Ntsogoleri Mupswa na Akazi Awiri Acipapo

Yoswa atsogolera mbumba ya Yahova mu pyaka pizinji, iye afa na pyaka 110. Mu ndzidzi ukhali iye m’maso, Aizraeli akhalambira Yahova. Mbwenye pidafa Yoswa, iwo atoma kulambira alungu apezi ninga pikhacita Akanani. Nakuti Aizraeli nee akhabvera, Yahova atawirisa mambo wa Akanani akhacemerwa Yabhini toera kuathabusa. Na thangwi ineyi, mbumba yatoma kuphemba ciphedzo kuna Yahova. Yahova aapasa ntsogoleri unango, Bharaki. Natenepa, Bharaki aphedza mbumba toera kutumikira pontho Yahova.

Yahova atuma mprofeta wankazi, Dhebhora, toera kuenda kuna Bharaki. Dhebhora alonga: ‘Kwata amuna akukwana 10.000 toera uende kaonana na nkulu wa anyankhondo a Yabhini ku nkulo wa Kisoni. Kweneko unadzakunda Sizera wakuti ndi nkulu wa anyankhondo a Yabhini.’ Bharaki apanga Dhebhora: ‘Ine ndinaenda basi ene imwe mungaendambo.’ Dhebhora atawira: ‘Ine ndinaenda pabodzi na iwe. Mbwenye nee ndiwe anafuna kupha Sizera. Thangwi Yahova alonga kuti ndi nkazi anafuna kumupha.’

Bharaki na anyankhondo ace pabodzi na Dhebhora aenda Kuphiri ya Tabhori toera kukhunganyika nkhondo. Sizera pidabva iye pyenepi, agumanyiza ngolo za nkhondo na anyankhondo ace mbaenda mpaka ku nkulo wa Kisoni. Dhebhora apanga Bharaki: ‘Lero ndi ntsiku yakuti Yahova anapereka Sizera m’manja mwako.’ Bharaki atcita Paphiri ya Tabhori pabodzi na amuna akukwana 10.000 toera kumenyana na Sizera, pontho na anyankhondo ace.

Buluka penepo, Yahova acitisa nkulo wa Kisoni kudzala. Na thangwi ineyi, Ngolo za anyankhondo a Sizera nee zikhakwanisabve kufamba thangwi ya matope. Sizera atcita pa ngolo yace mbatoma kuthamanga. Bharaki na anyankhondo ace aphata anyankhondo a Sizera, mbwenye Sizera athawa mbaenda kabisala mu nsasa wa nkazi akhacemerwa Jaeli. Natenepa Jaeli apasa Sizera nkaka toera kumwa, buluka penepo anfinikiza nguwo peno manta. Nakuti Sizera akhadaneta kakamwe, iye aphatwa na citulo mbagona. Buluka penepo, Jaeli aenda mwapang’ono-pang’ono kakwata ntciri ya pa nsasa wace, mban’khomera munsolo mwace, Sizera mbafa.

Bharaki afika kuna Jaeli mbakasaka Sizera. Jaeli abuluka mu nsasa mwace mbalonga: “Bwerani, ine ndinakupangizani mamuna anasaka imwe.” Bharaki pidapita iye mu nsasa agumana Sizera ali thasa afa. Bharaki na Dhebhora aimba nyimbo yakusimba Yahova thangwi ya kuaphedza kukunda anyamalwa awo. Buluka penepo, Aizraeli akhala mu ntendere mu pyaka 40.