Yezu Alamusa Lazaro Muli Akufa

Yezu akhali na axamwali ace atatu apantima akakhala ku Bhetanya. Akhali Lazaro na abale ace awiri, Mariya na Marta. Ntsiku inango, pikhali Yezu kuntunda wa nkulo wa Yordani, Mariya na Marta atumiza mphangwa kuna Yezu kuti: ‘Lazaro akubva kupha kakamwe. Taphata miyendo bwerani kuno mwakucimbiza!’ Mbwenye Yezu adembuka kuendako. Natenepa pidapita ntsiku ziwiri, Yezu apanga anyakupfundzace: ‘Tendeni ku Bhetanya. Lazaro akugona, pontho ine ndiri kuenda kweneko kamulamusa.’ Apostolo ace atawira: ‘Khala Lazaro akugona, anawanga.’ Yezu aona kuti apostolo ace nee apibvesesa, natenepa iye aapanga: “Lazaro afa.”

Pidafika Yezu ku Bhetanya, pakhadapita ntsiku zinai Lazaro mbadamala kale kufa. Anthu azinji akhali kweneko toera kubalangaza Mariya na Marta. Marta pidadziwa iye kuti Yezu akubwera, iye aenda kaonana naye, mbampanga: “Mbuya, mbamudakhala pano, m’bale wanga mbadafa tayu.” Yezu atawira: ‘M’bale wako anadzalamuka. Marta, usakhulupira pyenepi?’ Marta atawira: ‘Ndisakhulupira kuti iye anadzalamuka pakulamuswa kwa anyakufa.’ Yezu atawira: “Ine ndine kulamuka muli akufa na umaso.”

Buluka penepo, Marta aenda kapanga Mariya kuti: ‘Yezu ali pano.’ Mariya athamanga mpaka kuna Yezu, pontho anthu akhantowera. Mariya agodama kutsogolo kwa Yezu mbakalira. Mariya alonga: ‘Mbuya, mbamudakhala pano, m’bale wathu mbadafa tayu!’ Yezu pidaona iye Mariya mbakalira, iye alirambo. Anthu adaona Yezu mbakalira, alonga: ‘Onani Yezu akhafuna kakamwe Lazaro.’ Mbwenye anthu anango akhalonga: ‘Thangwi yanji iye nee apulumusa xamwali wace?’ Kodi Yezu mbadacitanji?

Yezu aenda ku nthumbi idaikhwa Lazaro, pontho iye aphemba anthu toera abuluse mwala ukhali pa nsuwo wa mphako. Marta alonga: ‘Mbuya, papita ntsiku zinai ali mwenemu panango akununkha!’ Ngakhale tenepo, iwo abulusa mwala. Buluka penepo, Yezu acita phembero: ‘Baba, ine ndisapereka takhuta kuna imwe thangwi mwandibvesera. Ine ndisapidziwa kuti ndzidzi onsene imwe musandibvesera, mbwenye ndalonga pyenepi thangwi ya anthu ali pano toera iwo akhulupire kuti ndimwe adandituma.’ Buluka penepo, Yezu akhuwa: “Lazaro, buluka panja!” Natenepa pacitika cinthu cakudzumatirisa, Lazaro abuluka mu nthumbi. Pontho Yezu alonga: ‘Nsudzuleni nsiyeni aende pyace.’

Anthu azinji adaona pyenepi atoma kukhulupira Yezu. Mbwenye anango aenda kapanga Afarisi. Pidabva iwo pyenepi, Afarisi akhafuna kupha Lazaro na Yezu. M’bodzi mwa apostolo 12, Yuda Iskariyoti, aenda mwacibisobiso kuna Afarisi mbaapanga: ‘Munandipasanji ndingakuphedzani kuphata Yezu.’ Iwo apikira kumpasa kobiri 30 za parata. Buluka penepo, Yuda atoma kusaka ndzidzi wakuthema toera kupereka Yezu kuna Afarisi.