Yahova Abvera Ntsisi Yona

Ninive ukhali nzinda wa ku Sirya. Anthu a mu nzinda unoyu akhacita pinthu pizinji pyakuipa. Na thangwi ineyi, Yahova atuma mprofeta wace Yona toera aende ku Ninive kapange anthu anewa kuti asiye kucita pinthu pyakuipa. M’mbuto mwa kuenda ku Ninive, Yona athawa mbakwira bote yakuenda ku Tarsi, nzinda wakuti ukhali kutali na Ninive.

Mu ndzidzi ukhacita iwo ulendo, m’bara mwaoneka mphepo ikulu kakamwe yakuti yacitisa anyakufambisa bote kugopa. Natenepa iwo aphembera kuna alungu awo mbaabvundza: ‘Thangwi yanji ipi pikucitika?’ Mukupita kwa ndzidzi, Yona aapanga: ‘Ndi thangwi yanga. Ndikuthawa basa idandipasa Yahova. Ndiponyeni m’bara, condzi cinalimira.’ Anyakufambisa bote nee akhafuna kuponya Yona m’madzi, mbwenye iye aakakamiza. Yona pidaponywa iye m’madzi, condzi calimira.

Yona pikhalirima iye akhanyerezera kuti mbadafa. Mu ndzidzi unoyu, iye acita phembero kuna Yahova. Penepo Yahova atuma ntsomba ikulu, mbimeza Yona. Mbwenye iyo nee yamupha. Pikhali iye m’mimba mwa ntsomba, Yona aphembera: ‘Yahova, ine ndikupikira kuti ndzidzi onsene ndinakubverani.’ Yona amala ntsiku zitatu m’mimba mwa ntsomba ineyi. Buluka penepo, Yahova apanga ntsomba ineyi toera ilukule Yona kuntunda.

Nakuti Yahova apulumusa Yona, mphapo pyenepi pikhabveka kuti iye nee mbadaendabve ku Ninive? Nkhabe. Yahova apanga pontho Yona toera aende ku Ninive. Natenepa Yona abvera. Iye aenda ku Ninive, mbapanga anthu akhacita pinthu pyakuipa: “Zasala ntsiku 40 basi toera Ninive afudzwe.” Mwakukhonda dikhira, anthu a ku Ninive abvera mbasiya pinthu pyakuipa pikhacita iwo. Mambo wa ku Ninive apanga mbumba yace: ‘Tendeni tidembetere kuna Mulungu, mbatisiya kucita pinthu pyakuipa panango nee tinafudzwa.’ Pidaona Yahova kuti anthu atcunyuka, iye nee afudza nzinda wa Ninive.

Nakuti nzinda nee wafudzwa, Yona aipirwa kakamwe, pontho nee abvera ntsisi anthu a Ninive ninga pidacita Yahova kuna iye. M’mbuto mwace, iye abuluka mu nzinda mbaenda kakhala pa n’thundzi wa cimuti cakutawatawa. Buluka penepo, cimuti ceneci cadzauma. Na thangwi ineyi Yona aipirwa pontho. Yahova apanga Yona: ‘Iwe wabvera ntsisi cimuti cakutawatawa kupiringana anthu a mu Ninive. Ine ndaabvera ntsisi mbandiapulumusa.’ Mafala anewa adalonga Yahova asapangiza kuti anthu a mu Ninive akhali akufunika kakamwe kupiringana muti.