Yahova Awangisa Eliya

Pidabva Yezabheli pinthu pidacitikira aprofeta a Bhaale, iye aipirwa kakamwe. Yezabheli atumiza mphangwa kuna Eliya: ‘Mangwana, ndinakupha ninga mudapha iwe aprofeta a Bhaale.’ Eliya pidabva iye pyenepi, agopa kakamwe mbathawira ku thando. Iye acita phembero: ‘Yahova, ine ndaneta. Ndisiyeni pyanga ndife.’ Thangwi yakuneta, Eliya agona pantsi pamuti.

Anju m’bodzi amulamusa mbampanga: “Lamuka udye.” Eliya aona n’khundu mwace nkate wakupisa na mulinga wa madzi. Iye adya, amwa mbagona pontho. Anju amulamusa pontho mbalonga: “Lamuka udye, thangwi kunafuna iwe kuenda ndi kutali kakamwe.” Natenepa, Eliya adya pontho. Buluka penepo, iye acita ulendo wa ntsiku 40 masiku na masikati, mpaka kufika ku Phiri ya Orebhi. Paphiri ineyi, Eliya apita m’mphako toera kugona. Mbwenye Yahova ambvundza: “Eliya, ukucitanji pano?” Iye atawira: ‘Aizraeli asiya cibverano canu, afudza maguwa anu mbapha aprofeta anu onsene. Mbwenye cincino iwo asafunambo kundipha.’

Yahova apanga Eliya: “Buluka mwenemo, ndoko kalimire paphiri.” Pakutoma, mphepo yamphambvu yapita na pa mphako. Buluka penepo, paoneka citeketeke na moto. Pakumalisa, Eliya abva fala mbikalonga mwacipantsipantsi. Iye aphimbira nkhope yace na nguwo yace mbabuluka m’mphako. Buluka penepo, Yahova abvundza Eliya kuti thangwi yanji akhathawa. Eliya atawira: “Adasala ndine basi.” Mbwenye Yahova apanga Eliya: ‘Nee wasala wekha. Mu Izraeli muli na anthu 7.000 akuti asandilambira. Ndoko kadzodza Elizeu toera akhale mprofeta pa mbuto yako.’ Mwakukhonda dembuka, Eliya aenda kacita pidampanga Yahova. Kodi musanyerezera kuti Yahova anakuphedzani mungacita pinafuna iye? Inde, iye anatiphedza. Tendeni tione pidacitika mu ndzidzi wakuti madzi nee akhabvumba.