Rute na Noemi

Mu ndzidzi wakuti mu dziko ya Izraeli mukhali na njala, nkazi akhacemerwa Noemi pabodzi na mamunace na anace awiri a amuna afuluka mbaenda ku dziko ya Moabhe. Mukupita kwa ndzidzi mamunace Noemi afa. Anace amanga banja na akazi a ku Moabhe, Rute na Orpa. Mwakutsukwalisa, ana anewa a Noemi afambo.

Noemi pidadziwa iye kuti njala yamala mu dziko ya Izraeli, iye anyerezera kubwerera ku dziko yawo. Rute na Orpa aenda pabodzi na iye, mbwenye pikhali iwo n’njira, Noemi aapanga: ‘Imwe ndimwe akazi adidi thangwi mwaphedza ananga pabodzi na ine. Bwererani ku dziko yanu ya Moabhe toera musembwe pontho.’ Iwo atawira: ‘Ife tisakufunani kakamwe, pontho nee tisafuna kukusiyani.’ Noemi apitiriza kuapanga toera abwerere. Pakumalisa, Orpa abwerera, mbwenye Rute apitiriza na mebzwalace. Natenepa Noemi apanga Rute: ‘Ona! Orpa abwerera kuna mbumba yace na kuna alungu ace. Bwererambo pabodzi na iye.’ Mbwenye Rute atawira: ‘Ine nee ndinakusiyani. Mbumba yanu inadzakhala mbumba yanga, pontho Mulungu wanu anadzakhalambo Mulungu wanga.’ Ndi mabvero api adakhala na Noemi pidabva iye mafala anewa?

Rute na Noemi afika mu Izraeli mu ndzidzi ukhatoma anthu kubvuna sevadha. Ntsiku inango, Rute aenda kaphalakatira peno kalokotera pidasala m’munda mwa mamuna akhacemerwa Bhoazi, mwana wa Raabhe. Bhoazi abva kuti Rute akhali nkazi wa ku Moabhe, pontho akhali wakukhulupirika kuna Noemi. Na thangwi ineyi, apanga anyabasa ace kuti angabvuna akhonde kubulusa pyonsene toera Rute alokoterembo pidasala.

Namaulo, Noemi abvundza Rute: ‘Ndi kupi kudaphata iwe basa lero?’ Rute atawira: ‘M’munda mwa mamuna anacemerwa Bhoazi.’ Noemi alonga: ‘Bhoazi ndi m’bodzi wa acibale a mamunanga. Pitiriza kuphata basa m’munda mwace pabodzi na atsikana anango. Kweneko unakhala wakutsidzikizika.’

Rute apitiriza kuphata basa m’munda mwa Bhoazi mpaka kumala kubvunwa kwa sevadha na tirigu. Bhoazi adzindikira kuti Rute akhaphata basa mwaphinga, pontho akhali nkazi wadidi kakamwe. Mu ntsiku zenezi, mamuna angafa mbakhonda kusiya ana, wacibale wace akhafunika kumanga banja na nkazi unoyu adaferwa. Na thangwi ineyi, Bhoazi amanga banja na Rute. Iwo adzabala mwana akhacemerwa Obhedhi, wakuti adzakhala yavu wa Mambo Dhavidhi. Axamwali a Noemi pidabva iwo pyenepi akomerwa kakamwe mbalonga: ‘Pakutoma, Yahova akupasa Rute wakuti ndi wadidi kakamwe kuna iwe, cincino uli na ndzukulu. Mbasimbwe Yahova.’