Anyankhondo Amphambvu a Yahova

Mambo wa ku Sirya Bheni-Adhadhi ayesera kazinji kene kumenyana na Aizraeli. Mbwenye, ndzidzi onsene mprofeta Elizeu akhacenjeza mambo wa Izraeli pikhafuna kucita Bheni-Adhadhi. Ndi thangwi yace Bheni-Adhadhi nee akwanisa pikhafuna iye. Natenepa iye anyerezera kutuma anyankhondo a ku Sirya toera aende kamange Elizeu wakuti akhali mu nzinda wa Dhotani.

Anyankhondo a ku Sirya afika ku Dhotani namasiku. Pidalamuka ntumiki wa Elizeu namacibese, aona kuti nzinda wamala kuzungulirwa na anyankhondo azinji. Natenepa iye agopa kakamwe mbakhuwa: ‘Elizeu, tinacitanji?’ Elizeu antawira: “Leka kugopa! Thangwi tiri na azinji kukhundu yathu kupiringana ale ali na iwo.” Penepo pene Yahova acitisa ntumiki wa Elizeu kuona kuti mapiri onsene akhali n’khundu mwa nzinda akhadadzala na makavalo na ngolo za nkhondo za moto.

Anyankhondo a ku Sirya pikhafendedzera iwo Elizeu toera kum’phata, iye aphembera: ‘Yahova, ndaphata miyendo, citisani anthu awa toera akhale maboliboli.’ Maseze anyankhondo anewa akhakwanisa kuona, mbwenye mwakukhonda dikhira, iwo nee akhakwanisabve kudzindikira mbuto ikakhala iwo. Elizeu aapanga: ‘Mwatayika! Nditowereni, ine ndinakupangizani kuna munthu anasaka imwe.’ Elizeu aenda nawo mpaka ku Samariya kukhakhala mambo wa Izraeli.

Asirya adzadzindikira n’dembulembu kukakhala iwo. Mambo wa Izraeli abvundzisa Elizeu: ‘Usafuna kuti ndiaphe?’ Elizeu mbadakwanisa kubandza mwai unoyu toera kupha anthu akhafuna kumupha. Mbwenye iye nee acita pyenepi. Elizeu alonga: ‘Lekani kuapha. Apaseni cakudya, buluka penepo asiyeni aende pyawo.’ Natenepa, mambo wa Izraeli aacitira phwando ikulu, buluka penepo aapanga toera abwerere kwawo.