Abala Mwana mu Unkhalamba!

Abhrahamu na Sara amala pyaka pizinji mbadamala kale kumanga banja. Iwo asiya nyumba yawo yadidi ku Uri mbaenda kakhala m’misasa. Mbwenye Sara nee adungunya, thangwi iye akhanyindira Yahova.

Sara akhafuna kakamwe kubala mwana, ndi thangwi yace iye apanga Abhrahamu: ‘Bitcu wanga Agari angakhala na mwana, iye anadzakhala ninga wanga.’ Mukupita kwa ndzidzi Agari abala mwana wamamuna. Dzina yace ikhali Ijimaeli.

Mukupita kwa ndzidzi, pikhali Abhrahamu na pyaka 99, pontho Sara na pyaka 89, iwo atambira alendo atatu. Abhrahamu aapanga toera akhale pa n’thundzi, pontho aapasa cakudya. Mphapo alendo anewa atatu akhali ani? Iwo akhali aanju! Iwo apanga Abhrahamu: ‘Caka cinafuna kudza pa ndzidzi ninga uno, iwe na nkazako Sara munadzakhala na mwana wamamuna.’ Sara akhabvesera pyenepi pikhali iye mu nsasa. Penepo Sara aseka ekha mbalonga: ‘Ine ndakalamba, ndinakwanisadi kukhala na mwana?’

Caka cidatowera, Sara abala mwana wamamuna ninga mudapikira anju wa Yahova. Abhrahamu ampasa dzina yakuti Izaki. Dzina ineyi isabveka “Kuseka.”

Pikhali Izaki na pyaka pixanu, Sara aona Ijimaeli mbakasingirira Izaki. Sara akhafuna kutsidzikiza mwanace. Natenepa iye apanga Abhrahamu toera athamangise Agari na Ijimaeli pa nyumba pawo. Pakutoma, Abhrahamu nee akhafuna kucita pyenepi. Mbwenye Yahova apanga Abhrahamu: ‘Cita pinakupanga Sara. Ine ndinadzatsalakana Ijimaeli. Thangwi mapikiro adacita ine kuna iwe anadzakwanirisika kubulukira kwa Izaki.’