Yezu Alamuswa Muli Akufa

Pidafa Yezu, mamuna wakupfuma akhacemerwa Zuze aphemba Pilato toera abuluse manungo a Yezu pamuti. Zuze akhwaza manungo a Yezu mafuta, aapyangirira na nguwo yadidi, buluka peno aaikha munthumbi. Iye abulumundisa mwala ukulu mbauikha pansuwo wa nthumbi. Akulu a anyantsembe apanga Pilato: ‘Ife tisagopa kuti anyakupfundzace anabwera kudzaba manungo ace mbalonga kuti Yezu alamuswa muli akufa.’ Natenepa Pilato aapanga: ‘Kwatani anyakuonera toera muende katsidzikize nthumbi.’

Pidapita ntsiku zitatu, pidaca kunja Mariya Madhalena na akazi anango aenda kaona nthumbi. Pidafika iwo agumana kuti mwala wabuluswa. Pidapita iwo munthumbi agumana anju, natenepa anju unoyu aapanga: ‘Lekani kugopa. Yezu alamuswa muli akufa. Ndokoni kapanga anyakupfundzace toera akaonane naye ku Galileya.’

Mariya Madhalena athamanga mbaenda kapanga Pedhru na Juwau. Pidafika iye aapanga: ‘Alipo adakwata manungo a Yezu!’ Pedhru na Juwau athamanga mbaenda kunthumbi. Pidafika iwo kweneko nee agumana cinthu, natenepa abwerera m’manyumba mwawo.

Mariya pidabwerera iye pontho kunthumbi, aona aanju awiri munthumbi. Mariya apanga aanju: “Ine nkhabe dziwa kudamuikha iwo.” Pidamala iye kulonga aona mamuna m’bodzi, pontho akhanyerezera kuti mamuna unoyu ndi nyakutsalakana mbuto ineyi, mbampanga: ‘Mbuya, ndaphata miyendo, ndipangeni kudamuikha imwe.’ Natenepa mamuna unoyu acemera Mariya na dzina yace kuti, “Mariya!” iye adzindikira kuti akhali Yezu. Mariya alonga: “Mpfundzisi!” mbankhumbatira. Yezu ampanga: ‘Ndoko kapange abale anga kuti wandiona.’ Na thangwi ineyi, Mariya athamanga kuenda kapanga anyakupfundza kuti aona Yezu.

Namaulo, anyakupfundza awiri akhabuluka ku Yerusalemu mbaenda kucisa ca Emausi. Mu nseu, agumanikana na mamuna m’bodzi mbatoma kufamba pabodzi na iwo. Mamuna unoyu abvundza anyakupfundza thangwi ya makani akhacedza iwo. Natenepa iwo alonga: ‘Udzati kudziwa pidacitika? Mu ntsiku zitatu zidapita, akulu a anyantsembe apha Yezu. Cincino akazi anango asalonga kuti iye ali m’maso!’ Mamuna unoyu abvundza: ‘Nee musakhulupira pidalonga aprofeta? Iwo alonga kuti Kristu anadzaphiwa, buluka penepo mbalamuswa.’ Iye apitiriza kuapanga pya Malemba. Pikhafika iwo ku Emausi, anyakupfundza aphemba mamuna unoyu toera aende na iwo. Pikhali iye pabodzi na iwo toera kudya, mamuna unoyu acita phembero. Natenepa iwo adzindikira kuti mamuna unoyu akhali Yezu. Mbwenye iye azambazika.

Mu ndzidzi unoyu, anyakupfundza anewa awiri athamanga mbaenda mpaka ku Yerusalemu n’nyumba ikhagumanyika apostolo mbaapanga pyonsene pidacitika. Pikhali iwo mwenemu, Yezu aonekera pakati pawo. Pakutoma, apostolo nee akhakhulupira kuti mamuna unoyu akhalidi Yezu. Natenepa Yezu aapanga: ‘Yang’anani manja anga; ndikhuyeni. Pyalembwa kuti Kristu mbadalamuswa muli akufa.’