Yezu Aonekera Kuna Anyakumedza

Pidapita ndzidzi ungasi, pidamala Yezu kuonekera kuna apostolo ace, Pedhru anyerezera kuenda kamedza m’Bara ya Galileya. Natenepa Tomee, Tiyago, Juwau na anyakupfundza anango aenda pabodzi na iye. Iwo aphuphudza nakumedza mbwenye nee aphata cinthu.

Mangwana mwace namacibese, iwo aona mamuna m’bodzi akhadalimira pa gombe. Iye aacemera mbaabvundza: ‘Mwakwanisa kuphata ntsomba?’ Iwo ampanga: “Nkhabe!” Mamuna unoyu alonga: “Gwisirani kokota kukhundu yamadyo ya mwadiya.” Pidacita iwo pyenepi, kokota yadzala na ntsomba mbaicimwana kuikwewa. Penepo Juwau adzindikira kuti mamuna unoyu akhali Yezu, mbalonga: “Ndi Mbuya!” Pedhru pidabva iye pyenepi, anumpha m’mwadiya mbasambirira mpaka kukhali Yezu. Pontho anyakupfundza anango antowererambo na mwadiya.

Pidafika iwo kuntunda, aona nkate na ntsomba pikhaotcwa pa moto. Yezu aapanga toera abwerese ntsomba zingasi zidaphata iwo toera kuthimizira. Buluka penepo, iye alonga: ‘Bwerani tidye matabixu.’

Pidamala iwo kudya, Yezu abvundza Pedhru: ‘Kodi iwe usandifuna kupiringana ntsomba izi?’ Pedhru atawira: “Inde Mbuya, imwe musadziwa kuti ndisakufunani kakamwe.” Yezu ampanga: “Dyesa anamabira anga.” Yezu ambvundza pontho kacikawiri: ‘Pedhru, kodi iwe usandifuna?’ Pedhru atawira: “Inde Mbuya, imwe musadziwa kuti ndisakufunani.” Yezu ampanga: “Kumbiza anamabira anga.” Yezu pidabvundza iye pontho Pedhru kacitatu, Pedhru atsukwala kakamwe, mbalonga: “Mbuya, imwe musadziwa pinthu pyonsene; pontho imwe musadziwa kuti ine ndisakufunani kakamwe.” Yezu ampanga: “Dyesa anamabira anga.” Buluka penepo, Yezu apanga Pedhru: “Pitiriza kunditowera.”