Buru ya Bhalamu Yalonga

Aizraeli akhala n’thando mu pyaka 40. Iwo akunda mizinda mizinji yakuwanga. Pidafika iwo ku thando ya Moabhe, iwo amanga misasa n’khundu mwa Nkulo wa Yordani. Unoyu ukhali ndzidzi toera kupita n’Dziko Yakupikirwa. Bhalaki, mambo wa ku Moabhe, akhagopa kukwatirwa dziko yace na Aizraeli. Natenepa, iye aphemba mamuna akhacemerwa Bhalamu toera abwere ku Moabhe kuti apase dzedze Aizraeli.

Mbwenye Yahova apanga Bhalamu: ‘Leka kupasa dzedze Aizraeli.’ Natenepa, Bhalamu akhonda kuenda. Mambo Bhalaki aphemba pontho Bhalamu kaciwiri, pontho apikira kuti mbadampasa pyonsene pikhafuna iye. Bhalamu akhonda pontho basi kuenda. Buluka penepo, Mulungu ampanga: ‘Ndoko, mbwenye basi ene usafunika kulonga pire pinafuna kukupanga ine.’

Bhalamu akwira buru yace mbaenda ku Moabhe. Iye akhafuna kupasa dzedze Aizraeli, ngakhale Yahova ampanga toera akhonde kucita pyenepi. Anju wa Yahova aonekera mu nseu m’maulendo matatu. Bhalamu nee akhakwanisa kuona anju, mbwenye buru yace ndiyo ikhaona. Pakutoma, buru pidaona iyo anju yabuluka mu nseu mbipita ntsanga. Buru pidaona iyo anju paulendo waciwiri, iyo yatoma kutsamira mpanda, mwendo wa Bhalamu mbupfinyika na mpanda. Pakumalisa anju aonekera pontho, natenepa buru yagodama pantsi pakati pa nseu. M’maulendo anewa onsene, Bhalamu akhamenya buru yace na ndodo.

Mu ndzidzi unoyu, Yahova acitisa kuti buru ilonge. Buru yabvundza Bhalamu: ‘Thangwi yanji mukundimenya?’ Bhalamu atawira: “Thangwi iwe wandikupwisa. Mbidakhala na supada m’manja mwanga mbidakupha.” Buru yalonga: ‘Imwe musandikwira mu pyaka pizinji. Ndakucitirani kale pyenepi?’

Buluka penepo Yahova acitisa Bhalamu kuona anju. Anju alonga: ‘Yahova akhadakucenjeza toera ukhonde kupasa dzedze Aizraeli.’ Bhalamu atawira: ‘Ndadawa. Ndinabwerera kunyumba.’ Mbwenye anju alonga: ‘Ndoko ku Moabhe, mbwenye basi ene usafunika kulonga pire pinafuna Yahova.’

Kodi Bhalamu abvera pidapangwa iye? Nkhabe. Iye ayesera katatu kuenda kapasa dzedze Aizraeli, mbwenye m’maulendo anewa onsene Yahova acitisa kuti iye aapase nkhombo m’mbuto mwakuapasa dzedze. Pakumalisira, Aizraeli akunda Moabhe, pontho Bhalamu aphiwa. Mwandimomwene Bhalamu mbadabvera Yahova, pinthu mbapidanfambira mwadidi kakamwe.