Anyakupfundza Atambira Nzimu Wakucena

Pidapita ntsiku khumi Yezu mbadamala kubwerera kudzulu, anyakupfundzace atambira nzimu wakucena. Pa ntsiku ya Pentekoste 33 P.K.K., anthu azinji akhadaenda ku Yerusalemu toera kucita phwando ya Pentekoste. Pa ntsiku ineyi anyakupfundza a Yezu akukwana 120 akhadagumanyikana mu sala yandzulu. Mwakukhonda dembuka, pacitika cinthu cakudzumatirisa. Kudzulu kwabveka kutitima ninga kwa mphepo ikulu. Penepo pinthu pyakulandana na malirimi a moto, pyaphamira m’bodzi na m’bodzi wa iwo, mbatoma kulonga pilongero pyakusiyana-siyana.

Anthu ale adaendambo ku Yerusalemu, abva kutitima kweneku mbaenda n’nyumba toera kuona pikhacitika. Iwo adzumatirwa pidabva iwo anyakupfundza mbakalonga pilongero pyakusiyana-siyana. Iwo alonga: ‘Anthu awa onsene ndi a ku Galileya. Mphapo pyakwanisika tani kuti iwo alonge mu pilongero pyathu?’

Buluka penepo, Pedhru na anyakupfundza anango alimira kutsogolo kwa mbumba. Pedhru apanga anthu kuti Yezu akhadaphiwa, pontho Yahova amulamusa muli akufa. Iye alongambo: ‘Cincino Yezu ali kudzulu ku nkono wamadyo wa Mulungu, pontho atumiza nzimu wakucena udapikira iye. Ndi thangwi yace mukuona na kubva pirengo pyenepi.’

Pidabva iwo pyenepi, adzudzumika kakamwe mbabvundza: “Mphapo tisafunika kucitanji?” Iye aapanga: “Tcunyukani, m’bodzi na m’bodzi wa imwe mbabatizwe mu dzina ya Yezu, natenepa munadzatambira nzimu wakucena ninga muoni.” Pa ntsiku ineyi, anthu cifupi na 3.000 abatizwa. Kutomera ntsiku ineyi, anyakupfundza athimizirika kakamwe mu Yerusalemu. Na ciphedzo ca nzimu wakucena, mipingo yathimizirika, pontho apostolo akhakwanisa kupfundzisa anthu pinthu pyonsene pidapangwa iwo na Yezu.