Yahova Asankhula Yoswa

Pidamala Mose kutsogolera mbumba ya Izraeli mu pyaka pizinji, iye akhali cifupi na kufa. Yahova ampanga: ‘Nee unadzatsogolera Aizraeli toera kupita mu Dziko Yakupikirwa. Mbwenye ndinakusiya toera uione.’ Buluka penepo, Mose aphemba Yahova toera asankhule ntsogoleri unango kuti atsalakane mbumba. Yahova ampanga: ‘Ndoko kuna Yoswa, umpange kuti ndiye anafuna kukhala ntsogoleri.’

Mose apanga Aizraeli kuti mwakukhonda dembuka mbadafa, pontho kuti Yahova asankhula Yoswa toera kukhala m’bodzi wa anafuna kutsogolera mbumba mpaka kupita mu Dziko Yakupikirwa. Buluka penepo, Mose apanga Yoswa: ‘Leka gopa. Yahova anakuphedza.’ Mwakukhonda dembuka Mose aenda ku Phiri ya Nebho. Kweneko Yahova ampangiza dziko idapikira Iye Abhrahamu, Izaki na Yakobe. Mose afa na pyaka 120.

Yahova apanga Yoswa: ‘Wambuka Nkulo wa Yordani, upite mu dziko ya Kanani. Ndinadzakuphedza ninga mudaphedza ine Mose. Usafunika kuleri Mwambo wanga ntsiku zonsene. Leka gopa. Khala na cipapo. Ndoko, pontho cita pyonsene pidakupanga ine.’

Yoswa atuma anyakusuzumira dziko awiri toera aende kaona nzinda wa Yeriko. Mu nsolo unatowera, tinapfundza pizinji thangwi ya pyenepi. Pidabwerera iwo, alonga kuti ukhali ndzidzi wadidi toera kuenda ku Kanani. Mangwana mwace, Yoswa apanga mbumba toera kubulusa misasa. Buluka penepo, pakufuna kuwambuka Nkulo wa Yordani, iye apanga anyantsembe akhathukula bokosi ya cibverano toera apite patsogolo. Madzi a mu nkulo akhathamanga. Mbwenye mwakukhonda dembuka, pidaponda anyantsembe madzi, madzi agawika mbalimira kuthamanga! Anyantsembe aenda mpaka pakati pa nkulo mbalimira mu ndzidzi wakuti mbumba ikhawambuka na khundu inango. Panango cirengo ceneci caakumbusa pinthu pidaacitira Yahova pa Bara Yakufuira.

Pakupita pyaka pizinji, Aizraeli adzapita mu Dziko Yakupikirwa. Mwenemu iwo mbadamanga nyumba na mizinda. Mbadalima minda, mauva na miti yakubala misapo. Ineyi ikhali dziko ya nkaka na uci.