Nyumba ya Bhabheli

Pidamala kubvumba Madzi Makulu, ana a Nowa adzabala anapiana azinji. Buluka penepo, mabanja awo akula mbatoma kubalalika pa dziko yapantsi ninga mudaapanga Yahova toera acite.

Mbwenye mabanja anango nee abvera Yahova. Iwo alonga: ‘Tendeni timange nzinda na nyumba yakulapha kakamwe mpaka ifike kudzulu toera tikhale akubvekera kakamwe.’

Yahova nee akomerwa na pikhacita anthu anewa, natenepa iye atonga kualimirisa. Usadziwa kuti acita tani pyenepi? Iye aacitisa kulonga pilongero pyakusiyana. Nakuti nee akhabverana, iwo alimira kumanga nyumba. Nyumba ineyi ikhamanga iwo yadzadziwika na dzina ya Bhabheli, yakuti isabveka “Kukhonda Bverana.” Anthu atoma kufuluka mbaenda kakhala mbuto zakusiyana-siyana pa dziko. Mbwenye iwo akhapitiriza kucita pinthu pyakuipa m’mbuto zenezi zikakhala iwo. Kodi m’mbuto zenezi nee mukhali na munthu wakuti akhafuna Yahova? Tinadzaona pyenepi mu nsolo unatowera.