Pidacitika Paphiri ya Karmelo

Umambo wa madzindza khumi wa Izraeli ukhali na amambo azinji akuipa. M’bodzi wa Amambo akuipa kakamwe akhali Akabu. Iye amanga banja na nkazi wakuipa wakuti akhalambira Bhaale. Nkazi unoyu akhacemerwa Yezabheli. Akabu na Yezabheli acitisa anthu azinji a mu Izraeli kulambira Bhaale, pontho akhaphesa aprofeta a Yahova. Yahova acitanji? Yahova atuma mprofeta Eliya toera kulonga na Akabu.

Eliya apanga Mambo Akabu kuti thangwi ya macitiro ace akuipa madzi nee mbadabvumba mu Izraeli. Madzi nee abvumba mu pyaka pyakupiringana pitatu. Na thangwi ineyi, pa dziko pakhali na njala. Mukupita kwa ndzidzi, Yahova atuma pontho Eliya toera kulonga na Akabu. Mambo Akabu apanga Eliya: ‘Pyonsene pinacitika ndi thangwi ya iwe!’ Eliya atawira: ‘Nee ndine. Ndimwe anacitisa pyenepi, thangwi mwacitisa anthu kulambira Bhaale. Toera kuona kuti mbani Mulungu wandimomwene tendeni ticite ipi: Cemerani aprofeta a Bhaale na mbumba yonsene toera kugumanyikana Paphiri ya Karmelo.’

Natenepa anthu agumanyikana paphiri ineyi. Eliya alonga: ‘Sankhulani anafuna imwe kulambira. Khala Yahova ndi Mulungu wandimomwene ntowereni, mbwenye khala ndi Bhaale, towerani Bhaale. Aprofeta 450 a Bhaale asafunika kupereka ntsembe mbacemera mulungu wawo. Ine ndinaperekambo ntsembe mbandicemera Yahova. Mulungu anafuna kutawira mbatumiza moto toera kupisa ntsembe ndi Mulungu wandimomwene.’ Mbumba yatawira.

Aprofeta a Bhaale apereka ntsembe. Iwo akhacemera mulungu wawo kutomera macibese mpaka maulo: “Bhaale titawire!” Bhaale nee aatawira, Eliya atoma kuaseka mbalonga: ‘Khuwisani, mulungu wanu Bhaale panango ali kugona, pontho asafuna munthu toera amulamuse.’ Namaulo, aprofeta a Bhaale apitiriza na kuncemera. Mbwenye Bhaale nee aatawira.

Eliya aikha ntsembe yace pa guwa mbaikha madzi mpaka kudzadza guwa. Buluka penepo, acita phembero: ‘Yahova, ndaphata miyendo nditawireni toera mbumba iyi idziwe kuti imwe ndimwe Mulungu wandimomwene.’ Penepo pene, Yahova atumiza moto kubuluka kudzulu mbupisa ntsembe. Anthu akhuwa: “Yahova ndi Mulungu wandimomwene!” Eliya alonga: “Phatani aprofeta a Bhaale! Lekani kuthawisa nee m’bodzi!” Pa ntsiku ineyi, aprofeta 450 a Bhaale aphiwa.

Pidaona Eliya khole ing’ono ku bara, iye apanga Akabu: ‘Madzi asafuna kubvumba kakamwe. Kwata ngolo yako, ndoko kunyumba.’ Natenepa kudzulu kwapswipa, mphepo mbitoma kumenya, buluka penepo, madzi atoma kubvumba. Akabu akwira ngolo yace mbaifambisa mwakucimbiza. Na ciphedzo ca Yahova, Eliya athamanga mwakucimbiza mbapiringana ngolo ya Akabu! Nyatwa yakusoweka kwa madzi ikhadamala, mbwenye Eliya mbadathabuka na nyatwa zinango. Tinaona pyenepi mu nsolo unatowera.