Yezu Asankhula Saulo

Saulo abalwa ku Tarsu, mu dziko ya Roma. Iye akhali Nfarisi, pontho akhadziwa mwadidi Miyambo Yaciyuda. Kusiyapo pyenepi, iye akhatcinga Akristu, pontho iye akhamanga amuna na akazi anewa Acikristu m’mamidzi mwawo mbaaikha nkaidi. Mu ndzidzi ukhaphiwa Estevau, Saulo aphedzerambo.

Saulo aona kuti nee pyakwana basi ene kumanga Akristu a ku Yerusalemu. Na thangwi ineyi, iye aphemba nyantsembe wankulu toera antawirise kuti aende kathabusa Akristu a ku Dhamasku. Pikhali iye cifupi na nzinda, mwakukhonda dikhira, ceza cikulu caoneka n’khundu mwace, penepo pene iye agwa pantsi mbabva fala ikhalonga kuti: ‘Saulo, thangwi yanji ukunditcinga?’ Saulo abvundza: ‘Ndimwe ani?’ Fala yalonga: ‘Ine ndine Yezu. Pita mu nzinda wa Dhamasku, mwenemu unadzapangwa pinafunika iwe kucita.’ Mu ndzidzi ubodzi ene, Saulo adzakhala boliboli, pontho amuna akhali na iye am’phata nkono, mbamperekera mpaka ku Dhamasku.

Ku Dhamasku kukhali na Nkristu m’bodzi wakukhulupirika akhacemerwa Ananiya. Yezu ampanga m’masomphenya kuti: ‘Ndoko ku nseu unacemerwa Wakulungama, kunyumba ya Yuda toera usake mamuna anacemerwa Saulo.’ Ananiya alonga: ‘Mbuya, ine ndabva pinthu pyonsene pidacita mamuna unoyu! Iye asafuna kuikha nkaidi anyakupfundza anu!’ Mbwenye Yezu alonga: ‘Ndoko kuna iye, thangwi ine ndansankhula toera kumwaza mphangwa zadidi kuna anthu a madzindza mazinji.’

Natenepa, Ananiya agumana Saulo mbampanga: ‘Saulo m’bale wanga, Yezu andituma toera kufungula maso ako.’ Penepo pene, Saulo akwanisa pontho kuona. Buluka penepo, iye apfundza thangwi ya Yezu, mbadzakhala ntowereri wace. Pidamala iye kubatizwa ninga Nkristu, Saulo atoma kumwaza mphangwa na Akristu andzace m’masinagoga. Ayuda pidaona iwo Saulo mbakapfundzisa anthu thangwi ya Yezu adzumatirwa mbalonga: ‘Kodi mamuna unoyu siye tayu akhatcinga anyakupfundza a Yezu?’

Saulo amwaza mphangwa mu pyaka pitatu kuna anthu akhakhala ku Dhamasku. Ayuda akhaipirwa na Saulo mbacita masasanyiro toera kumupha. Mbwenye pidadziwa abale pyenepi, aphedza Saulo toera kuthawa. Iwo amuikha n’citundu mbantcitisa na pa benga ya mpanda wa nzinda.

Pidafika Saulo ku Yerusalemu, iye akhafuna kukhala pabodzi na abale kweneko, mbwenye iwo akhan’gopa. Pa ndzidzi unoyu, nyakupfundza m’bodzi akhacemerwa Bharnabhe akwata Saulo mbaenda naye kuna apostolo mbaaphedza kubvesesa kuti mwandimomwene Saulo acinja. Saulo atoma kumwaza mphangwa zadidi mwaphinga pabodzi na mpingo ku Yerusalemu. Mukupita kwa ndzidzi, iye adzadziwika na dzina yakuti, Paulu.