Yezu Awangisa Boliboli pa Ntsiku ya Sabudu

Afarisi akhaida Yezu. Iwo akhasaka mathangwi toera kumanga Yezu. Iwo alonga kuti Yezu nee akhafunika kuwangisa anthu pa ntsiku ya Sabudu. Mbwenye pa ntsiku inango ya Sabudu, Yezu aona mamuna m’bodzi adabalwa boliboli mbakaphemba-phemba munjira. Yezu apanga anyakupfundzace: ‘Onani kuti mphambvu ya Mulungu inaphedza tani mamuna uyu.’ Yezu amunya matope na mata ace mbaakhwaza m’maso mwa boliboli unoyu. Yezu apanga boliboli: ‘Ndoko kasambe nkhope yako ku thawala ya Silowe.’ Boliboli unoyu acita pidampanga Yezu buluka penepo iye atoma kuona. Unoyu ukhali ulendo wakutoma kuona mu umaso wace.

Anthu nee akhatawira pidamuona iwo. Iwo akhalonga: ‘Uyu nee ndi mamuna ule akakhala pantsi mbakaphemba-phemba?’ Anango akhalongambo: “Siye tayu, mbwenye alandana na iye.” Iye ene akhalonga: “Ndine pano.” Anthu ambvundza: “Mphapo maso ako afunguka tani?” Pidamala iye kuapanga pyonsene pidancitikira, iwo ankwata mbaenda naye kuna Afarisi.

Iye apanga Afarisi: ‘Yezu amunya matope pang’ono na mata ace, mbaakhwaza m’maso mwanga, mbandipanga toera ndiende kasambe nkhope. Ndaenda kasamba nkhope mbanditoma kuona.’ Afarisi alonga: ‘Khala Yezu awangisa munthu pa ntsiku ya Sabudu, mphambvu zenezi nee zabuluka kuna Mulungu.’ Mbwenye anango alonga: ‘Khala mphambvu zenezi nee zabuluka kuna Mulungu, akwanisa tani kucita pirengo ninga pyenepi?’

Buluka penepo, Afarisi acemeresa anyakubalace mbaabvundza: ‘Mwananu asakwanisa tani kuona cincino?’ Anyakubalace akhagopa thangwi akhadziwa kuti Afarisi akathamangisa munthu onsene mu Sinagoga anakhulupira Yezu. Na thangwi ineyi, anyakubalace atawira: ‘Ife nkhabe kupidziwa. Mbvundzeni iye.’ Afarisi acita pontho mibvundzo mamuna unoyu. Iye aatawira: ‘Ine ndakupangani kale. Musafuna kubvanji pontho?’ Afarisi aipirwa mbanthamangisa mu Sinagoga.

Yezu aenda kalonga na mamuna unoyu mbabvundza: ‘Kodi usakhulupira Mesiya?’ Iye antawira: ‘Mbuya, Mesiya mbani? Ndipangeni toera ine ndin’khulupire.’ Yezu ampanga: ‘Ine ndine Mesiya.’ Mafala anewa asapangiza kuti Yezu akhali munthu wadidi kakamwe, thangwi iye awangisa mamuna unoyu, mbamphedza toera akhale na cikhulupiro.