbamukhala nawo m’manja. Panango nee mbamudanentseka mu ndzidzi wakucepa. Mbwenye ndiye tani khala musafunika kukhala nawo mu ndzidzi wakulapha? Mbamudakwanisa kukhala nawo mu ndzidzi ungasi? M’mphindi zingasi? Ndzidzi ubodzi? Peno midzidzi mizinji? Mwakukhonda penula nkono wanu mbudaneta! Kulemera kwa mwala nee mbakudacinja. Mbwenye kupitiriza nawo m’manja mu ndzidzi uzinji munaubva ninga ukulemera kakamwe. Pyenepi ndi sawasawa na kukoya pinthu muntima. Tingapitiriza kuipirwa mu ndzidzi uzinji, maseze ndi kwakucepa, kutsukwala kusakula kakamwe. Na thangwi ineyi, Yahova asatikulumiza toera kulekerera. Mwandimomwene, tingalekerera anaphindula ndife ene—Misangani 11:17.

Mulongo ali mu Nyumba ya Umambo, asaoneka ninga atsukwala pontho ali na pinthu muntima mu ndzidzi unayang’anisa iye Mulongo ndzace — Tingalekerera, anaphindula ndife ene

“Ndabva Ninga Yahova Akhalonga Na Ine”

Ninji pidaphedza Linda toera kukhonda kukoya pinthu muntima pakumala kutsalakanwa mwakuipa na nyakukhulupira ndzace? Mwa pinango, iye anyerezera mwacidikhodikho mathangwi a Bhibhlya toera kulekerera. (Masalmo 130:3, 4) Linda akulumizika kakamwe mudadziwa iye kuti tingalekerera, Yahova anadzatilekererambo. (Aefesi 4:32–5:2) Thangwi ya kukhuyiwa kwace na maonero anewa, iye alonga: “Ndabva ninga Yahova akhalonga na ine.”

Mukupita kwa ndzidzi, Linda asiya kukoya pinthu muntima. Iye akwanisa kumulekerera na ntima onsene, lero mulongo unoyu ndi xamwali wace wapantima. Linda asapitiriza kutumikira Yahova. Khalani na cinyindiro cakuti Yahova asafuna kukuphedzani toera kucita pibodzi pyene.