Yezu Afamba Padzulu pa Madzi

Kusiyapo kuwangisa atenda na kulamusa anthu muli akufa, Yezu akhakwanisambo kutonga mphepo na madzi. Pidamala iye kucita phembero paphiri, Yezu ayang’ana Bara ya Galileya mbaona condzi peno mphepo ikulu. Penepo iye aona apostolo ace akhali m’bote, pontho bote ineyi ikhamenywa na mabimbi. Natenepa Yezu atcitha paphiri mbatoma kufamba padzulu pa madzi mbaenda kuna bote. Apostolo agopa pidaona iwo munthu mbakafamba padzulu pa madzi. Mbwenye Yezu aapanga: “Ndine pano. Lekani kugopa!”

Pedhru alonga: ‘Mbuya, khala ndimwedi ndicemereni, ndibwere kuna imwe mbandifamba padzulu pa madzi.’ Yezu ampanga: “Bwera.” Mu ndzidzi ukhatekera condzi, Pedhru abuluka m’bote mbafamba padzulu pa madzi mbaenda kuna Yezu. Pikhali iye cifupi na Yezu, Pedhru ayang’ana condzi mbagopa. Iye atoma kulirima. Pedhru akhuwa: “Mbuya, ndipulumuseni!” Yezu aphata nkono wa Pedhru, mbalonga: ‘Thangwi yanji wapenula? Cikhulupiro cako ciri kupi?’

Pidamala Yezu na Pedhru kukwira m’bote penepo pene condzi cathowa. Musadziwa pidalonga apostolo pidamala iwo kuona pyenepi? Iwo alonga: ‘Mwandimomwene, ndimwe Mwana wa Mulungu.’

Nee ukhali ulendo unoyu basi udatonga Yezu mphepo. Ntsiku inango, Yezu na apostolo ace akhawambuka bara ya Galileya. Iye akhagona nduli mwa bote. Mu ndzidzi ukhagona iye, condzi catoma. Mabimbi akhamenya bote, iyo mbidzala na madzi. Apostolo alamusa Yezu, mbakhuwa: ‘Mpfundzisi, ife tinafa, tiphedzeni!’ Yezu alamuka mbapanga bara: “Matama, pfulika.” Pa ndzidzi unoyu, mphepo na bara yamatama. Yezu abvundza apostolo ace: “Cikhulupiro canu ciri kupi?” Iwo atoma kulonga m’bodzi na ndzace: ‘Ngakhale mphepo na bara pisam’bvera!’ Apostolo apfundza kuti anganyindira Yezu mwakukwana, iwo nee anadzagopa cinthu.