Yahova Atsidzikiza Yezu

Dziko inango yakuti ikhali kumabulukiro a dzuwa a dziko ya Izraeli, kukhali na anthu anango akuti akhakhulupira kuti nyenyezi mbazidaaphedza. Ntsiku inango na masiku iwo aona nyenyezi, mbaitowera. “Nyenyezi” ineyi yaatsogolera mpaka ku Yerusalemu. Pidafika iwo kweneko, abvundza anthu: ‘Ali kupi mwana adabalwa toera akhale mambo wa Ayuda? Tabwera kudzampasa miyoni.’

Herodhi, Mambo wa ku Yerusalemu pidabva iye pyenepi adzudzumika kakamwe. Iye abvundza akulu a anyantsembe: ‘Mambo unoyu mbadabalwa kupi?’ Iwo antawira: ‘Aprofeta alonga kuti iye mbadabalwa ku Bhetelehemu.’ Natenepa, Herodhi acemeresa amuna anewa adabuluka Kumabulukiro a Dzuwa mbaapanga: ‘Ndokoni ku Bhetelehemu mukasake mwadidi mwana. Mungamuona, bwerani mudzandidziwise kuti iye ali kupi. Ine ndisafunambo kamulemedza.’ Mbwenye unoyu ukhali uthambi.

“Nyenyezi” yatoma pontho kufamba. Natenepa amuna anewa atowera nyenyezi mpaka ku Bhetelehemu. Pidaona iwo kuti “nyenyezi” yalimira padzulu pa nyumba, amuna anewa apita n’nyumba ineyi mbagumana Yezu na mai wace, Mariya. Iwo agodamira Yezu mbampasa miyoni ya ouro, olibhano na mira. Kodi ndi Yahova adatuma amuna anewa toera kugumana Yezu? Nkhabe.

Ntsiku ineyi namasiku, Yahova apanga Zuze mu ndoto: ‘Herodhi asafuna kupha Yezu. Kwata nkazako na mwana mbuthawira ku Ejitu. Khala kweneko mpaka ndingakupanga toera kubwerera.’ Mwakucimbiza, Zuze na banja yace aenda ku Ejitu.

Yahova apangambo amuna adabuluka ku dziko yakutali toera akhonde kubwerera kuna Herodhi. Pidaona Herodhi kuti anyengezwa na amuna anewa, aipirwa kakamwe. Nakuti nee akhadziwa kukhali Yezu, iye alonga kuti anapiana amuna onsene a mu Bhetelehemu akuti akhali na thunga ya Yezu asafunika kuphiwa. Mu ndzidzi ukhacitika pyenepi, Yezu akhali wakutsidzikizika ku Ejitu.

Pidafa Herodhi, Yahova apanga Zuze: ‘Cincino, bwererani pyanu.’ Zuze, Mariya na Yezu abwerera ku Izraeli mbaenda kakhala mu nzinda wa Nazareti.